هوندا سيفيك 2015 مقارنة بباقى فئتها من السيارات..أين هى؟

أنا متعجب جداً بصراحة و عايز أسمع أرائكم فى هذا الموضوع للإستفادة:

دائماً ما يضرب المثل بالهوندا سيفيك فى كل شىء
يعنى حدبيصنح حد بعربية جراية و مواتير شديدة يقوله عليك بالهوندا السيفيك
حد بيصنح حد بعربية إعتمادية يبقى ملكش غير الهوندا السيفيك
حد بيسأل على عربية ثابتة و نظام تعليق ممتاز يبقى الهوندا
عربية يابانى 100% تبقى الهوندا
تكييف جبار يبقى هوندا

طيب لما الهوندا سيفيك عربية كاملة المواصفات كده....ليه مبيعاتها لا تذكر فى السوق المصرى و نادراً لما تجد واحدة ماشية فى الشارع
طبعاً مقارنة بالكورولا أو الفلوانس أو السيراتو أو الألنترا أو الأسترا أو..... اللى هما المنافسين من نفس الفئة

أرجو المشاركة للإستفادة

تحياتى

و امبريزا و فوكاس كمان !!!

فوكاس ك handling طبعاً ممتازة و لكن الفتيس الباور شيفت بتاعها مقارب فى فكرة عمله لل dsg و طبعاً مقارب له كمان فى المشاكل!!!!! مع توكيل لسه موقفه ضبابى فأنا منصحش بيها

أمبريزا كسيارة طبعاً ممتازة، يمكن مشكلتها بالنسبالى شخصياً هى شكلها و توكيلها

الهوندا فعلاً مش عارف أي سبب ندرتها؟؟؟!!!!

يعنى كل الناس بتنصح بيها و تضرب بيها المثل و مع ذلك مبيعات العربية نادرة.....يا ريت نتناقش علشان نعرف الأسباب مع بعض
و إذا فرضنا أن الهوندا كعربية تتفوق على الكورولا خصوصاً بعد ما أتجمعت فى تركيا و هو فرض....طيب ليه الكورولا تكتسحها فى المبيعات
طيب دى الكورولا و ليها شعبية و ثقافة شعب و إعادة البيع و كل الكلام المتعاد ده
طيب ليه الفلوانس مبيعاتها تفوق السيفيك بمراحل بالرغم من شعبية الهوندا الكاسحة مقارنة بالرينو فى مصر؟؟؟؟؟؟!!!!!!
نفس الشىء....مفيش مقارنة ما بين شعبية الأسترا و الهوندا فى مصر خصوصاً أننا بنقارن الأسترا مش الفكترا مع السيفيك....و مع ذلك فيه تفوق ملحوظ و مبيعات محترمة للأسترا على حساب السيفيك

طبعاً السيراتو بايعه كميات ضخمة، الألنترا كميات ضخمة و كل الناس تقول أحنا هنقارن كورى بيابانى و مع ذلك كمبيعات فعلية على أرض الواقع تفوق ملحوظ للكورى و عجز تام لليابانى....

نفس الشىء بالنسبة للمازدا 3....أين هى من السوق المصرى؟؟؟؟!!!!

يا ترى أيه الأسباب اللى بتنجح عربية و تسقط التانية؟ أيه هى معايير السوق فى مصر؟

يا ريت أسمع أراء حضراتكم

تحياتى

بس المازدا 3 بشوفها متواجدة عن السيفيك بصراحة لكن فعلا السيفيك مالهاش تواجد في السوق المصري مقارنة بنفس فئتها . بس انا ال اعرفة من ضمن عيوبها انها واطية على الأرض عن باقي السيارات في نفس الفئة .

اعتقد عدم انتشار السيفيك يرجع لارتفاع سعرها عن مثيلاتها وان هوندا لم تقدم اي جديد في العربيه .. بالعكس انا حاسس ان شكلها كا ديزاين بقا اوحش .. الهوندا لا غبار عليها طبعااااااااا ... بس احنا كشعب يقولك انا اجيب عربيه ب 200 الف ليه وهي مش منتشره اوي لما ممكن اجيب تويوتا اللي سمعتها ناااار وشكلها الجديد حلو وسعر اعاده بيعها وسوقها ماشي عن السيفيك .. هل فيه مشاكل بالنسبه للوكيل مش عارف بس اللي اعرفه ان توكيل تويوتا مش هنا مش محتاج كلام .. هل عشان السيفيك واطيه شويه .. اعتقد برضه لو واحد هيدفع ال 200 الف ممكن يفكر في الاوكتافيا .. السيفيك مظلومه عندنا .. كل العربيات مظلومه عندنا .

