ايه رايكم فى دايهاتسو جران ماكس للنقل التجارى ؟؟

**hossam_elwani** · 05-11-2014 05:18 PM

ايه رايكم فى دايهاتسو جران ماكس للنقل التجارى ؟؟

وهل فيه بديل افضل ؟؟

وهل العربيه بتمشى وسط البلد عادى وعلى الكورنيش مثلا ولا ممنوع زيها زى النص نقل ؟؟

**ahmed p880** · 07-11-2014 11:07 PM

حدد الهدف من الشراء وانا هفيدك باذن الله

**Omar Mahmoud** · 08-11-2014 03:04 PM

المفروض زيها زي النص نقل
الدودج رام بتتعامل علي إنها نص نقل

**hossam_elwani** · 08-11-2014 03:10 PM

الهدف هو توزيع منتجات مختلفه حمولتها طن فى اقصى تقدير

**ahmed p880** · 08-11-2014 07:07 PM

كان قصدى هدف من نوعيه المنتج وخلاص مش مشكله هقول اللى عندى
كنت عايز اوفر كتابه وقراءه

المهم فى منتجات بتبقى هايشه بتاخد حجم على الفاضي كمنتجات البطاطس الشيبسي والاسناكس وفى الحالة دى مينفعهاش جران ماكس دى عايزة ربع نقل بصندوق عالى
ولو هتشتغل فى منتجات حديد بتعمل وزن يبقى عايز حاجة تحميل كويس وبرده الجران ماكس مش مكانها انت عايز شفروليه
ولو هتشتغل فى حاجة محتاجه سرعه كزريعه السمك تبقى محتاج نيسان او تويوتا

الفان المقفول
منه سوزوكي وشفروليه والديهاتسو
كتحميل كلهم واحد حجم بسيط حموله خفيفة
السوزوكي قطع غيار رخيصة ومتوفره واى حد بيشتغل فيها واعادة بيع كويسه
الشفروليه نفس السوزوكي وافضل فى الشكل وقطع غيار اغلي
الديهاتسو قطع غيار اغلى اكتر وبشكل احسن
الفان الصغير ينفع فى شغل مكتب صغير مخبوزات وحلويات شغل خفيف كله مش محتاج ضغط

فى فئه تاني اللى هي بتبقى كابينه سيدان بصندوق مغلق زى الفيات الجديدة مثلا
السيارات الجديدة | فيات | فيورينو 2015 - ContactCars.com
وفي منها فولكس وفي سيات ومعظم الحاجات ده بتبقى نفس ماتور السيدان المشابه ليها وعربيات عمليه مريحه فى الشغل يعبها اعادة البيع بتنزل كتير

المهم البك اب (الربع نقل)
شيفرولية واسوزو ونيسان وتويوتا وميتسوبيشي
وكل حاجه وليها حاجة ومن الاول استبعد الميتسوبيشي من كل المقارانات لاسباب كتير
الافضل في اعادة البيع بالترتيب الشيفرولية الاسوزو النيسان التويوتا
الافضل فى التحميل الشيفرولية التويوتا الاسوزو النيسان
الاسهل فى الصيانه النيسان الشفرولية الاسوزو التويوتا
الاسرع النيسان تويوتا اسوزو شفرولية
الراحه فى الشغل ودى مهمه متنسهاش خاصة لو هتشتغل عدد ساعات كتير او هتسافر كتير تجيب بضاعه
الافضل بدون منازع وبفرق كبير التويوتا من ثبات وسرعه وتحميل ضعف الطبيعى
يليها الاسوزو والشيفرولية والنيسان
الافضل فى الشكل التويوتا الاسوزو الشيفرولية النيسان
الرفاهاية والبرستيج متدورش انت راكب جاز وهيتقالك يا اسطي حتى لو انت دكتور بس التويوتا بيتعملها احترام
اسعار قطع الغيار قريب من بعض يعتبر مفيش فرق مع اختلافات بسيطه فى القطع الخارجية من فوانيس ومرايات
من الارخص للاغلي الشيفرولية والاسوزو النيسان التويوتا

لو عايز اكمل قول
حدد انت عايز ايه ونتعمق اكتر انا اساسا محاسب واشتغلت فى المبيعات كتير وكنت مشرف اسطول سيارات بجميع انواعها صغير وكبير وعارف كل حاجه بتفصيل كتير سهل الموضوع على واكسب وقت

**hossam_elwani** · 08-11-2014 09:22 PM

المشاركة الأصلية كتبت بواسطة ahmed p880

كان قصدى هدف من نوعيه المنتج وخلاص مش مشكله هقول اللى عندى
كنت عايز اوفر كتابه وقراءه

