الموضوع: ايه احسن سمك مشوي وفيليه ؟؟

المشاركة الأصلية كتبت بواسطة almohaor

تمام يا اسلام باشا ده عند ولاد عمنا البورسعيدية ونضيف عليهم احنا السوايسة
اسماك البحر الاحمر لايعلى عليها الغنية بالفسفور واليود والمعادن وافضل من اسماك البحر الابيض بكتيييييييييييييييييييييي ير بالاضافة الى ماسبق مثل:-

الحفارة والاس والنقط مقلى ومشوى للاحجام الكبيرة
البلاميطة والتونة مشوى فى الفرن بعد التنظيف والخلطة وياسلام لو كان بنار الخشب زى زمان
الكسكمرى العريض الاخضر والمبروم الازرق مشوى وقلى
وكمان بنسلقه على البخار لعمل المكريل وهو افضل من المعلب المستورد
ولن تشعر ابدا بطعم الزفارة اللى تحسها فى الماكريل المعلب
الكشر والشعور والمحسنى وقشر بياض مقلى وكمان شوربة حمرا
السيجان والخنزيرة والرقد مقلى وشوربة بيضاء
الخرمان والزرقان مقللى وشوربة بيضاء
القرش والحوت صيدية
الجلامبو السويسى مشوى وصيدية واه من الجلامبو النتيات
الكاليمارى محشية بالخلطة مقللى وبالخل والثوم
السوبيا مقللى وبالخل والثوم وصيدية
الحارت السويسى مقللى وبالخل والثوم
الباغة مقلى ومشوى وبالخل والثوم
السهلية السويسى احلى من البورى مشوية
المرجان السويسى ابو قتب الكبير مشوى والصغير مقللى
الصرع ابن عم المرجان مقللى ومشوى
المحاريات السويسى زى اللوجز والسريديا مشوى والقوقع وبلح البحر واالبوصر.. سلق
ولازم ولابد من سلطة طحينة بالثوم والشطة والليمون معاهم وماتسالش ليه فالطعم حكاية
الصورمباء نوع من لحم المحاريات المجفف على حرارة الشمس والهواء
ده بقى فاكهة البنات ووحمة الستات ويؤكل قطع صغيرة ويمضغ كاللبان وطعمه حكاية تانية
سمكة الصندوق وهى سمكة احفورية يعنى من قبل خلق الانسان
سلق وشوربة بيضاء وهى لذيذة جدا
البراكودا مقللى وصيدية
سمكة الحداية... صيدية ... ولها زيل طويل كالسوط والضربة منه مؤلمة وقد تجرح الجسم
كفاية عليكم كده احسن البحر قرب يفضى و عشان حرام ريقكم مايجريش كتير

السوايسة اولاد البلد موش الوافدين المقيمين لاتاكل او لايقبلوا او نعزف عن اكل ...الشبار او البلطى او القراميط والتعابين لاسباب وجيهه وليس بطرا فهى نعمة من ربنا ولكن
لانها تنمو فى الترع والمصارف الملوثة وتاكل الجيف وكمان تنمو فى المزارع السمكية ويتم اطعامها بالهرمونات ومخلفات ذبح الدواجن بعد ان يتم تعفينها وتتحول لدود يلقى للسمك ليتغذى عليه يعنى سمك الشخرم الصغير الشعبى ابو خمسة جنيه الان افضل من اى سمك اخر نيلى
كمان قد يتم صيد هذه الاسماك برش المبيدات على سطع المياه او صعقها بالتيار الكهربى لبعض الصيادين عديمى الضمير
وكمان لان طعم اسماك البحر افضل من طعم اسماك المياه العذبة
والسوايسة ولاد البلد شطار فى تجهيز المأكولات البحرية
وعمار ياسويس

طيب حافظ على شعور اخوانك فى الاقاليم اللى مبيوصلهمش اسماء الادويه دى

ياريت بقى لانك سواحلى وبهدلتنا كده صوره السمكه لو امكن مع اسمها لاننا منعرفش غير اسم كم سمكه وياسلام لو نزلت حاجه جديده سوق السمك عندنا عرفونا بالله عليكم
انا بعز الاسماك جدا لانى اصلا مليش فى الفراخ واللحوم

المشاركة الأصلية كتبت بواسطة محمد يوسف

البلطى ملك الأسماك ؟؟؟؟

أكيد بتهزر يابو أسر

لا مش بهزر :)
مفيش حد مش بياكل سمك بلطي ولو مرة شهريا وهو السمك رقم 1 في مصر والأكثر إقبالا والأكثر بيعا ولولا إنه ملك الأسماك مكنش بقت ليه الشعبية الرهيبة دي وموضوع السعر الرخيص مش هو السبب لأن في أنواع كتيرة أرخص منه ومش عليها إقبال زي البلطي وأنا شخصيا أفضل كيلو بلطي ب15 ولا 20 جنيه على كيلو جمبري ب160 جنيه
لكن في المقابل ناس كتير وأنا منهم ممكن يعدي عليا السنة والسنتين مكلش لا بوري ولا ماكريل ... إلخ
دي قناعتي الشخصية ممكن حد يخالفني فيها مش مشكلة بس أنا مهما جربت من أنواع سمك مش بستطعم سوى البلطي

ازاى اعرف الجمبرى السويسى من الجمبرى التانى
فيه جمبرى لونه مشمشى عاى احمر
وفيه رمادى
مين الافضل

اطالب الادارة بحذف هذا البوست البشع واعدام كل اللي كتبو فيه
هو فيه ايه ؟؟؟؟
هو معادش فيه رحمة خالص
هو انتو معندكوش اخوات جعانين ولا عاملين ريجيم
عمالين توصفو ف السمك وايشي مقلي وايشي مشوي وايشي صيادية وايشي جمبري واشي بحر احمر وايشي سي فود بدون ادني مراعاة لمشاعر الناس
حرام عليكم ده كأني قاعد في حلقة السمك ولا عند سي جل ولا قدورة
هو ح يبقى انتو والريجيم علينا
كدة مش ناقص غير تقولولنا الحلو ايه
تورتة ولا ام علي ولا كنافة بالمانجة
يعني عاوزيننا نقرأ كل ده وبعدين ناكل خضار سوتية بالشوكة ولا تونة من غير زيت
جرررررررررررررررررررررررر رررر