بصراحه يستاهل اللي عملته فيه

**mohamed_rhem** · 30-10-2008 10:30 AM

كان رد فعل عنيف جدا مني رغم اني مسالم ومنذ 10 سنين بعتمد علي سياسه ضبط النفس حيال اي حد يستفزني
لكن بدون اي مقدمات وفي لحظه تخرج عن شعورك وتتصرف تصرف انت نفسك تبقي حزين مجرد انك عملت كده
في خريف 1997 قررت وبعد عده اصابات خطيره نتيجه تدريبات الكونغ فو الابتعاد تماما رغم تحقيقي ترتيب علي الجمهوريه
فقررت الا استخدم القوه تجاه اي مخلوق واتذكر قدره الله عز وجل
انا بس جبيت ابدأ بالمقدمه ده علشان محدش يعتقد لوهله اني متهور او اتباهي في اظهار القوه تجاه اي شخص لكن لنا وقفه حقيقيه هنا
بعد اللي انا عملته واللي حذكره تفصيلا انفا
فكرت وقولت اللي بيقتل احد اكير تغيب عن الوعي للحظات ولما بيرجع اكيد بيكون ندمان
انا لو كنت فكرت اكيد كنت حتصرف بعقلانيه
انا بس حبيت انقل اللي حصلي علشان تدي نفسك فرصه ولو لثانيه علشان الشيطان ميدخلش
انهارده وانا جاي الشغل وانا في شارع النزهه وانا جاي من عند سنترال الماظه وماشي ولاقيت سواق نص نقل
مشغل نغمه ولا متعرفش بيلحن اغنيه بكلاكس عربيته وعمال يدوس في الثانيه عشر دوسات
وسعتله السكه مع انه مكنش ورايا مباشره وكان في الحاره اللي في النص سبقت واديته الشمال فاضي تماما مكان يقضي 10 عربيات
ورفعتله ايدي وصاحبنا الطريق فاضي وبرضه عمال يلحن بصراحه انا كنت صدعت وقررت احسسه انه بيعمل حاجه غلط
رحت داخل تاني في الشمال وشديت ولما قرب روحت مفرمل ومتابعه في المرايا
لاقيت صاحبنا كأنه كان نايم وفجأه استيقظ
المهم فوقته بيحاول يعديني من اليمين
روحت كاسر عليه تاني ولما كسرت ناس كتير فراملها صرحت والطريق شبه وقف
المهم طلعت منه والمفروض انا ادخل شمال شارع سيتي ستارز
وهديت راح شاتم
وقفت وقولتله انت بتشتمني انا
قالي ايوا انزل يا ابن كذا.......
روحت نازل ورايحله حاولت افتح بابه لاكنه كان مقفول
تقريبا علي ما نزلت من عربيتي وروحتله او هو كان قفله اصلا
حاول يمد ايده روحت زانقه والكمته لكمه معرفش حاجبه اتفتح من الدبله اللي في ايدي الشمال ولا من شده الكمه
وناس نزلت تقولي حرام عليك
قولتلهم انتم متعرفوش هو قال ايه
وركبت عربيي وانا دلوقت في الشغل
بصراحه الواحد يتعلم حاجتين
مهما كان احنا برضه بشر ومفيش حد مبيستفذش متقولش حمسك اعصابي
التروي وعدم التهور واخد فرصه للتفكير كي لا يسيطر عليك الشيطان ويكون تصرفك رد فعل مش نتيجه تفكير
حاجه لي ملهاش دعوه بالموضوع خاصه بي انا
الواحد لسه عنده شويه لياقه وسرعه بعد اكتر من 10 سنين عدم تدريب

**tarekkasaby** · 30-10-2008 11:35 AM

انا عارف احساسك ده لما الاستفزاز والغلط يبقى زياده عن اللزوم بتبقى عايز تاكله

بس احساسك بالذنب فى طريقتك لسرد الحكايه
بيأكد انك شخص محترم و وان دى مش طبيعتك
استغفر ربك كتير و حاول تنسىالموضوع

**شريف** · 30-10-2008 11:41 AM

سياسة الغاب و الاقوى بياكل الضعبف بقت عادى فى البلد دى
لازم يتعلمو درس

**الطنطاوي** · 30-10-2008 11:58 AM

عن أبي هريرة رضي اللّه عنه أن رسول اللّه صلى الله عليه وسـلم قال: "ليس الشديد بالصرعة إنما الشديد الذي يملك نفسه عند الغضب ".

وقد روى أنس رضي اللّه عنه "أن النبي صلى الله عليه وسلم مر بقوم يصطرعون فقال: ما هذا؟ قالوا: فلان ما يصارع أحداً إلا صرعه، قال: أفلا أدلكم على من هو أشد منه؟ رجل كَلّمه رجل فكظم غيظه فغلبه وغلب شيطانه، وغلب شيطان صاحبه ". رواه البزار بسند حسن.

