السلام عليكم.
هو بصراحة التوكيل في المستوى الفني زيه زي باقي التوكيلات .. مش مبهر يعني..-اتعاملت مع توكيل سكودا وبعدين دايو واخيرا كيا-
بس الملحوظات اللي عندي هي ملحوظات عميل بيتكلم عن شكل التوكيل واحساسه بالتوكيل اما الصيانة بتتعمل في اي حته ومفيش اسهل من تغيير قطع الغيار.. انا بالنسبة لي التوكيل استقبال ومعاملة...
- اول ملحوظة هي ان المبنى نفسه صغير ومش أد كدا بالنسبة لمركز خدمة رئيسي (صحراء جرداء).. بقارن بالنسبة لدايو في ابو رواش برضه.. دايو عبارة عن مساحة كبيرة ببوابة خارجية كبيرة وتشجير ومبنى كبير (واهم حاجة سقفه عالي)
- بالنسبة لتوكيل كيا كان في عضو قال مرة عن مهندسين الاستقبال واكلين سد الحنك والموضوع دا صحيح فعلا..
- الشيء الغريب بقى في التوكيل ويكاد يكون غبي.. عاملين مكان استراحة العملاء في البدروم تحت الارض في مكان واسع وارتفاع السقف فيه يقارب ارتفاع الاسقف في بيوتنا !! ومفيش ولا شباك للتهوية غير شباك بعييييد بيفتح على الجراج والباقي جدران جدران .. حاجة غير صحية ابدا.. مكان واسع بسقف واطي يجيب اختناق واكتئاب .. وكمان لما رحت في الصيف كنت قاعد تحت فتحة التكييف ولا حاسس بيها دا غير وسيلة التسلية الا وهي هش الذباب.. (مش عارف دخل منين اصلا) وكمان المسكين مش لاقي حتة يخرج منها ...والغريب بقى ان العربيات معروضة في الصالة اللي فوق المنورة واللي كلها زجاج داير مايدور وبانوراما والسقف عالي ... شيء عجيب جدا
- الكافتيريا تعبانة جدا جدا .. لدرجة اني سألت على مياة الساعة 1 كانت خلصت!! ومينفعش الكلام دا بعد ماتحدفنا في اخر الدنيا.. يعني اللي رايح نصيحة ياخد اكل وشرب معاه...
- لما استلمت العربية كانت مغسولة من بره ومن جوة حالتها يرثي لها.. التابلوة بيج زي مانتوا عارفين وراكب فيها فرش جلد بيج كل دا بالدركسيون بقى مشحم بطريقة مقرفه.. ولما دخلت للمهندس قلت له هي العربية مابتتغسلش من جوا؟ قالي لا طبعا وكأنه بينفي تهمة . قلت طب العربية مشحمة ومهببة من جوا .. نده لواحد قالوا العربية عايزة تنضف من جوا .. الراجل قال للمهندس انا رايح اجيب ناس من الصحرواي عربيتهم عطلت وفضلوا يتكلموا .. مشيت!!
في دايو بيحطوا كيس على الكرسي ويلفوا الدركسيون..
- غير ان موضوع الضمان بيبقى في جدل كتير واول حاجة عندهم انه سوء استخدام وان الحاجة دي مش داخلة في الضمان.. يعني الضمان معاهم محتاج انك تجادل وتقاوح ومتزهقش بسرعة.. و مش هاتغير كل حاجة برضه بس اهو تطلع بحاجة.. بالنسبة لسكودا كنت رايح اغير بيض مقصات ومكنتش اعرف ان العربية في الضمان فوجئت بفاتورة معدية الالف فيها تغيير بيض مقصات وطنابير وتيل فرامل!!! قلت لهم ان مطلبتش تغيير تيل ولا طنابير قالولي كانوا محتاجين تغيير والحاجات دي كلها في الضمان...
حاسس ان التوكيل واخد سمعة من سمعة نصير وخلاص.
الناس لما تتسأل عن التوكيل بتشكر في نصير اكتر مابتشكر في التوكيل,,
شايف الاعجاب بالتوكيل مبالغ فيه شوية
نفسي اعرف فيه ايه مميز!
المفضلات