كيا بيكانتو 2015 هاي لاين

**محمودمحمدخطاب** · 17-11-2014 12:06 PM

السلام عليكم ورحمة الله وبركاته

الحمد لله رب العالمين. ربنا كرمني و هداني بعد طول حيرة و اشتريت كيا بيكانتو 2015 هاي لاين أوتوماتيك و مشيت بيها حوالي 870 كيلو متر. استخدامي كالآتي متوسط 35 كيلو متر يوميا مشوار الشغل ذهابا و إيابا بجانب متوسط 300 كيلو متر شهريا سفر من الاسكندرية إلى طنطا ذهابا و إيابا. الحمد لله العربية ناعمة و مريحاني جدا لكن فيه بعض الاستفسارات:

1. بالنسبة لفترة التليين أنا محافظ على متوسط rpm من 2000 إلى 3000 لفة لكل دقيقة لكن في بعض الأحيان زادت عن 3000 لفة لكل دقيقة و خصوصا عند سفري من طنطا إلى الاسكندرية، هل فيها ضرر على العربية؟
2. امبارح اضطريت أعدي بالعربية على بركة مياه؛ ما مدى الضرر و خصوصا أنا حاسس إن الفرامل ما بقتش زي الأول و خايف لأكون واهم نفسي؟
3. بالنسبة للتكيف امتى المفروض أشغله و إيه محاذير تشغيله؟
4. النهاردة الصبح سمعت زنة و أنا ماشي بالعربية في البداية افتكرتها من الكاسيت و أول ما طفيته لقيت الزنة لسة موجودة و راحت لما شلت رجلي من على دواسة البنزين و مش عارف الصوت ده ممكن يكون من إيه؟

5. بالنسبة للتوكيل، بالنسبة للاسكندرانية إيه أخبار التوكيل اللي على الطريق الصحراوي جنب شركة العامرية للأدوية؟ امتى أول صيانة؟ و إيه مواعيد الشغل بتاعتهم؟ و لو فيه مراكز خدمة معتمدة أفضل منه أماكنهم فين؟

تحياتي للجميع

**eslamsubaru** · 17-11-2014 11:09 PM

أولا : الف مبروك و ربنا يديك خيرها و يكفيك شرها

1) فترة التليين لأى عربية بتكون أول 1600 كم أو 1000 ميل : و بتكون عبارة عن : عدم السير بسرعة منتظمة دائما بمعنى مش كل مشيك يكون بطئ علطول أو سريع علطول و متزودش عن 4000 ار بى ام الا للضرورة يعنى مش تمشى على 4000 فيما فوق علطول انما لو عديتها و نزلت مش مشكلة .. المهم تغيير سرعات لف الموتور : و اللى بتعمله انت بطريقة مشاويرك تمام كده (صح)

2) عادى الفرامل يتتأثر بالمياه بس عادى هتنشف و ترجع لطبيعتها مع السير. متقلقش.. بس نصيحة متنزلش فى برك مياه و تجرى فيها علشان الطنابير لو سخنة المياه بضرها .. فحافظ بعد كده .

3) ايه !!!!! مين قالك ان التكيف ممنوع تشغيله ؟؟ مفيش أى عربية فالدنيا اتقال ان التكييف ممنوع فى فترة التليين الأولى ... شغل التكيف يا باشا عادى و استمتع بعربيتك ... ( كويس انك مشتريتهاش فالصيف و الا كان زمانك كرهتها ... التكييف ليس له أى ضرر على العربية فى فترة التليين و اللى يقولك غير كده يبقى مع احترامى مساقش عربيات قبل كده و لا قرء مانيوال عربية من قبل .

4) البيكانتو موتورها بيديك صوت نعرة كده مع الدوسة التقيلة و ده فالأوتوماتيك : لو ده الصوت اللى تقصده فده طبيعى . انما لو غير كده يبقى و انت بتعمل صيانة ال 1000 قولهم يشيكوا عليها .

5) معلش مش من اسكندرية .