**mohamed_rhem** · 30-10-2008 12:42 PM

شكرا يا استاذ طنطاوي علي التذكره الجميله ده
انت جايب الحديث بالسند
نفعنا الله واياكم جميعا وجعلنا من الكاظمين الغييظ والعافين عن الناس
ابو اياد وعبدالرحمن

**aif** · 30-10-2008 01:15 PM

هو طبعا احنا كلنا بشر ولنا طاقة وقدرة محدودة علي التحمل .....
لكن برضه .... لازم يكون عندنا صبر اكتر ....
انت كان لازم تتحكم في اعصابك اكتر من كدة ..... مش قصدي لما شتمك .... قصدي من الاول ..... يعني كان ممكن مثلا تهدي شوية وتخليه يعدي و ويبعد عنك بالكلاكس المزعج بتاعه ... يمكن هو فرحان لسبب ما ... ودي طريقة تعبيره .... يعني بيزغرد وهو ماشي .... دي طريقة تفكيرة
لما تلاقي النوعية دي .... هدي سرعتك وخليهم يعدو ويبعدو عنك .... ده اسلم حل لأن البعد عنهم غنيمة

{الَّذِينَيُنفِقُونَ فِيالسَّرَّاءوَالضَّرَّاءوَالْكَاظِمِينَالْغَيْظَوَالْعَافِينَ عَنِالنَّاسِوَاللّهُيُحِبُّالْمُحْسِنِينَ } (آل عمران: 134)

عَنْ معاذ بن جبل رَضِيَ اللَّهُ عَنْهُ أن النبي صَلَّى اللَّهُ عَلَيْهِ وَسَلَّم قال:من كظم غيظا وهو قادر عَلَى أن ينفذه دعاه اللَّه سبحانه عَلَى رؤوس الخلائق يوم القيامة حتى يخيره مِنْ الحور العين ما شاءرواه أبو داود والْتِّرْمِذِيُّ وَقَالَ حَدِيثٌ حَسَنٌ.

القصة اللي ح احكيها دي دايما يحكيها واحد راجل كبير لأبنة ...ابنة ده صاحبي .... قد تكون قصة غير واقعية .... لكن فيها عبرة جميلة اوي
واحد تاجر كان نايم وبيحلم ... شاف في الحلم ان واحد راجل دخل المحل بتاعه وقاله بكام دي ...
قاله بكذا
انت راجل حرامي دي ارخص من كدة بكتير برة
روح اشتريها من بره
لكن انت راجل حرامي و غشاش و ... و..... و قعد يشتم الراجل بشكل بشع
التاجر ما قدرش يستحمل ... راح رافع ايده وضربه قلم علي وشه ....
الراجل وقع علي الارض ... والناس اتلمت .... لقو الراجل مات .... وجة البوليس وخدو التاجر واتحبس واتبهدل .... وبعدين صحي من النوم ....

راح المحل بتاعه ..... وشوية وجه الراجل اللي شافة في الحلم .... وقعد يشتم التاجر فعلا زي ما كان في الحلم .... والتاجر يقوله الله يسامحك .... ربنا يهديك .... الله يسامحك .... والتاجر ماسك ايدة في بعضها عشان خايف ايده تتمد علي الراجل
لغاية الراجل ما وقع علي الارض لوحدة من كتر النرفزة .... والناس اتلمو لقوه مات ...... لكن مات لوحدة ..... لو كان رفع ايده ولمسه بس .... كان راح في داهية
....................
اوعى تمد ايدك علي حد ..... يمكن عنده القلب .... يمكن ضربتك له تؤذيه او تقتله .... وتقعد تندم بعد كدة
خصوصا انك رياضي ... يعني ضربتك ممكن تكون مؤذية
........
ربنا يحفظك من كل سوء
آسف للإطالة .... لكن الموضوع يستاهل

**ams** · 30-10-2008 07:50 PM

المشاركة الأصلية كتبت بواسطة mohamed_rhem

كان رد فعل عنيف جدا مني رغم اني مسالم ومنذ 10 سنين بعتمد علي سياسه ضبط النفس حيال اي حد

انا شايف انك صح و صح جدا كمان
لان من الجميل انك تكون من المحسنين و لا ترد الاساءه بمثلها -مع انه حقك- لكن يجب الا يتحول الاحسان ده الى ضعف مع كل مره يتتنازل فيها عن حقك ده

عن نفسى انا متسامح جدا-او انا فاكر كده- لكن فى بعض الاحيان لازم اخد فيها حقى و بعنف شديد عشان محسش انى ضعيف و ان تسامحى ده استسلام