اقتباس:

---

المشاركة الأصلية كتبت بواسطة piowood

بس المازدا 3 بشوفها متواجدة عن السيفيك بصراحة لكن فعلا السيفيك مالهاش تواجد في السوق المصري مقارنة بنفس فئتها . بس انا ال اعرفة من ضمن عيوبها انها واطية على الأرض عن باقي السيارات في نفس الفئة .

---

اللى سمعته أن موضوع الأرتفاع أتظبط من أول 2014 و الناس بتأكد أن موديلات 2015 مفهاش مشكلة الأرتفاع
و نفس الشىء بالنسبة للكورولا....أول ما نزلت كانت واطية جداً و تقفيل تركى و مع ذلك مبيعات خرافية

يا ترى إيه العوامل اللى بتنجح سيارات فى سوقنا و بتسقط سيارات محترمة أخرى؟؟؟!!!!!

تحياتى

اكيد التجار ليهم دخل في الموضوع ده .. وحاجه غريبه برضه ان في معظم المعارض نادرا ما بلاقي سيفيك معروضه للبيع .. ممكن الاقي عربيه واحده واقفه و 5 كورولا الناحيه التانيه ..

اقتباس:

---

المشاركة الأصلية كتبت بواسطة mhmd_farouq

اعتقد عدم انتشار السيفيك يرجع لارتفاع سعرها عن مثيلاتها وان هوندا لم تقدم اي جديد في العربيه .. بالعكس انا حاسس ان شكلها كا ديزاين بقا اوحش .. الهوندا لا غبار عليها طبعااااااااا ... بس احنا كشعب يقولك انا اجيب عربيه ب 200 الف ليه وهي مش منتشره اوي لما ممكن اجيب تويوتا اللي سمعتها ناااار وشكلها الجديد حلو وسعر اعاده بيعها وسوقها ماشي عن السيفيك .. هل فيه مشاكل بالنسبه للوكيل مش عارف بس اللي اعرفه ان توكيل تويوتا مش هنا مش محتاج كلام .. هل عشان السيفيك واطيه شويه .. اعتقد برضه لو واحد هيدفع ال 200 الف ممكن يفكر في الاوكتافيا .. السيفيك مظلومه عندنا .. كل العربيات مظلومه عندنا .

---

معلوماتى أن توكيل تويوتا و هوندا فى مصر واحد و هو الفطيم مصر....يمكن تحت أسمين أو شركتين من الشركة الأم و لكن الأصل واحد و هو الفطيم.

حضرتك بتقارنها مثلاً بالكورولا وفعلاً كثقافة شعب الكفة تميل ناحية الكورولا
إنما مثلاً الأسترا تتفوق ليه؟
الفلوانس تتفوق ليه و مفيش سوق لرينو فى مصر؟

الكورى و مع أسعاره النارية يكتسح الهوندا ليه؟ و ما الذى قدمته الألنترا جديد فى 2015 غير الشكل؟

أسئلة كثيرة تحتاج لإجابات

تحياتى

اقتباس:

---

المشاركة الأصلية كتبت بواسطة mhmd_farouq

اكيد التجار ليهم دخل في الموضوع ده .. وحاجه غريبه برضه ان في معظم المعارض نادرا ما بلاقي سيفيك معروضه للبيع .. ممكن الاقي عربيه واحده واقفه و 5 كورولا الناحيه التانيه ..

---

ملحوظة ممتازة....أنا لا أتذكر أنى شاهدت السيفيك معروضة فى أى معرض سيارات إلا معارض توكيل هوندا نفسه....حاجة غريبة جداً فعلاً

تحياتى

ماخدتش بالي من موضوع الفطيم ده هههههههههه معلش اصلي مطبق, بس حضرتك برضه الفلوانس قدمت جديد كلياا .. الاسترا برضه تغيرت بشكل ملحووظ .. الكوري بقا ليه قصه عشق مع الشعب المصري من قديم الازل .. الناس بتثق في هيونداي وكيا .. ما انا كمواطن مصري هجيب كووري اللي ماااالي البلد وقطع غياره رخيصه وفي كل حته .. الفلوانس احلى حاجه عجباني فيها ان ملاكها فعلا عرفوا يحافظو عليها وعلى سعرها .. وهي عربيه محترمه .. هي الفكره عندنا في مصر اشوف جاري راكب ايه واساله حلوه؟ اه.. طيب توكلت على الله وهشتري زيك .. السيفيك ما عملتش جديد .. اعتقد لو غيروا الشكل زي الكورولا وخلو سعرها يبدأ زي الكورولا هيكون في انتشار احسن ليها .. وانا كنت من الناس اللي منتظره الشكل الجديد للهوندا .. وجات الصدمه بالشكل الحالي .. ده ما يمنعش انها عربيه وهميه . تحياتي لحضرتك استاذ هاني .