الموضوع: حد عمل الفيمتو سمايل

بص أنا مش دكتور بس اللي أعرفه ان في الليزك لازم تشيل ١٢ ميكرون من سمك القرنية لكل درجة قصر نظر بالاضافة لحوالي ١٤٠-١٨٠ ميكرون كمان للفلاب اللي هو الفتحة اللي بيعملها في القرنية عشان الليزر يقشط من القرنية (الفتحة دي مش بتتقفل تاني).... في الفيمتو ليزك بتبقى الفتحة دي حوالي ٩٠-١٢٠ ميكرون بس

كمثال لو انتا القرنية بتاعتك سمكها ٤٦٠ زي ما بتقول ونظرك -٦ مثلا

لو هتعمل ليزك عادي هتشيل ٧٢ ميكرون لقصر النظر بالاضافة للفتحة اللي هي مثلا ١٥٠ ميكرون

يعني المجموع هتشيل ٢٢٢ ميكرون من ٤٦٠ هيتبقى حوالي ٢٣٨ ميكرون

ولو فيمتوليزك هتبقى الفتحة قول ١٠٠ ميكرون فانتا هتشيل ١٧٢ من ٤٦٠ يتبقى لك حوالي ٢٨٨ ميكرون

طبعا العمليتين كده مش هينفعوا معاك لأن عشان تبقى في الأمان لازم يتبقى لك بعد العملية ٣٠٠ ميكرون على الأقل وإلا القرنية هتبقى ضعيفة وهتواجه خطر القرنية المخروطية لا قدر الله

لكن عملية السمايل دي مفيش فيها فتحة خالص بالتالي انتا بتوفر سمك الفلاب اللي هو ٩٠-١٢٠ في الفمتوليزك و ١٤٠-١٨٠ في الليزك العادي

يعني لو عملت سمايل هتشيل ٧٢ بس وهيتبقى لك من ال ٤٦٠ حوالي ٣٨٨ يعني أكتر من ال ٣٠٠ يكتير فانتا كده في الأمان

وكمان السمايل الليزر بيقشط من القاع بتاع القرنية الضعيف انما الليزك بيقشط من سطح القرنية القوي... بالتالي السمايل هيخلي القرنية بعد العملية أقوى بكتير من الليزك

وعشان كده أنا قرأت ان دكتور أسامة ابراهيم عمل العملية دي ينجاح لواحد نظره -١٧ وكان عامل بحث عن الحالة دي

أنا كنت محتاج أقرأ الكلام ده كله عشان العملية ساعة لما عملتها كانت لسه جديدة وكنت عاوز أعرف كل حاجة كويس.... وعلى فكره العملية دي كانت بتتعمل ساعتها في مصر وألمانيا والهند بس... ودكتور أسامة ابراهيم اللي أنا عملتها عنده كان تاني دكتور يعملها في العالم

ياجماعة؟