**محمودمحمدخطاب** · 17-11-2014 11:29 PM

المشاركة الأصلية كتبت بواسطة eslamsubaru

أولا : الف مبروك و ربنا يديك خيرها و يكفيك شرها

1) فترة التليين لأى عربية بتكون أول 1600 كم أو 1000 ميل : و بتكون عبارة عن : عدم السير بسرعة منتظمة دائما بمعنى مش كل مشيك يكون بطئ علطول أو سريع علطول و متزودش عن 4000 ار بى ام الا للضرورة يعنى مش تمشى على 4000 فيما فوق علطول انما لو عديتها و نزلت مش مشكلة .. المهم تغيير سرعات لف الموتور : و اللى بتعمله انت بطريقة مشاويرك تمام كده (صح)

2) عادى الفرامل يتتأثر بالمياه بس عادى هتنشف و ترجع لطبيعتها مع السير. متقلقش.. بس نصيحة متنزلش فى برك مياه و تجرى فيها علشان الطنابير لو سخنة المياه بضرها .. فحافظ بعد كده .

أنا ما عديتش بسرعة ده شارع صغير و عشان كانت بتشتي فوجئت بالبركة و كنت مضطر أعديها

3) ايه !!!!! مين قالك ان التكيف ممنوع تشغيله ؟؟ مفيش أى عربية فالدنيا اتقال ان التكييف ممنوع فى فترة التليين الأولى ... شغل التكيف يا باشا عادى و استمتع بعربيتك ... ( كويس انك مشتريتهاش فالصيف و الا كان زمانك كرهتها ... التكييف ليس له أى ضرر على العربية فى فترة التليين و اللى يقولك غير كده يبقى مع احترامى مساقش عربيات قبل كده و لا قرء مانيوال عربية من قبل .

أنا بعد البحث في المنتدى عرفت إن تشغيل التكييف مالوش علاقة بالتليين لكن كنت بسأل عن محاذير يعني مثلا أنا شغلته مرة كتكييف و مرة مروحة بس عشان روائح الطريق فحبيت أتطمن

4) البيكانتو موتورها بيديك صوت نعرة كده مع الدوسة التقيلة و ده فالأوتوماتيك : لو ده الصوت اللى تقصده فده طبيعى . انما لو غير كده يبقى و انت بتعمل صيانة ال 1000 قولهم يشيكوا عليها .

هو صوت ممكن أشبهه بصوت الكاسيت اللي جنبه موبايل

5) معلش مش من اسكندرية .

ولا يهمك يا فندم

متشكرين على اهتمامك يا فندم

**fadymohsen** · 18-11-2014 09:08 AM

مبروك عالبيكانتو يا باشا
بس عايز اسالك علي حاجة
لما حضرتك تيجي تمون , بتلاقي فالعداد كام كيلو فاضل عشان تمون تاني , انا بحس انة مش مظبوط يعني بيتغير بسرعه , هل دة عندك ولا اية

**drmona** · 18-11-2014 02:28 PM

ممكن سؤال سخيف شوية العربية سعرها كام في السوق ؟ و هل دي اول عربية لحضرتك و لو كده هل التعامل معها سلس ؟ اانا لسه هجيب اول عربية و بفكر في البيكانتو و عربيات تانية

**eslamsubaru** · 18-11-2014 06:27 PM

المشاركة الأصلية كتبت بواسطة drmona

ممكن سؤال سخيف شوية العربية سعرها كام في السوق ؟ و هل دي اول عربية لحضرتك و لو كده هل التعامل معها سلس ؟ اانا لسه هجيب اول عربية و بفكر في البيكانتو و عربيات تانية

افتكر ان الفئة الأوتوماتيك بتبدأ من 95 دلوقتى ...
العربية التعامل معاها سلس : كسواقة و لا صيانة تقصدى ؟
لو السواقة العربية جميلة جدا فالمناورة (الباور بتاعها رائع و حجمها مساعد جدا على السواقة بسهولة .
بالنسبة للصيانات مع التوكيل حتى الأن و مفيش مشاكل الحمد لله ..
لو متمكنة فالسواقة يبقى توكلى على الله العربية رائعة و خصوصا للبنات .. لو لسه بتتعلمى يبقى الأفضل عربية مستعملة رخيصة تتبهدل معاكى علشان متزعليش على عربية جديدة .. انما لو اتعلمتى و هتسوقى يبقى البيكانتو هتساعدك على الجرءة فالسواقة . انا عملت كده مع المدام اتعلمت السواقة بتاع شهرين و نصف و بعد كده جبنا البيكانتو و كانت أول سواقة خاصة بيها و الحمد لله تمام.

