الموضوع: جيب 2010 ليمتيد

أنا معايا ٢٠٠٩
العربيات دى ركوبها ممتع جداً للى غاويها المهم تكون العربية حالتها كويسة ومش متهانة من جوة ومن برة . طبعاً الكيلومتراج القليل ده حاجه كويسة .
- المهم إنك تكون محتاج العربية أو غاويها - هى عربية عائلية وواسعة المشكلة بس إن اللى قاعدين على الكنبة الخلفية مش حايبقوا مستريحين قوى بس ماشى الحال محدش حايشتكى لأنهم بيبقوا مبسوطين لأنهم عاليين وشايفين الدنيا كلها :)
- زوايا الرؤية كويسة جداً ومش موجودة فى عربيات ٤x٤ كتير
- التحكم فيها وفى توجيها كويس جداً
- شوية اوبشنات حلوة زى برنامج ضبط الكرسى وضبط المرايات والنور اوتوماتيك والمساحات كمان اوتوماتيك وكل ده بيتبرمج من كمبيوتر العربية لو عاوز تشغله او تلغيه وكمان فيها بركينج سينسور ومثبت سرعة وهاند فرى للموبيل بس برمجته غلسه شوية و مقاس للكاوتش وبوصلة ودرجه حرارة الجو فى الخارج
- العربية ماسكة نفسها على الطرق اثناء السفر بس مانصحكش تجرى بيها اكتر من ١٦٠كم علشان الطرق عندنا وحشة وكمان العربية عاليه واتزانها فى الملفات على السرعات دى مش قد كده وده طبع كل العربيات الفور باى فوروأحسن مشى بيها ١٢٠ كم/ساعة - بس لو اتزنقت وقرصت على دواسة البنزين العربية تجميعها حلو جداً وحاتحس بانها بتطير وده بينفع فى الزنقة ساعات .
- الفرامل عشرة على عشرة بس طبعاً لازم تغير التيل فى مواعيده زى الكتالوج وأنصحك وأنصح أى حد يغير الطنابير الأمامية كل ٦٠ الف كيلو او لما بتحس على السرعات العالية لما تدوس فرامل بصوت دبدبة تحت رجلك
- التكييف ممتاز بس بياخد وقت على مايوصل للركاب على الكنبة الخلفية علشان العربية كبيرة
- استهلاك البنزين طبعاً عالى حوالى من ١٦ الى ١٨ لتر فى الـ١٠٠ كم فى الزحمة ممكن يكتروا شوية حسب الزحمة ـ وعلى الطرق السريعة من ١٢ إلى ١٤ لتر فى الـ ١٠٠ كم وممكن أقل حسب سرعتك
- العربية فى الوضع العادى جر خلفى وفيها وضعين كمان وضع فورباى فور اوتوماتيك وده بتستعمله لما تكون الارض مزحلقة او غرس بسيط ومش محدد بسرعة معينة . ووضع فور باى فور low للغرس التقيل بس طبعاً محدد بسرعة لاتزيد عن ٤٠ كم/ساعة وليه قيود وطريقة للإستخدام مش مجالها دلوقتى.
- طبعاً تخلى بالك وانت ماشى اوبتركن جنب اى رصيف لأنك ممكن بسهولة تلاقى نفسك طلعت عليه بدون مجهود بالمرة ـ كمان تخلى بالك من العربيات اللى جنبك لو جبت الدركسيون للأخر لأنك ممكن تخلع اكصدام عربية جنبك وقريبة قوى بفردة عجلة قدام وانت بتكسر الدركسيون للأخر :)
- العربية دى روحها تغيير البوجيهات والزيت بدون اى كسل او تأخير
- العيب اللى مش عاجبنى فى العربية هو ان البوية بتاعتها مش مخدومة يعنى على طول عينك عليها تشوف فيه اى تجيير أو صدا
طبعاً العربية مليانة سنسورات وكمبيوتر بس لو العربية محدش بيلعب فيها وبتعمل صيانتها مافيش حاجه بتبوظ منهم ومش بتحس بيهم
قطع الغيار متوفرة وعندك التوكيل حاجته اصلية بس غالى شوية والسوق حاجته مش غالية قوى بس مش اصلية والاختيار ليك ..... انا جربت الاتنين وبالتجربة اتضح ان قطع الغيار من التوكيل هى اضمن حاجه ومعمرة
- طبعاً المطبات مش حتلاقى العربية بتحك من تحت ولا اى اندهاشة :) .... والعفشة حلوة ومريحة بس متخدش مطبات على سرعات عاليه وحد راكب على الكنبة الخلفية
- شوية حاجات تاخد بالك منها وانت بتشترى العربية:
١- اتأكد من عدم وجود صدأ فى : مفصلات الابواب ومفصلات الشنطة وحوالين قواعد الروف راك وحوالين فتحة السقف وحوالين البرابريز
٢- افتح الكبود وشوف هل كل حاجه فى مكانها ومسامير التثبيت البلاستيك بتاعة الوش مش ملعوب فيه والقفزان اللى مثبته الاسلاك والخراطيم سليمة ولا مكسرة . يعنى نظرة عامة كده وانت حاتعرف اذا كان فيه حاجه غلط او ملعوب فيها.
٤- حالة الفرش الداخلى مافيش حاجه مقطوعة فى جلد الكراسى ولا لطشة سيجارة ـ وكمان كسوة السقف مافيهاش بقع ولو فيها يبقى تتأكد من عدم وجود بارومة فى السقف ولو مافيش يبقى فيه خرطوم مسدود مثلاً ولا ايه السبب إسأل صاحبها .
٥- إركب العربية وشوف العربية وهى دايرة مافيش لمبة تكون منورة فى التابلوة غير لمبة فرامل اليد والحزام بس ولو فيه حاجه تانية منورة يبقى فيه مشكلة
٦- امشى بالعربية وشوف اخبارها ايه هل يوجد اى اصوات غريبة وهل بتنقل كويس ( طبعاً مش فى الزحمة)
وهل يوجد اى صوت ونة وانت ماشى (الطبيعى بيكون فيه صوت ونة عند سرعة حوالى ٥٠ - ٦٠ كم/ساعة) هل يوجد طقة فى الدركسيون خصوصاً لو انت واقف او ماشى بسرعة بطيئة
٧- خلى صاحبها يكون جايب وضع الكمبيوتر على استهلاك البنزين وشوف بتعمل كام وانا ذكرت لك فوق معدلات استهلاك البنزين
٨- اخبار الفرامل ايه وهل بتسمع دبه لما تدوس فرامل ولا مافيش حاجه.
٩- المشكلة بتاعتها انك لما تتعود عليها مش حاتعرف تركب عربية تانية وحاتتخنق بسرعة لو غيرتها :) ( والله ده عن تجربة)

