الموضوع: سوزوكى أرتيجا suzuki ertiga

تم الإتصال بى من خدمة العملاء بمودرن موتورز مصر توكيل سوزوكى يستطلع الرأى فى الصيانة التى أجريتها للإرتيجا و مطلوب التقييم بممتاز أو جيد جداً أو جيد أو مقبول عن:-
1- الصيانة ( جيد جداً )
2- مسئول الصيانة الذى قابلنى ( ممتاز )
3- نظافة السيارة بعد الصيانة ( جيد جداً )
4- البيانات عن قطع الغيار المتوفرة ( جيد جداً )
5- هل يوجد قطع غيار سألت عنها و توافرها من عدمه ؟
طبعاً أنا كنت محتاج دوسات السيارة
و أفاد مسئول خدمة العملاء أن المصنع بالهند يوجد نقص فيها و التوكيل طالبها منذ فترة و متوقع توافرها خلال شهرين و تم تأكيد رقم تليفونى و الإفادة بالإتصال بى فوراً عند توافرها ...
تحياتى لخدمة العملاء و نتمنى الإهتمام و العناية دوماً و تقديم خدمات ما بعد البيع بشكل متميز يرضينا جميعاً

المشاركة الأصلية كتبت بواسطة mokh_2003

بشمهندس عماد
بصراحة انت راجل محترم
وتعاملك بالشكل ده خلانى اشترك فى المنتدى
فعلا ربنا يباركلك فيها ويمنع عنك شرها
دى اول مشاركة ليا بس انا مبسوط بالمشاركة اوى
بشمهندس عماد انت من الاخر راجل زووووووووووووق
اما عن نفسى بتمنى اشترى العربية دى علشان اسافر بيها انا واسرتى ووالدى ووالدتى
وبحب اوى موضوع ال7 راكب ده
وبفكر انى اشغلها فى المدارس انى اركب فيها اولادى ومهاهم اولاد الجيران
فى توصيلهم لمدارسهم بس مش عارف متوسط الاستهلاك للبنزين عالى بالنسبة
للى قلته عنها وكمان احب اعرف منك هو ممكن ادفع مبلغ زى نصف تمنها واقسط الباقى
ولو ياريت اعرف كمان هو انا لو من الصعيد وعايز اعمل ليها صيانة ال 1000 كيلو هسافر بيها مصر
وهل فى فروع صيانة او فروع للتوكيل فى الصعيد زى قنا
ومشكورا اكتب لنا رقم توكيل مودرن موتورز القاهرة
وكتر خيرك على تعبك معانا
وبعدين اهم من كل حاجة قطع الغيار مدى تزفرها بالظبط
اصلا هما ممكن يقولوا فى التوكيل انها موجودة وتكام وفى الاخر يكون ضحك على الدقون

أسف جداً على تأخرى فى الرد ... السيارة بصراحة راااااااائعة و ممتازة و ممكن تقضى الغرض اللى محتاجة منها و ممكن مشاوير أو رحلات ستكون رائعة و ممتازة فالسيارة رحبه و ثابتة و سحبها ممتاز و تكيفها متميز ... أقرب فرع لكم فى الصعيد يوجد فى أسيوط فى 4 ش عبدالساتر الخراط و تليفونه 0882301251 ... رقم التوكيل بالفرع الرئيسى 3539055 ... و أنا شخصياً بفضل إجراء الصيانة بالفرع الرئيسى بأبو رواش ... و يمكنك الإتصال على خدمة العملاء على الرقم 16680 للمزيد من المعلومات التى تحتاج إليها ... تقبل خالص تحياتى و تقديرى و تقبل أسفى فى التأخير عليك فى الرد

أكملتا الــ 3000 كم على خير و بصراحة الواحد مش لاقى عيوب يقول عليها و لكن السيارة الحمد لله كلها مميزات و تستحق ... السحب ممتاز و التكيف رااااااائع الثباب عالى و بصراحة مبحاولش أعدى الــ 150 كم للسرعة و السيارة و كأنها على الـ 60 كم مش 150 كم ... متوسط إستهلاك البنزين المسجل على شاشة السيارة 14.5 كم/لتر

المشاركة الأصلية كتبت بواسطة ahmouda2009

الف مبروك وربنا يبارك لك فيها أنا بقالي سنين عايز اجيب عربية ٧ راكب بس للأسف الأسعار نار سواء الكيا او الجرايد تيريوس ولما لقيت الارتياح ارتحت نفسيا لها بعد سماع بعض التعليقات المبداية عليها ورحت النهاردة حجزت عند فرع ابو رواش ودفعت ٥٠٠٠ ج عند أستاذ خالد المعلومات المتوفرة ان التسليم بعد ٦ شهور نظرا لان الحجز عليها وصل حوالي ٣٠٠ وللاسف الشحنة اللي بتوصل ما بيحصلش ١٥ سيارة ،، السعر ١٢٨٥٠٠ قابل للزيادة وسالت علي إمكانية التقسيط قال ان ممكن تبع شركة تبعهم بفائدة ٩.٥ ٪ لقيتها حتزيد حوالي ١٠٠٠٠ ج لو دفعت مقدم النص والباقي على سنتين،،، أنا اخترت النبيهي بس بفكر اليد للأبيض شكله احلى بصراحة ايه رأيكم ؟
دي كل المعلومات المتاحة للان بس أنا شايف ان ٦ شهور كتير قوي مش عارف هل يمكن نقلل المدة ولا استنى وخلاص وفكرة أني أجيبها من المعارض بأوفر باريس اكتر من ١٠٠٠٠ ج حرام فيهم،،،
نرجو متابعة تقييم السيارة للملاك لتوضيح الأمور اكتر قبل الاستلام وشكرا جزيلا

مبروك الحجز و أتمنى أن يكون عندك صبر علشان الوقت طويل جدا و ممكن تسأل على القسط المرن هيخليك تستلم بدرى شهر أو أكتر عن التقسيط العادى و ممكن تسدد فى خلال شهرين تلاتة كامل المبلغ و وقتها الزيادة هتكون حاجة بسيطة
أخيرا حضرتك بتقول بتفكر فى الأبيض فهل تم إخبارك بأن الأبيض ضمن الألوان المتاحة و التى يتم جلبها من سوزوكى !!

المشاركة الأصلية كتبت بواسطة n_salamaly

بسم الله - ما شاء الله ربنا يبارك لك فيها و يرزقك خيرها و يكفيك شرها و تكون عون لك على الطاعة

تقبل خالص تحياتى و تقديرى