المهم فى منتجات بتبقى هايشه بتاخد حجم على الفاضي كمنتجات البطاطس الشيبسي والاسناكس وفى الحالة دى مينفعهاش جران ماكس دى عايزة ربع نقل بصندوق عالى
ولو هتشتغل فى منتجات حديد بتعمل وزن يبقى عايز حاجة تحميل كويس وبرده الجران ماكس مش مكانها انت عايز شفروليه
ولو هتشتغل فى حاجة محتاجه سرعه كزريعه السمك تبقى محتاج نيسان او تويوتا

الفان المقفول
منه سوزوكي وشفروليه والديهاتسو
كتحميل كلهم واحد حجم بسيط حموله خفيفة
السوزوكي قطع غيار رخيصة ومتوفره واى حد بيشتغل فيها واعادة بيع كويسه
الشفروليه نفس السوزوكي وافضل فى الشكل وقطع غيار اغلي
الديهاتسو قطع غيار اغلى اكتر وبشكل احسن
الفان الصغير ينفع فى شغل مكتب صغير مخبوزات وحلويات شغل خفيف كله مش محتاج ضغط

فى فئه تاني اللى هي بتبقى كابينه سيدان بصندوق مغلق زى الفيات الجديدة مثلا
السيارات الجديدة | فيات | فيورينو 2015 - contactcars.com
وفي منها فولكس وفي سيات ومعظم الحاجات ده بتبقى نفس ماتور السيدان المشابه ليها وعربيات عمليه مريحه فى الشغل يعبها اعادة البيع بتنزل كتير

المهم البك اب (الربع نقل)
شيفرولية واسوزو ونيسان وتويوتا وميتسوبيشي
وكل حاجه وليها حاجة ومن الاول استبعد الميتسوبيشي من كل المقارانات لاسباب كتير
الافضل في اعادة البيع بالترتيب الشيفرولية الاسوزو النيسان التويوتا
الافضل فى التحميل الشيفرولية التويوتا الاسوزو النيسان
الاسهل فى الصيانه النيسان الشفرولية الاسوزو التويوتا
الاسرع النيسان تويوتا اسوزو شفرولية
الراحه فى الشغل ودى مهمه متنسهاش خاصة لو هتشتغل عدد ساعات كتير او هتسافر كتير تجيب بضاعه
الافضل بدون منازع وبفرق كبير التويوتا من ثبات وسرعه وتحميل ضعف الطبيعى
يليها الاسوزو والشيفرولية والنيسان
الافضل فى الشكل التويوتا الاسوزو الشيفرولية النيسان
الرفاهاية والبرستيج متدورش انت راكب جاز وهيتقالك يا اسطي حتى لو انت دكتور بس التويوتا بيتعملها احترام
اسعار قطع الغيار قريب من بعض يعتبر مفيش فرق مع اختلافات بسيطه فى القطع الخارجية من فوانيس ومرايات
من الارخص للاغلي الشيفرولية والاسوزو النيسان التويوتا

لو عايز اكمل قول
حدد انت عايز ايه ونتعمق اكتر انا اساسا محاسب واشتغلت فى المبيعات كتير وكنت مشرف اسطول سيارات بجميع انواعها صغير وكبير وعارف كل حاجه بتفصيل كتير سهل الموضوع على واكسب وقت

تسلم ياغالى على المعلومات والاستفاضه فيها مش عارف اقولك ايه

العربيه جايه عشان تشتغل فى مجال المستبزمات الطبيه و احيانا فى مجال الاتصالات اجهزة محمول وخلافه

وممكن فى فتره اشتغل فى مجال السلع الغذائيه سكر ورز وخلافه

ياترى النوع ده فعلا بيشيل طن وعزمه معقول

وهل ممكن تشيل مثلا طن سكر عادى

**ahmed p880** · 09-11-2014 01:09 AM

اسف على التاخر فى الرد
هى تنفع فى الاتصالات

بالنسبة للمستلزمات الطبية مش هتنفع لانها يا اما ثقيله يا اما بلاستيكات وهتبقى هايشه
انا كان عندى تويوتا واشتغلت فى الحوار ده كانت بتشيل مثلا 50 كرتونه ميزان شخصي والعربية الاقيها فى الارض
ولو هتحمل بيبورنات ومشط وفرش اطفال وحاجات من دى الكرتين حجمها كبير ومش بتوزن

