الموضوع: قصتى مع اسبرنزا a620

الاخوة الاعزاء بعد التحية وسلام الله عليكم
الموضوع ممكن يكون طويل وممل شوية بس انا كتبتة ليكم للاستفادة ولعلى افيد احد باى معلومة يكون مر ةبنفس التجربة اللى انا لسة حتى الان متحلتش
انا اشتريت عربيتى a620 موديل 2007 وكانت عاملة حوالى 35000 وبامانة تحفة فى كل شى ثبات وقوة واداء ممتاز وتكييف رائع وكاسيت بسماعات محترمة وراحة فى القيادة دة بامانة بعدها لاقيت العربية طبعا 2000 سى سى واستهلاك بنزين عالى وانا مشوارى مش بسيط لشغلى فوق 70 كيلو رايح جاى مع الزحمة طبعا الاستهلاك بيزيد قلت اقلبها غاز وفعلا بعد دراسة الموضوع والتفكير توكلت على الله وركبت الغاز طبعا خسرت جزء كبير من الشنطة اللى كانت عاملة زى اوضة النوم فى الوسع بس برضة شغالة عادى وطبعا الاسطوانة تقيلة قمت معلى العربية من وراة فظبت الاداء والحمد لله الاستهلاك فى الوقود اتضبط بفضل الغاز والعربية برضة زى الفل وماشى الحال المشكلة فين بقا اقولكم المشكلة بدات معاى لما فكرت اركب جهاز حماية من السرقة يفصل العربية لما اركنها علشان السرقات اللى كانت منتشرة ساعتها وكانت دى بداية الازمة بتاعتى البية الكهربائى العظيم الله لايسامحة اثناء تركيبة للجهاز طبعا مقليش حاجة من دة كلة انا عرفت بعد كدة عمل اية عمل قفلة ادت الى ضرب السوفت وير للكمبيوتر وطيرت اجزاء من الغاز اسمها الاستاب بيعوض السرعة للموتور فى تشغيل التكييف وكدة وبصراحة بهدل الدنيا طبعا انا رحت واخد العربية لشركة الغاز غيرولى القطعة بتاعة الاستاب ب 500 جنية ولكن بعد استعمال اكتر من سنة والسيارة فى النازل مرة يقولولى حساس الايدل مرة الكرنك مرة الاير ماس والعربية تبطل لوحدها ومبرجلة وتفصل مع تشغيل التكييف وننضف الايدل وترجع تانى وهكذا ...... وانا مش عارف اية السر لحد مزهقت ووديتها عن طريق اخويا لواحد متخصص فى الاسبرنزا فى فيصل طلع الكارتة بتاعة الكمبيوتر لاقها متبهدل ومتلحم وفيها اى سيهات مش صح طبعا البية الكهربائى لما ضرب الكمبيوتر عمل كدة ولم الدور وركب وقال صاحب العربية مش هياخد بالة المهم الراجل غير اى سيهات وركبنا تانى وبعد التجربة احسن بس برضة بتبطل وغالبا الكمبيوتر باظ وعايز واحد جديد ودة لحد دلوقتى انا مستنى الرد النهائى منة وادعولى انا والله حزين على قلة الضمير والناس اللى مش بتراعى ربنا فى حاجة الناس معلش انا طولت عليكم بس كنت عايز افضفض معاكم

بعد تجربة الكمبيوتر او الكارتة بلغة الصنيعية العيب كما هو وركبنا الكارتة بتاعتى فى عربية زيها فاشتغلت تمام اذن المشكلة مش فى الكمبيوتر خدتها الى مركز المتحدة للصيانة وبصراحة ناس محترمة جدا وبشوشة وكل الطاقم بيبتسم فى وشك واكيد هعمل عنهم تقرير يديهم حقهم بعد مانخلص بس من مشكلتى دىة فى المتحدة غيرو حساس الكامة وبرضة نفس العيب ثم الايدل وبرضة نفس العيب وطبعا دة كلة بعد مااتحطت على الجهاز ومداش اى عيب او مشكلة ما المهم الوقت اتاخر على ومردتش اضغط على الشباب بتوع المتحدة وطلبت منهم انهم يراجعو براحتهم على كل شى وربنا يسهل وتتحل المشكلة بتاع فصل العربية وانها بتبطل منى بعد فترة ومستنى منهم تليفون يارب سهل الحال