الموضوع: الاسلام يحل مشكلة المواصلات والمرور!!!!

طب ازاي الكلام ده في العالم اللي احنا فيه ده؟

لو وقفت لواحدة ايا كانت وحشة او زي القمر هتفتكرك بتظببت و مهما كانت نيتك سليمة مش هتتفهم كده
لو وقفت لواحد بيقى فيه احتمالين: انه يفتكرك بتتمنظر عليه و يقولك لأ شكرا بقلاطة او يفتكرك مجنون
و الاحتمال التاني انه ممكن يقللبك بذوق في حاجة من العربية او يرفع عليك مطواة و يسيبك في الشارع و ياخد العربية..و لو مؤدب شوية ممكن يقللبك و يسيلك العربية
ده غير ان ممكن يحصل حاجات تانية كتير:
زي انه ممكن حد يطلع عامل جريمة و تلبس با معللم و ياخدوك على انك شريكه
ممكن يكون ارهابي و رايح يفجر نفسه...و القدر بيلعب لعبته و القنبلة تنفجر بدري
ممكن يطلع ريحته وحشة و مبيستحماش و يقلبلك ريحة العربية
ممكن يطلع مجنون و هربان من العباسة و هنا توقع اي حاجة

يا جماعة انا شايف ان العربية دي زي البيت...مكان في منتهى الخصوصية و زي ماينفعش تدخل بيتك اي حد....برضه عربيتك نفس الكلام

الفكرة انا شايفها مش تمام ابدا تحت اي مسمى ايا كان

ربنا يبارك لك وجزاك الله خيرا
موضوع مهم جدا جدا
فعلا فى ناس كتير بتعمل كده
ولازم كلنا بصراحة نعمل كده
بس يكون ليك نظرة فى اللى انت هاتركبه
يعنى ست او راجل عجوز
اسرة معاها طفل عنده ايام او شهور فى عز البرد او الحر واقفين على محطة الاتوبيس
او تاكسى مش محترم مش عايز يقف ليهم والله منظر يحزن
طبعا ماتلاقيش شاب او اتنين عاملين زى الحيطه او بلطجيه وتقولى تكافل
يعنى لازم نذكر نفسنا يا جماعة دايما بالموضوع ده
الموضوع مهم جدا جدا يا جماعة

اه ليه فتحت الموضوع ده ، ده موضوع ملوش مقاييس
اولا انا مع الناس اللى بتخاف ، حيث كانت وصية آباء زملائى ، متركبش معاك حد حتى لو بيموت ، لكن والدى رحمة الله له نظرية تانية ، كان لما بيشوف حد شايل حاجة تقيلة وموش عارف يمشى يوصله ، كانت اخلاقه اخلاق فارس وطبق على كده
اما العبد لله فهى مشكلة فعلا ممكن تتحل كالتالى
1- فى المجتمع المحيط يتم تنظيم الانتقال (حد تكون عارفه يعنى) جيران اقارب اولاد حتة ودول بتكون عارفهم لكن الغرب انت وقدرك
2- انا مثلا بنزل الساعة كذا ورقة على باب العمارة واستعداد للتوصيل حيث ان خط سيرى كذا ، او رايح اوصل ابنى او بنتى المدرسة ، ايه يعنى اما آخذ معاى كام زميل له ولو بالتناوب
3- انا بطبق نظام الفراسة (ممكن مينفعش وتبقى حكاية)
لو عربية متعطلة والشاب او الراجل حايس ومعاه عيلة او زوجته والدنيا ليل (عايز بنزين ماشى نروح نجيب _توصيل لأقرب ميكانيكى ماشى)
لكن فى العموم المفروض تبقى للمعارف ، فى زمن رسول الله (صلى الله عليه وسلم ) كانوا طبعا بيعرفوا بعض واى حد غريب بيبقى ظاهر ، وشبه اسرة واحدة
لكن دلوقت القاهرة 16 مليون ، ينهار ابيض ، يبقى خلينا فى المعارف وكبار السن المطبق عليهم الفراسة وبالتنسيق بين الجيران والاقارب
ساعات بتبقى فيه شوارع غلسة زى المسافة من شارع العرض لحد جامعة الازهر ، وتلاقى الطلبة والطالبات ماشيين لحد مايوصلوا فى الحالة دى ممكن
وربنا يسترها معانا ومعاكوا
انتم عارفين لواتطبفت تلك النظرية للانخفضت المصروفات على الانتقال من 25 الى 50% ، والاسلام عايز رخاء الرعية ، ويقل الطلب على البنزين ، ويقل استهلاك العربيات ، والنفع هايكون للكل ، اللهم جاز عنا رسول الله خير الجزاء

جزاكم الله خيرا
والواحد منا يحاول ينفذ تعاليم الاسلام على قد مايقدر
لانه في مواقف فعلا ماينفعش تطنش فيها
يقول الله تعالى " فاتقوا الله ماستطعتم"
ويقول الرسول العظيم " ما امرتكم بشئ فأتوا منه ما استطعتم"
اما ان الواحد يكبر دماغه على الاخر فده طبعا ينافي مبادئ دين الاسلام
وفي انتظار المزيد من ارائكم...ومواقف ليكوا في الموضوع ده