**محمودمحمدخطاب** · 18-11-2014 07:26 PM

المشاركة الأصلية كتبت بواسطة fadymohsen

مبروك عالبيكانتو يا باشا
بس عايز اسالك علي حاجة
لما حضرتك تيجي تمون , بتلاقي فالعداد كام كيلو فاضل عشان تمون تاني , انا بحس انة مش مظبوط يعني بيتغير بسرعه , هل دة عندك ولا اية

الله يبارك في حضرتك يا فندم

مبدئيا أنا ما عنديش عداد بيحسب البنزين اللي معايا يمشيني قد إيه؟ لكن من خلال اطلاعي في المنتدى عرفت إن قيمة المسافة بتتغير حسب طبيعة السواقة سواء كانت اقتصادية أو رياضية

**محمودمحمدخطاب** · 18-11-2014 07:34 PM

المشاركة الأصلية كتبت بواسطة drmona

ممكن سؤال سخيف شوية العربية سعرها كام في السوق ؟ و هل دي اول عربية لحضرتك و لو كده هل التعامل معها سلس ؟ اانا لسه هجيب اول عربية و بفكر في البيكانتو و عربيات تانية

العربية اللي معايا الهاي لاين سعرها الرسمي 109000 جنيه، قبلها كنت راكب عربية والدي ( لانسر بومة مو 2008 ) ... التعامل مع أبعاد البيكانتو أسهل في المناورات و الركن ده غير الباور بتاعها اللي أخف من اللانسر اللي بيخلي ركن العربية متعة بالنسبة لي ( مش مبالغة ) ؛ متعة السفر باللانسر أكبر و ده بديهي ده غير إن البيكانتو في التليين

ملحوظة صغيرة: قبل الشراء و كل ما أستشير حد من أصحابي يقول لي دي عربية بنات

**محمودمحمدخطاب** · 18-11-2014 07:38 PM

المشاركة الأصلية كتبت بواسطة eslamsubaru

افتكر ان الفئة الأوتوماتيك بتبدأ من 95 دلوقتى ...
العربية التعامل معاها سلس : كسواقة و لا صيانة تقصدى ؟
لو السواقة العربية جميلة جدا فالمناورة (الباور بتاعها رائع و حجمها مساعد جدا على السواقة بسهولة .
بالنسبة للصيانات مع التوكيل حتى الأن و مفيش مشاكل الحمد لله ..
لو متمكنة فالسواقة يبقى توكلى على الله العربية رائعة و خصوصا للبنات .. لو لسه بتتعلمى يبقى الأفضل عربية مستعملة رخيصة تتبهدل معاكى علشان متزعليش على عربية جديدة .. انما لو اتعلمتى و هتسوقى يبقى البيكانتو هتساعدك على الجرءة فالسواقة . انا عملت كده مع المدام اتعلمت السواقة بتاع شهرين و نصف و بعد كده جبنا البيكانتو و كانت أول سواقة خاصة بيها و الحمد لله تمام.

