-
تعالوا نفيد بعض
احنا ما شاء الله عددنا مش قليل و تخصصاتنا متنوعة بشكل ممكن يتيح لنا الفرصة اننا نستفاد من بعض في جميع المجالات تقريبا.. يعني مثلا منا الدكاترة اللي ممكن يفيدونا بنصايح طبية ممكن محدش مننا يكون يعرفها قبل كده أو تصحيح أخطاء شائعة و معتقدات خاصة بالصحة ممكن تودي في داهية و ده ممكن يشمل جميع المجالات الطبية بما فيها الصيدلة.. أكيد برضه فينا اللي بيشتغلوا في المجال المالي و الاقتصادي و المحاسبي.. ممكن اللي عنده سؤال في هذا الخصوص يلاقي إجابة سؤاله هنا.. طبعا ده غير المجال القانوني و الهندسي و المبيعات و التسويق و تكنولوجيا المعلومات.. إلى آخره.. المهم اننا نستفاد من تواجدنا هنا اننا نفيد بعض حتى و لو الأمر غير متعلق بالسيارات.
المطلوب هو ان كل واحد يدخل يقول تخصصه و يقدر يفيد بإيه.. و اللي مش عارف بالظبط هو يقدر يفيد ازاي ممكن يقول تخصصه فقط و بعد كده الأسئلة اللي هاتجيله من اللي محتاج نصيحة في المجال ده، ممكن يعرف من خلالها هو يقدر يفيد بإيه و الدايرة توسع و الكل يستفاذ بإذن الله :)
انا هابدأ بنفسي في المشاركة اللي جاية ان شاء الله.
-
العبد لله كاتب تقني (Technical Writer)
شغلتي إني أكتب معلومات المساعدة أو ما يطلق عليه اسم (Help) لبرامج الكمبيوتر والمواقع الإلكترونية
جاهز لأي توضيح :)
-
وانا اول واحد احب اشارك لاني نفسي افيد اعضاء المنتدي وشكرا لمواضيعك الجامده جدا
محمد الشنوري
مركز صيانه موبايل وكمبيوتر
سوفت وير وهارد وير
ولو 1% من اعضاء المنتدي محتاجين دكتور فكل اعضاء المنتدي معاهم موبيلات
واي سؤال في عيوب الجهاز انا تحت امركم فيه بس فيه حاجه عاوز اعرفها
هو الاسئله حتكون في نفس الموضوع هنا اظن لو كده الموضوع حيتشعب والاسئله حتتوه في النص ممكن تكون رسائل خاصه او تتفتح مواضيع مثبته لضمان الجديه
-
فكره حلوه وبنائه
وأنا راجل قانون أستطيع الإجابه عن أى إستفسار قانونى خاصة المسائل الجنائيه بإذن الله
وللتعريف أى نزاع توقع فيه عقوبه على المتهم هو جنائى ويشمل ذلك على سبيل المثال
قضايا القتل و المخدرات والتزوير و الإغتصاب و العاهات والضرب والسب والقذف والحوادث وقضايا التموين والغش والبناء وخلافه
-
والله بارك الله في صاحبة الموضوع - فكره كويسه
انا تخصصي في المقاولات و بالاخص شفط المياه الجوفيه من باطن الارض للتمكين من نزول تحت مستوي سطح الارض بعدة امتار لعمل بدروم عماره او اي شئ تحت الارض مد كابلات ، صرف صحي اي شئ
طبعاً محدش حيحتاج الموضوع ده اوي لكن انا قولت اعرض اذ ربما حد يحتاج مساعده :thinking:
-
بصوا يا جماعه العبد لله كوكتيل
1- محامى
2- محاسب
اللى عايز حاجه يقولى
-
افادكم الله
العبد لله
كيميائى و حاليا اعمل كمتخصص فى البترول الخام
و اى خدمة انا فى الخدمة :)
-
جزاكم الله خيرا جميعا على التفاعل و عرض المساعدة :)
انا عن نفسي باشتغل في شركة Recruitment و خبرتي في مجال سوق العمل حوالي 10 سنين و ممكن أفيد في أي استشارات وظيفية أو كيفية كتابة السي في بطريقة بروفيشونال أو قواعد حضور انترفيو وظيفة أو لو حد عايز يعرف سوق التوظيف دلوقتي أخباره ايه و يعمل ايه عشان يبقى كويس و منافس في سوق العمل.. يعني باختصار أي شئ يختص بحياتك الوظيفية.
انا باقترح عمل موضوع منفصل لأي سؤال لأي تخصص.. يعني مثلا لو حد بدأ بسؤال قانوني للأستاذ محمد ابراهيم1 يبقى يتعمل في موضوع مستقل و كل الأسئلة اللي في نفس التخصص تروح على هناك و هكذا باقي التخصصات و في نفس الوقت يتعمل موضوع مثبت يضم روابط لجميع المواضيع في مختلف التخصصات عشان اللي عايز يستفيد من أي موضوع من دول يلاقيه بسهولة زي ما هو متبع في باقي الأقسام في المنتدى.
-
انا صيدلي
اي دواء ناقص
اي استشاره
احنا موجودين
-
انا بالطبع عاشق للاعمال المكملة لانه بيوفر الوقت ونتايجه حقيقى رائعة
وده عن تجربة شخصية لان السنه دى كانت اخر سنة ليا فى هندسة قسم ميكانيكاpower وكان مشروع تخرجى تكييف مركزى لمستشفى الاورام "نسأل الله الشفاء للجميع" ولما جبت الخرائط التفصيلية للمستشفى تهت فى الرموز والمصطلحات لانى ببساطة معرفش اقرى لوحة معمارية فاستعنت بزمايلى بتوع عمارة وفقعدتين كنت صاروخ فى قرايت اللوح والحمد لله طبعا ده وفرلى وقت كتير كان هيضيع وانا فى اشد الحاجة اليه
طبعا انا اخجل انى اقول انى مهندس ميكانيكا(وانا يدوبك متخرج من شهرين) نظرا لوجود من هم يحجبوننى فى الخبرة والكفاءة فى هذا المنتدى وده انا شوفته بعينى فى كتير من الموضوعات ولكن بعد استئذان مهندسين الميكانيكا الكبار اللى فى القسم بقدم مساعدتى للكل
Content Relevant URLs by
vBSEO 3.6.0 PL2