الموضوع: مين افضل .. Bright Minds (المركز الثقافي للغات) ولا Not Courses (مش كورسات)

حاليا انا بدئت فى نوت كورسيز
ده اول شهر ليا
نوت كورسيز بيؤمنوا ان الكلمات هى الاهم مبيركزش على الجرامر ويمكن مبيجبش سيرته لانهم شايفين ان ده حاجة بتيجى بالتدريج ولازم يدخل الانجليزى فى عقلك اللاوعى
يعنى مش هتلاقى عندهم الحوارات الحمضانة اللى موجودة فى بقية المراكز ويقولك حط ايه قبل ايه ومش عارف ايه بعد ايه مفيش الكلام ده
وانا شايف ان ده الصح لان جربت قبل كده فى مراكز تانية وكانوا زبالة وناس اعرفها حتى راحت المركز الثقافى البريطانى ومعجبهمش
نوت كورسيز بيقولك ان الاجانب مبيستعملوش على مدار حياتهم كل كلمات الانجليزى فقط 7500 كلمة وهو ده اللى بيحاول يعلمه لك من خلال 16 مستوى
هما بيقوله انك لو وصلت للمستوى ال8 هيكونو دخلوا فى عقلك نص ال7500 وهتقدر تتكلم انجليزى بطلاقة لاباس بها
النظام فى نوت كورسيز بييبقى 3 ساعات السيكشن فى 3 ايام اسبوعيا
مينفعش تتكلم بالعربى فى السكشن كله انجلش
النظام بيبقى متقسم = جزء السينما وده بيخليك تشوف مقطع فيلم وتقول هما قالوا ايه
وجزء كلمات وكل كلمة بيخلى كل واحد فى الجروب يقول الكملة فى جملة مع القيام بتمثيل لمعنى الكلمة عشان تثبت فى دماغك
وطبعا فى المناقشة فى الجروب بتختاره موضوع تتكلمه فيه
وفى النهاية تاليف قصة وروايتها
انا الى الان مستريح فى نوت كورسيز ومعايا ناس بتاخد فيه من المستوى الاول
وفى واحد قالى ان كان فى واحد فى المستوى ال14 فى الجامعة الامريكية راح نوت كورسيز طلع فى المستوى ال4
------
فى الحقيقة المكان التانى اللى انتا بتقول عليه ده معرفش حاجة عنه
بس فيه ناس راحت مراكز بير السلم + الجامعة الامريكية + المركز الثقافى البريطانى وشتمه فيهم كلهم الوحيد اللى الناس شكرت فيه بس مجربتهوش كان مركز اسمه برلتس
-----------
سبب انى روحت نوت كورسيز الحظ انهم كانوا عاملين عرض بنص التمن بدل ماادفع 600 فى المستوى ادفع 300 فقط فروحت وحجزت 6 مستويات
امتحان تحديد المستوى عندهم هو اللى صعب حبتين متحاولش تذاكر جرامر ولا الكلام ده كله لانك مش هتمتحن فى ورق
لان ببساطة الامتحان عبارة عن انك بتحط سماعة فى ودنك وبيتقرى عليك السؤال بالانجليزى وبتلاقى الست بتقول مكان النقط Space وبعد كده بيديك 5 ثوانى تختار الاجابة الصحيحة وملحوظة السؤال بيتقرى عليك فقط مبيظهرش غير الاختيارات فقط على الشاشة بيبدء الاختبار من المستوى ال8 لو لاقيك اقل بيقعد ينزل بيك فى الاختبار لحد مايشوف انتا مستواك فين بالضبط ولو عديت المستوى ال8 بيطلع بيك
وانا اما سئلت المسؤولة هناك عن الاختبار ده ومدى مصداقيته قالتلى ان هما بيجيبه من برة وعلى احدث الاساليب العلمية
ونصيحة اخيرة متضيعش وقتك والا عمرك ماهتتعلم خد الخطوة وابدء من دلوقتى وبلاش كسل
وممكن تستنى لو فى عروض جديدة من Not courses وتدخل فيها
ملحوظة : النهاردة اخر يوم فى عرض ال4 مستويات ب1000 جنيه يعنى المستوى ب250 ده يعنى لو قريت ردى ولحقت تروح تسجل

