شقق مشروع دار مصر فى التجمع

**egyptawy2010** · 09-11-2014 10:36 AM

اليوم اعلنوا موقع وسعر شقق التجمع الخامس ايه رايكم هل السعر مجزى وهل المكان كويس

وهل هيبقى سكن راقى ولا مساكن شباب من بتاعة الحكومة

ننشر الأسعار النهائية وتفاصيل الوحدات السكنية بمشروع "دار مصر" اليوم السابع

**tkamal** · 09-11-2014 11:52 AM

متابع

**DreAmO** · 09-11-2014 02:17 PM

انا مستعجب .. ازاي الحكومه بتقول ان الشقق دي بسعر التكلفه !
عايز تفهمني ان شقه 100 متر مكلفة الحكومه نص مليون جنيه تقريباً ( 450.000 جنيه )
طب بأي منطق ولا عقل الحسبه دي

ده انا باني دور كامل في بيت والدي ( طوب وحديد وعواميد وسقف وعمال ورمل واسمت .. الخ ) وكل حاجه واخده حقها .. يعني العمود عمود محترم .. والسقف سمك كبير مش اي حاجه والسلام .. الشغل مخدوم صح يعني في الخامات والكميه

وشطبت الشقه على مزاجي محاره وسيراميك فرز اول وكهربا في كل شبر فيشه نت وتليفون وكهربا ودش واناره وشبابيك pvc .. ونقاشه على كيفي وكرانيش .. الخ الخ
التكلفه الإجماليه للدور 100 متر لم تتعدي ال 100.000 جنيه .. وجايب افضل خامات في كل حاجه .. المسمار كنت بجيبه افضل حاجه

يبقى الحكومه ازاي تبني وتشطب تشطيب حكومي مش تشطيب سوبر لوكس يعني .. والارض ارضها ببلاش كمان
والمفروض انه مشروع ضخم يعني الخامات والعماله بسعر الجمله وتقولي الشقه تكلفتها نص مليون جنيه

على حسبتي انا المفروض الشقه ال 100 متر تكلف الحكومه 50.000 ( شامله المرافق والتشطيب العادي بتاعهم )

باقي الفلوس دي بقى راحه فيييييييين ؟!

**prof2013** · 09-11-2014 04:03 PM

الاسعار دي عايزه واحد شغال حرامي علشان يقدر يشتري

**Karim Alaa** · 09-11-2014 04:17 PM

حسبت سعر الارض يا باشا و التشطيب مش هيبقى عادى بتاعهم دى شقق من غير دعم الاسكان المتوسط غير الاسكان الى بتشوفو فى السلام و النهضه و خلاقه

**Karim Alaa** · 09-11-2014 04:24 PM

يا شباب هو انهى منطقه احسن فى التجمع "شمال منطقة القرنفل شرق امتداد الرحاب" ولا "منطقة الأندلس جنوب الجامعة الأمريكية وغرب منطقة الجامعات." ؟؟

**DreAmO** · 09-11-2014 04:40 PM

المشاركة الأصلية كتبت بواسطة karim alaa

حسبت سعر الارض يا باشا و التشطيب مش هيبقى عادى بتاعهم دى شقق من غير دعم الاسكان المتوسط غير الاسكان الى بتشوفو فى السلام و النهضه و خلاقه

اكيد حسبت .. وموضح ده في الرد بتاعي .. وعارف انه من غير دعم يعني بسعر التكلفه زي ما وضحت في ردي بردو
ايه اللي حضرتك قولته جديد ؟

وعلى فكره الارض المفروض ماتتحسبش .. لان الحكومه مش شارياها من الصين .. دي ارض الدوله ( والدوله اللي هي انا وانت والاستاذه والاستاذ .. الخ ) .. ومع ذلك الارض محسوبه

والتشطيب .. اي ان كان طالما حكومي يبقى عادي .. ولا عايز تقولي الحكومه هتركبلك شبابيك عازله للصوت والاتربه ازاز دبل .. وتركبلك طقم حمام كليوباترا سوبر لوكس وتركبلك شطاف خارجي ايطالي جنب قاعدة الحمام .. واوكرة باب غرفه ايطالي .. وتعملك نيتورك نت في الشقه .. وتركبلك لوحة مفاتيح فينوس .. ولا ايه ولا ايه !

في فرق سعر 400.000 جنيه في الشقه .

**mfe** · 09-11-2014 04:42 PM

ليه تعليق بسيط
الاسعار هي اسعار المنطقة دلوقتي مفيش اي ميزة
اسعار فيلات القرنفل الحالية ٤٢٠٠ جنيه الي ٤٤٠٠ و اسمك ساكن في فيلا دورين مش عمارة ارضي و خمسة
عامة منطقة شمال القرنفل للي معاه الخريطة هي اعلي فيلات الشربتلي و منطقة ممتازة
الاندلس اسكان عائلي اقل في المستوي حبتين
بس طبعا المتطقتين غاليين بالنسبة لاسكان دولة حتي بدون دعم

**Ahmed Anwer** · 09-11-2014 04:50 PM

مفيش تميز لا في سعر و لا موقع ،

اللي يفرق بقه التقسيط المريح ،

المصيبة إن ده هيولع الأسعار أكتر ما هي والعة في التجمع

**DreAmO** · 09-11-2014 04:59 PM

المشاركة الأصلية كتبت بواسطة mfe

ليه تعليق بسيط
الاسعار هي اسعار المنطقة دلوقتي مفيش اي ميزة
اسعار فيلات القرنفل الحالية ٤٢٠٠ جنيه الي ٤٤٠٠ و اسمك ساكن في فيلا دورين مش عمارة ارضي و خمسة
عامة منطقة شمال القرنفل للي معاه الخريطة هي اعلي فيلات الشربتلي و منطقة ممتازة
الاندلس اسكان عائلي اقل في المستوي حبتين
بس طبعا المتطقتين غاليين بالنسبة لاسكان دولة حتي بدون دعم

المشاركة الأصلية كتبت بواسطة ahmed anwer

مفيش تميز لا في سعر و لا موقع ،

اللي يفرق بقه التقسيط المريح ،

المصيبة إن ده هيولع الأسعار أكتر ما هي والعة في التجمع

هو ده اللي عايز اقوله

ان الحكومه بتبيع الشقق وكأنها مقاول بيبيع شقق ويربح منها .. ومش اي ربح .. ده ربح فااحش

ماتقدرش تتكلم مع صاحب عماره لما يقولك الشقه ب مليون جنيه .. وانت شايف انها تسوى نص مليون

هيقولك اذا كانت شقة الحكومه بسعر التكلفه نص مليون جنيه (ودي الحكومه يعني موفره في التكلفه والامور متسهللها في البناء .. وتشطيبها مهما كان حكومي)

اكيد ده هيكون حجه لإي صاحب عماره او شقه في رفع السعر .

معلش يعني بسعر الشقه دي بتاعة الحكومه .. تقدر تشتري قطعة ارض مميزه على ناصيه 100 متر في منطقه نص شعبيه .. مش منطقه ضايعه يعني .. وبينها وبين وسط البلد 10 دقايق بالعربيه

وبنفس السعر تقدر تشتري الشقه اللي على كيفك وتشطبها على كيفك في زايد او اكتوبر .. واللي هيبعلك كسبان فيها .