الموضوع: صيانة ال50000 للافيو بالتوكيل

السلام عليكم جميعاً
قولت انقلكم تجربتى عن صيانة ال50000 و هى زى ما انتم عارفين صيانة مهمة جداً
كان بقالى فترة حوالى سنتين (20000 كم) ماروحتش التوكيل -الا فى مشكلة بخصوص التكييف و كنت باعمل الصيانات البسيطة (تغيير زيت . فلاتر. تيل ) عند ميكانيكى قريب منى

المرة دى قررت انى اروح التوكيل فرع الطيران لانى غير ان السيور هتتغير كنت عايز اطمن على العربية كلها ..

حجزت قبلها بيومين و روحت الخميس امبارح ... الاستقبال من المهندس كان كويس و قالى احنا هنغير طقم السيور كلها و الشدادات و طلمبة المياه و الصيانة دى لوحدها تكلفتها 2500 جنيه غير طبعاً مايستجد من حاجات تانية .. قلتله ماشى

بعد نصف ساعة تقريباً قالى ان العربية محتاجة طقم اسلاك بوجيهات و فلتر هواء و فلتر زيت و غطاء قربة الفرامل (كان مشروخ) و تغيير زيت الفرامل و اويلسيل كامة امامية مع تغيير زيت الموتور بموبيل 1 و تغيير زيت الباور و التكلفة تقريباً 4500 جنيه !!!!

ماكنش فى حل غير انى اوافق .. كلها حاجات مهمة و لازم تتعمل ! و الحمد لله انى عامل حسابى فى الفلوس

الصيانة اخدت حوالى 4 ساعات و الفاتورة كالاتى :
قطع الغيار :
.سير كاتينة 185.45
.سير دينامو 133.64
بلية كاتينة 405.45
.شداد سير الدينامو 307.27
ترموستات 47.27
اويل سيل ترموستات 3.64
طرمبة مياه 310.91
اويل سيل 3.46
مياه تبريد اسيديليكو تركيز 50% 138.64
طقم سلك بوجيهات 237.27
زيت باور 51.82
الاجمالى : 2.332.96 جنيهاً !!

المصنعيات :
صيانة كل 50000 348.00
تغيير زيت الفرامل 48.00
تغيير اسلاك البوجيهات 60.00
نغيير اويل سيل كامة امامى 276.00
تغيير شدادة سير الكاتينة 132.00
تغيير شدادة سير المحرك 48.00
تغيير طلمبة المياه 240.00
تغيير زيت الباور 72.00
تنظيف مجمع حقن الوقود 60.00
الاجمالى : 1.320.00 جنيهاً !!!!
بالاضافة الى 300 جنيه زيت موبيل 1

المهندس قالى حاول تكلم مدير الفرع يعملك خصم .. روحت كلمته فعلاً و الراجل كان ذوق جداً و عملى خصم 10% على المصنعيات و 10% على قطع الغيار يعنى حوالى 370 جنيه .. و دفعت 3946 جنيه بس !!!!!!!

بصراحة تكلفة كبيرة لكنى حاسس و كأنى جددت العربية من تانى و ان الحاجة اتعملت صح ... طبعاً العربية فاقت ، السحب بقى احسن ، و الفرامل بقت على الشعرة..

اتمنى انى اكون افدتكم . و كل صيانة 50000 و انتم طيبين .