ملحوظة (نوت كورسيز)- مشكلتهم المواعيد يعنى ممكن تضطر تستنى شهرين لو عايز ميعاد على مزاجك
ده غير القواعد زى مينفعش تتاخر اكتر من ربع ساعة والا مش مسموح لك تدخل السكشن وكده يعنى

المشاركة الأصلية كتبت بواسطة secret-man

https://www.facebook.com/notcourses2

انا عموما قلت اللى حصل
صراحة انا مبؤمنش باى حاجة من الصفحات دى
انا ايه اللى عرفنى اذا كانوا فعلا بيهاجموا واتنصب عليهم ولا دول ناس لهم مصلحة فى تشويه نوت كورسيز ولا ايه
-
ثانيا: مفيش مكان فى مصر هيرجع الفلوس اللى اتدفعت واى حد هتقوله كده هيقولك اخبط دماغك فى الحيط وملكش حاجة عندى يعنى الموضوع مش حكر على نوت كورسيز بس وحصلى الموضوع ده فى اكتر من مكان بلا مبالغة يعنى
-
ثالثا: ممكن الهجوم يبقى ل500 سبب منهم 450 سبب تافه زى ناس مش مقتنعة بالفكرة الخ
-
رابعا : لازم صاحب الموضوع يلف بنفسه ويشوف لان دى حاجة بتفرق من حد للتانى فيه ناس بقالهم فى نوت كورسيز ب7 مستويات
وزى ماقلت فى ناس اشتكت قدامى من المركز الثقافى البريطانى و الجامعة الامريكية
اما لو عايز حاجة مضمونة 100% اعتقد مفيش قدامك غير برلتس
وزى ماقلت انا السبب اللى خلانى اروح اجرب هو العرض مش اكتر
-
خامسا:بالنسبة للناس اللى بتنتقد ان تحديد المستوى عبارة عن استماع و الجرامر مش بيتم التركيز عليه
اعتقد ان نص مشاكلنا اننا مبتعرفش نسمع اصلا 90% من الشعب المصرى مبيعرفش يطلع كلمة واحدة اما بيتفرج على فيلم او حتى يعرف النطق واحنا اما اتكلمنا عن النقطة دى مع المسئوول هناك قال انه طبيعى يقيس الدائرة الكبيرة اللى هى اهم دايرة انتا ممكن لو قابلت اجنبى واتكلمت هيعرف يفهمك حتى لو الجرامر عندك مش واضح لكن مثلا المصيبة بقى انك متكونش بتعرف تسمع ,واعتقد ان لو حد وقف يتكلم مع اجنبى مش هيقعد يفكر هيحط الجرامر ازاى وايه قبل ايه وايه بعد ايه ولا هيحط A ولا هيحط An
----
اخيرا: بكرر نصيحتى انزل وشوف وجرب لان المسالة بتختلف من شخص للتانى فى واحد يقولك لا انا ادفع فلوس يبقى اخد شهادة (الفكر التقليدى) واحد تانى يقولك انا ميهمنيش غير النقطة الفلانية واحد تانى يشتكى من النقطة العلانية وكده ولو عايز حاجة الاغلب شكر فيها يبقى برلتس

صاحب المكان سمعته منيلة بصراحة وظلم ناس كتير، وكان عامل موضوع نو بطالة ونصب على الطلاب كمان.

بعيدا عن الاختلافات حول مصداقيه المراكز من عدمها
انا بتفق تماما مع الاخ zorg في ان 70% من الانجلش كلمات وال 30% الباقين بييجوا مع الممارسه
انا لاحظت الفرق ده في مشاهده الافلام الاجنبي كل ما بحفظ كلمات اكتر بقدر افهم جمل كتيرة في الافلام وبعرف مخارج الحروف بتاعتها
وافضل وسيله لتعلم الانجلش هي مشاهده افلام اجنبي بالترجمتين العربيه والانجليزيه مع بعض يعني الكلام اللي بيتقال بيتكتب ع الشاشه + الترجمه العربيه
وبالنسبه للناس اللي بتقول ان الجرامر مهم اه هو مهم في حاله واحده لو هتدرس في امريكا او بريطانيا هتحتاج تكتب تبع القواعد
لكن لو عايز انجلش للتعامل مع الناس يبقى كلمات + ممارسه
انتهى ..........