بالنسبة للسكر والارز وهتضيف البوقليات عدس ولوبيا ودقيق وممكن زيت كمان المهم
لو هتشتغل طلبيات ممكن
لو ناوى تشترى جمله وتنبيع تجزئية مش هتنفع لان مش هتنزل توزع وانت معاك طن سكر بس
انت هتنزل يبقي معاك على الاقل
1 طن سكر
1/2 طن ارز
و5 طرد عدس
و5 طرد دقيق
وده يا دوب لان مكسب الحاجات دى بسيط بيفرق فى الكميات
انا كنت ماسك مدير انتاج مصنع تعبيئة مواد غذائية
اول ما بدانا كنا عندنا 4 عربيات ربع نقل
على ما اتعرفنا فى السوق وبدانا نشتغل جمبنا عربية جامبو نص نقل تشتغل جمله وعربيتين ثلث نقل تشتغل تجزئية والعربيات الصغيرة كانت على اد الطلبيات وبعد كده خط بتاع الزيت اشتغل شغلناهم فى توزيع الزيت والعربية الربع بتاخد بالظبط 98 كرتونة زيت وكنا بنقفل عدد ونحط كرتونتين فى الكبينة

ولو عايز اى استفسار فى موضوع التعبيئة اسال بس وملكش دعوة

**ahmed p880** · 09-11-2014 01:16 AM

اه ونسيت كمان ارد على سؤالك اصلا
هى مش بتاعت شغل احنا غلطنا وجبنا عربيتين منهم وحاليا شغالين فى العيش اللبنانى فقط
بالاضافه ان استهلاكها عالى بالنسبة لعربية شغل لانها بنزين وهتحطلحها 92 وده مقارنة بسعر السولار الضعف

لو عايز تجيب حاجة تنفع فى اى حاجة يبقى ربع نقل
وفي الاول وفى الاخر انت اكتر واحد عارف ظروف نفسك من حيث سعر العربية ومن حجم نشاط عملك

ولو انت فى الاول ولسه مش عارف الشغل هيبقى ازاى خليك فى الربع نقل افضل حتى لو هتجيب مستعمل
ولو هتجيب مستعمل يبقي عليك وعلى سوق الجمعه بتاع البساتين
انوى انت بس واقولك تعمل ايه

**hossam_elwani** · 09-11-2014 03:41 PM

تمام اوى

على فكره العربيه 4.13 م3 فهل فعلا المستلومات الطبيه ماتنفعش معاها ؟!!

الدبابه اقصى حد بالمتر المكعب تشيله كام ؟؟

ومدام حضرتك خبره فى مشروع المواد الغذائيه انا بفكر فى تعبئة وتغليف السكر والرز فقط كبدايه مع العربيه والتوزيع جمله طلبيات وقطاعى توزيع

**ahmed p880** · 10-11-2014 06:56 AM

- الدبابة عرض 170 * 230* الارتفاع اللى انت عايزة من متر ل 170
بافتراض هتعمل المنتشر 140 ارتفاع هيبقي 5.474 متر مكعب

لو ناوى على المستلزمات الطبية هتجيب صندوق كبير ارتفاع 170 هيديك بالمكعب 6.647
بس ارتفاع الصندوق الزياده عن اللزوم خطر لو مش هيبقي ده شغلك المستمر
بيصد فى الهواء وانت ماشي وبيعجز العربية بدرى ولو محمل تقيل ممكن يقلب العربية فى ملف خاصة لو سواق غشيم

- بالنسبة لموضوع التعبيئة
فى يدوى وفيى نصف اتوماتيك وفى اتوماتيك وكل حاجة بقصه لواحده
على حسب امكانياتك والمستوى اللى عايز تشتغل به من جوده
وعموما فى المجمل متوسط الربح فى الطن من 200 ل 300 جنية على ارضه
بمعنى (على ارضه) بدون تكلفة التوزيع من اهلاكات العربية ومرتبات سواق ومندوب

- النصحية
علشان تكسب من موضوع السكر والارز لازم كميات على الاقل 5 طن يوميا تعبيئة وبيع
وفى الحالة دى الربع نقل مش هتنفع معاك برده انت عايز ثلث نقل على الاقل او جمبو او تحمل على اكتر من مرة

- طبيعه الشغل على السريع
المدخلات
سكر خام - اكياس بلاستيك هاى للتعبيئة- اكياس بلاستيك للشرينك - بكر لاصق سوليتب
المخرجات
سكر معبء - هالك الاكياس بالاضافة للطبقة الداخلية من الشيكارة تباع بالوزن - شكاير سكر فارغة تباع باللفة عبارة عن 19 شيكارة ملفوفين محطوطين فى الشيكارة ال20 - هالك سكر او بيقولو عليه كنسه سكر ويباع للمناحل بالوزن

العمالة
على حسب طريقة التعبئة وبحد ادنى 6 افراد وبحد اقصي 10 للماكينة الواحده

حدد برده عشان اكمل طريقة الشغل والمساحة المتاحة للشغل
عايز تشتغل يدوي ولا اتوماتك ولا تصرف نظر وتفكر فى تعبيئة الزيت افضل او التوابل
او تريح دماغك خالص وتشترى جاهز وتوزع بس