الموضوع: تجربة قيادة اوبل إنسيجنيا بعد إستخدام ٢٠٠٠كم

المشاركة الأصلية كتبت بواسطة mariachi

مش هطول عليكم أنا معايا التوب لاين وأنا ركبت أغلب العربيات الألماني في أخر ١٠ سنين زي مرسيدس e كلاس ٢٠٠٣ و c كلاس ٢٠١٠ و جيتا و باسات و bmw الشكل الجديد ٢٠١٤ و الشكل القديم ٢٠١٠ و x3 ٢٠٠٩ فالحمدلله عندي خلفية كويسه عن العربيات الألماني باختلاف الماركات والأحجام.

ندخل فالموضوع على طول; أول حاجة هنتكلم عليها كالعاده هي التصميم الخارجي إللي هو أول حاجه العين بتشوفها; بصراحة أنا حبيت شكلها من أول مره وماكنش في تردد خالص و ده طبعاً أذواق بس تصميم الهيكل إللي شبه منفوخ ده بيدي إحساس رياضي قوي و تصميم الفوانيس الاماميه والخلفيه بصراحة ممتاز ده غير تكنولوجي الإضأه الأمامية، النواكل كامله في العربيه (حوالين الزجاج الجانبي كله و كمان حوالين الفوجات والشبكه الاماميه وفي الشنطه والأكر كلها) مدي شياكه للعربيه مع الزجاج الجانبي والخلفي الغامق، الجنط مقاس ١٨ و هو يدوبك فعلاً على العربية علشان العربيه فعلاً ضخمة (أكبر من c180 و bmw 316) رسمة الجنط كلاسيك شوية بس مش متعارضة مع تصميم العربيه، في رأيي العيب الوحيد إللي في التصميم الخارجي إن الإشارات الجانبيه مش في المرايات زي الترند الجديد!
تقييمي ٩/١٠

التصميم الداخلي والكماليات فعلاً حدث فلا حرج! العربيه واسعه جداً من جوه والشنطه محترمه جداً (٥٠٠ لتر) تصميم الكونسول فعلاً من أحلى التصميمات إللي شفتها فالفئه ده و يخليك ماتنبهرش بأي عربيه تانية!، الخامات الداخليه كويسه جداً بس مش هقدر أقول ممتازه علشان أنا شفت أحسن من كده بس مش أقل من أي عربيه في سعرها و كمان شايف انها أحسن من خامات ال-bmw 316 الشكل الجديد بحكم اني ركبتها كتير! الفرش الجلد الجملي أكتر من رائع والكراسي مريحة جداً جداً جداً (تجربة قياده من اسكندريه للغردقه) الكماليات فعلاً كامله و مش هتحتاج تفكر تركب أي حاجه، العيوب من وجهة نظري:
مفيش زرار تفتح الشنطه من جوه (زرار خارجي أو من الريموت)!
- تكييف تاتش و ده مزاولة شوية بالذات لو مركز فالطريق
- مفيش gps أو كاميره خلفية
- تقييمي ٩٫٥/١٠

نيجي بقي لحاجة بتهم شباب كتير وهي التسارع والثبات:
زي مانتو عارفين الموتور ١٦٠٠ تربو ١٧٠ حصان عزم ٢٦٠ نيوتن و طبعاً انتو متخيلين قوة الموتور ده عامله ازاي!، بصراحة التسارع ممتاز و لولا إن العربيه تقيله (تقريباً ١٦٠٠كجم) ماكنتش هتعرف تتحكم فيها :) و هي بتمشي بنزين ٩٢ عادي بس لازم يكون نضيف، الفتيس ٦ سرعات و ناعم جداً بصراحة و على فكرة العربيه ٢ شكمان! العفشه ناعمه جداً مقارنةً انها جنت ١٨ و طبعاً ثبات الألماني الرهيب بلس الجنط ١٨ و ١٦٠٠كجم فمافيش كلام على الثبات. العيب الوحيد فالجزء ده إن العربيه سفاحة بنزين و ده راجع لوزنها التقيل أعتقد!
تقييمي ٩٫٥/١٠

أخر حاجه هاتكلم عليها هي العزل والفرامل ودول أكتر حاجتين مش بمستوى العربيه بس مقدرش أقول انهم وحشين بردو بس عادي جداً زي أي عربية بذات بعد الإنبهار بالعربيه بتبقى تطلعاتك عليت أوي!
تقييمي ٨/١٠

تقييمي العام للعربيه ٨٫٥ - ٩ /١٠

يا رب أكون واضحت على قد ماقدر و أكون أفدتكم، أنا عارف إن التقرير تعبان و مفيش صور و ممل بس أنا ماليش والله فالكلام ده و معنديش وقت كمان أنا أسف، بس حبيت أدي العربيه حقها و كمان أوضح للناس إللي مقبله على الشراء و محتاره والقرار ليهم فالأخر طبعاً. شكراً

انا ضيفت لك تقريرك فى موضوع الاوبل انسجنيا المثبت ﻷنو شامل عن العربيه والف شكر وعايزينك خطوه بخطوه هنا