الموضوع: برجاء التسعير

المشاركة الأصلية كتبت بواسطة shark12345

اوتوماتيك
43000 كم فقط

68000ج

المشاركة الأصلية كتبت بواسطة shark12345

شكرا لرد حضرتك بس في اعتقادي في ظل الاسعار الحاليه ممكن تعدي الرقم ده وشكرا ليك

اكيد
وليه لأ

المشاركة الأصلية كتبت بواسطة a7mad_mo7amad6

متبعش باقل من 75

ممكن برده

السوق اسعاره غريبة اليومين دول

زميا المنتدى العزيز البروتون جين 2 تحديدا لها سيستم معين فى السعر و متوقف على عوامل معينة منها حاجات عامة بتنطبق على أى عربية و حاجات خاصة بها و عوامل خارجية زى الطبيعة الغريبة للسوق المصرى و هى كالتالى
أولا: الموديل و ده بيفرق جدا فى الجين و كل سنة لها تمنها لأنها أصلا أولها فى 2006 و بعدين العيوب اللى ابتدت بيها و اختفت سواء كانت عيوب ميكانيكية أو عيوب أوبشنز بترمى على الأسعار برده و باختصار فى النقطة دى هتلاقى كل سنة من أول 2006 لحد 2013 كل سنة و لها رينج سعر للمانيوال أو الأوتوماتيك.
ثانيا: العربية مش من العربيات المسجلة ريسيل resale ودى عربيات مسجلة بالاسم فى السوق المصرى و لا يتعدوا أربع أو خمس أنواع و أى حاجة براهم تلاقى الشخص بيقولك يا فندم دى ما بتتباعش بكل جهل.
ثالثا: لأن معظم ملاكها شباب و الترويش فيها بيبان فتلاقى الحاجات اللى بتقلل السعر فى العربيات التناية ما بتأثرش فيها بنفس الدرجة يعنى مثلا تغيير اللون اللى بيخسف الأرض بأى عربية ما بيفرق بنفس القوة مع الجين و ده عن تجربة شخصية قدامى.
رابعا: رغم إن الاسبورت باكيدج كان أشيك و أحلى و أغلى ما لوش أى تأثير فى تسعيرها له تأثير فقط فى التفضيل عند المشترى زيه زى اللون بالظبط و زى شكل الجنط.
خامسا: ماشية كام كيلو دى الناس بتخاف من المسافات الطويلة بس مقارنة بالموديل يعنى المعروف حسب الضمان و الاستهلاك الطبيعى إن السنة بحوالى 20000 كم فلما تبقى مثلا 2008 و عاملة 120000 يبقى رينج طبيعى بالنسبة للاستهلاك لكن للأسف لو ما مشيتش و لا ميل جنب إنها موديل قديم ده بيبقى غير مؤثر إطلاقا على قرار المشترى يقولك أهم حاجة حالة العربية مش مشيت كام و وقفت كام.
معلش إنى طولت عليك بس أنا اتسحلت الفترة اللى فاتت و أنا ببيع بروتون بيرسونا 2009 مانيوال بعد حادثة ربنا يحفظك انت و باقى الأعضاء و يبعد عنكم الحوادث و اتسحلت تانى و أنا بشترى جين 2010 أتوماتيك و جبتها ب 76000 على فكرة
عربيتك تعمل طبقا للسوق من 68 ألف زى ما العضو Carrier قالك لحد 70 ألف ممكن تزيد ألف كمان حسب زبونك و نضافة عربيتك ككل بس ما تقلش و أكتر من كده صعب شوية لأن من أو 2009 الديا اختلفت بصرف النظر عن مثبت السرعة و الساعة الأنالوج و جراب النضارة (الحاجات الوحيدة اللى اختفت من العربية فى 2009)
آسف إنى طولت عليك و أتمنى أكون فيدتك و يا رب يوفقك لبيعها بالسعر اللى نفسك فيه

مرة تانية آسف للإطالة و ممكن لو حابب أشوفلك زبون لها تحت أمرك ناس كتير من ساعة ما أشتريتها تانى نفسها تجيب زيى و فى فعلا 4 عندى فى الشركة جابوها و 7 كمان بيفكروا