وتحت امرك فى اى سؤال تانى وربنا يوفقك ويبارك لك

المشاركة الأصلية كتبت بواسطة stonecoldmido5

مشاركة و لا اروع تسلم ايد حضرتك , بس ممكن اعرف تقريبا التيل يتغير كل اد ايه؟

حسب استخدامك وحالة الطرق اللى بتمشى فيها والكتالوج بيقول كل ٢٤٠٠٠ كم يتكشف عليه . انا غيرته على ٦٠ الف كم وانا بامشى على طرق معظمها اسفلت .. وعملت فيها ناصح وعفريت :) واشتريت تيل من السوق ب٣٧٥ جنيه وانا فرحان وسعيد وبعد اسبوع لقيته بيصفر وكان حايبوظ الطنابير والدنيا وطبعاً رحت اشتريت تيل اصلى من التوكيل ب١٠٠٠ جنية وحرمت اشترى حاجه مش اصلى خصوصاً زى تيل الفرامل

المشاركة الأصلية كتبت بواسطة h.taher

احتاج مساعداتكم فى سيارة جيب kk2010 ...العتب المضيء للكراسى الماميه لا يضيء ويحتاج تغير ومش عارف أجيبو منين ...برجاء المساعدة سواء للتصليح او العثور على جديد علما أنى كلمت التوكيل ولم اجد...شكرًا و بانتظار الاجابه ..

كشفت على الفيوزات و اللمبات ..... إدينى فرصة حاشوفلك رقم الفيوز كام وازاى اللمبات بتتفك وكمان حاشوفلك البارت نمبر بتاعها يمكن لما تسأل فى التوكيل بالبارت نمبر يلاقوه موجود