فعلا يا فندم زي ما قلت بالظبط، حتى أنا بفكر أعلم مراتي عليها بحيث لما أحب أجيب عربية أكبر أسيب لها البيكانتو و ربنا يستر

**ahmedwagdy03** · 19-11-2014 12:34 PM

المشاركة الأصلية كتبت بواسطة محمودمحمدخطاب

السلام عليكم ورحمة الله وبركاته

أولا مبروك السيارة و ربنا يباركلك فيها و يكفيك شرها و شرور الطريق . بالنسبة لأى سيارة جديدة الآن

الحمد لله رب العالمين. ربنا كرمني و هداني بعد طول حيرة و اشتريت كيا بيكانتو 2015 هاي لاين أوتوماتيك و مشيت بيها حوالي 870 كيلو متر. استخدامي كالآتي متوسط 35 كيلو متر يوميا مشوار الشغل ذهابا و إيابا بجانب متوسط 300 كيلو متر شهريا سفر من الاسكندرية إلى طنطا ذهابا و إيابا. الحمد لله العربية ناعمة و مريحاني جدا لكن فيه بعض الاستفسارات:

1. بالنسبة لفترة التليين أنا محافظ على متوسط rpm من 2000 إلى 3000 لفة لكل دقيقة لكن في بعض الأحيان زادت عن 3000 لفة لكل دقيقة و خصوصا عند سفري من طنطا إلى الاسكندرية، هل فيها ضرر على العربية؟ مافيش حاجة إسمها تليين زى زمان لإن السيارات دلوقتى بتطلع من المصنع متلينة جاهزة بس ده مش معناه تفترى عليها أول ما تركبها .أول مشوار طويل عملته بالبيكانتو كان للقاهرة سنة و كنت عايز أكسر الألف و مشيت على سرعة 100 و عادى خالص
2. امبارح اضطريت أعدي بالعربية على بركة مياه؛ ما مدى الضرر و خصوصا أنا حاسس إن الفرامل ما بقتش زي الأول و خايف لأكون واهم نفسي؟ صاج السيارات من مدة طويلة بقى معالج يعنى مجلفن و مش حيحصل حاجة إن شاء الله بس أنقلك تجربتى فى الموضوع ده . مرة دخلت فى بركة مياة أو تقريبا كانت حمام سباحة صغير على الطريق لأبوقير و كنت بسمع صوت مياة و مش عارف منين لغاية ما واحد فى محطة بنزين قالى دى مياة فى العلبة الصاج بتاعت العتب و رفع العربية و شال طبات بلاستيك و فرغ المياة و رجعهم .الموضوع إيزى و بلاش تفكر فى الإنتركوت و الحاجات دى علشان بتقلل من سعر السيارة بعد كدة
3. بالنسبة للتكيف امتى المفروض أشغله و إيه محاذير تشغيله؟ يفضل بعد أول 500 كيلو و للأمان بعد أول ألف
4. النهاردة الصبح سمعت زنة و أنا ماشي بالعربية في البداية افتكرتها من الكاسيت و أول ما طفيته لقيت الزنة لسة موجودة و راحت لما شلت رجلي من على دواسة البنزين و مش عارف الصوت ده ممكن يكون من إيه؟ كان عندى مشكلة فى كاسيت البيكانتو أول ما جبتها و برمجته رخمة بس بعد كدة شيلته و ركبت واحد سونى محترم

5. بالنسبة للتوكيل، بالنسبة للاسكندرانية إيه أخبار التوكيل اللي على الطريق الصحراوي جنب شركة العامرية للأدوية؟ امتى أول صيانة؟ و إيه مواعيد الشغل بتاعتهم؟ و لو فيه مراكز خدمة معتمدة أفضل منه أماكنهم فين؟ جيت للسؤال الأهم . عندك توكيل ع الصحراوى بعد العامرية رونبولانك و واحد فى سموحة بعد كوبرى المحمودية و حديقة الحيوانات مع أوبل و عندك طارق إسماعيل عامل توكيل فى المنشية السكة الجديدة . أنصحك تخليك مع التوكيل و تستحمل رخامة الإنتظار و الأسعار المولعة لغاية الضمان و بعد كدة تقلبهم لإنهم أقل وصف حرامية بالإضافة لضعف المستوى فى تشخيص العيوب و أسهل حاجة عنده يغير و يركب جديد .مثال صغير كان عندى شكوى من الديبرياج لإنها مانيوال و المهندس عملى فيلم ديسك و إسطوانة و مصنعيات 1300 جنية و فى الآخر طلع كابل ديبرياج ب 85 جنية

تحياتي للجميع