محتاج مساعدتكم يا جماعه انا اول مرة اتقدم وماليش خبرة
السلام عليكم
الموضوع باختصار
اني شفت واحده في شغلها وعجتني كشكل وعرفت كل حاجه عنها
صليت كذا صلاة استخارة
و كلمت والدها ورحت البيت زيارة لوحدي اتكلمت معاها حسيتها غلبانه جدا وفعلا طيبه وبنت حلال
بس خرجت من عندهم مش قادر اخد قرار صراحه حسيت اني ممكن الاقي بنت اجمل كشكل بس سكت نظرا لادب البنت واحترامها
المهم السيد الوالد كلم والدها يعرف طلباته وكدا واتكلموا في الماديات
والدها اتصل عليا وقالي هات اهلك زيارة ودي تعتبر اول زيارة
المهم الوالده راحت معايا والبنت ما كانتش حاطه في وشها حاجه شايفاها امانه اني اشوفها من غير ميك اب
صراحه حسيتها مش زي كل مرة بشوفها فيها ومش حسيتها شاداني اوي غير بطيبتها وادبها هي فعلا زوجه صالحه ومالهاش صوت بشهادة صحباتها حتى
الوالده دخلت حتى ما اتكلمتش معاها لانها يعني مش عجبتها كشكل اوي
المهم انا روحت في حيرة تامه ومش قادر اخد قرار والوالد زعقلي وقاللي انا اتفقت مع الناس وانت اللي قلتلي عاوز الموضوع وانا مش همشي وراك تاني قعدت اقله مش تضغط عليا وسيبني اخد قراري دلوقتي واحنا لسه بينا وبين الناس زيارتين او تلاته احسن ما اظلم البنت بعد كدا حرام عليا فزعل مني وحطني في حيرة اكتر
انا صليت كذا صلاة استخارة تاني ومش حاسس بحاجه بقدم رجل وباخر رجل البنت انا ما شفتش في اخلاقها من نوعيات يمين يمين شمال شمال لكن المرة اللي فاتت فعلا حسيت اني عادي
المهم انا هشوفها مرة كمان علشان اقدر اخد القرار وما اعلقش الناس كتير وما اظلمش البنت معايا
بس السؤال ايه الحيرة اللي جتني بعد المرة التانيه دي مع اني بعد المرة الاولى كنت متحمس
واتعامل ازاي مع الوالد لو شفتها تاني ولقيت نفسي مش مستريح او حسيت اني مش مشدود او اتسرعت
خصوصا ان احنا لسه في مرحلة الزيارات حتى وان كنا اتكلمنا في الماديات
..
انا محتار جدا وحاسس اني عامل زي التايه ومش عارف نفسي عاوز ايه
ليا تعليقين في الموضوع
البنات مالهمش صوت وقطعوا الفاكهه قدامنا بطريقه شيك جدا
عم البنت كان بياكل البسبوسه قدامنا بايده
امهم صوتها عالي طيبه بس صوتها عالي يمكن فرحانه بينا
ابوهم هو راجل البيت وهو اللي ليه الكلمه فيه
دلوني يا جماعه انا في حيرة
انا هشوفها مرة كمان ودي هتبقى اخر مرة وبعدها المفروض اخد قرار
اعمل ايه والمفروض احس بايه ولا ما احسش بايه
الموضوع صعب جدا جدا جدا
ايقاف نهائى لمخالفه القاعده رقم (10) والخاصه بتعدد العضويات
م.ع 5
11/11/2014
11:10pm
