الموضوع: حد يعرف الزجاج الصناعى بيتباع فين؟؟

الزجاج دة بيستخدم فى اييية .. و ما هو الفرق بينة و بين الزجاج العادى ؟

فيه واحد فوق نفق الهرم قبل ميدان الجيزة
لو سيادتك جاي من شارع الهرم رايح ع الجيزة ماتنزلش النفق
امشي من فوق النفق حتة صغيرة هتلاقي المحل على اليمين
مش فاكر اسمه بصراحة لكن انا اشتريت من عنده قبل كدة
عنده جميع الالوان والتخانات والمصنفر والمضلع والشفاف

الأسعار بتختلف حسب اللون والشفافية والسماكة فمش هاقدر افيدك
لكنه عموما أغلى من الزجاج العادي عشان تبقا عارف برضه

الفكرة في استخدام ألواح الأكريليك كبديل للزجاج العادي هي انها مرنة شوية ومقاومتها للكسر أكتر من الزجاج العادي بمراحل..
وده يخليها اختيار مثالي لو هاتركبها مثلا لبوابة حديد بتاعة بيت أو لمكان فيه حركة كتير ومعرض للصدمات بشكل متكرر..

كمان تقدر تستخدمه بدل زجاج الأبواب والمكاتب والشبابيك لغرف الأطفال
لأنه أمان أكتر ليهم عشان مابيتكسرش بسهولة
وحتى لو اتكسر مابيعورش ولا بيتفتفت زي الزجاج العادي..

عندك بقا الاكريليك ده فيه منه أشكال والوان
اللون انت حر فيه طبعا حسب ذوقك..
فليكن مثلا اخترت لون أزرق
هتلاقي أزرق شفاف و أزرق معتم وازرق مضلع
الشفاف ملون بس تشوف منه
المعتم مقفول خالص مايبينش أي حاجة وراه نهائي
المضلع ده تلاقيه شفاف لكن سطحه مشرشر بيبين اللي وراه لكن خيالات مموهة يعني تشوف شخص آه لكن ماتقدرش تميز شكله ولا ملامحه

التخانات عندك من 2 مللي وانت طالع
تفرق في حاجتين اتنين
المرونة و المقاومة للكسر
يعني الاتنين مللي ده تلاقيه طري ماينفعش تعمل بيه رف مثلا لأنه مش ماسك نفسه
لكن لو هاتعمل بيه إزاز مكتب أو ازاز باب يبقا حل ممتاز ومفيش منه قلق..
نيجي بقا لمقاومة الكسر.. مقاومة الكسر في الأكريليك تلات أضعاف الزجاج العادي..
يعني الأكريليك الاتنين مللي ليه نفس قوة الزجاج الستة مللي
والاكريليك الاربعة مللي ليه قوة الزجاج الاتناشر مللي وهكذا

تقطيع الأكريليك نوعين بقا
فيه تقطيع يدوي وده بيتم باستخدام سلاح كتر عادي بالإيد
وده مناسب لو اللوح هايركب في بوابة أو شباك أو حجات زي كدة
أما لو هاتعمله لترابيزة أو مكتب فيه قطع ليزر بيخلي الحواف مدورة وشكلها جميل..


دي كل المعلومات اللي عرفتها من خلال تجربتي السابقة في الشراء من الراجل اللي وصفتهولك

اتمنى اكون قدرت اساعد :)

وميزة تانية للأكريليك انه وزنه خفيف جدا مقارنة بالزجاج..
فلو هاتركبه على باب ألوميتال مثلا هايبقا أحسن كتير وأخف ومش عامل حمل عالمفصلات

أي مقاس انت عايزه بتشتريه..

أنا لما اشتريت من عنده كنت واخد حتة 60×40 سنتي دفعت فيها حوالي 30 جنيه او حاجة زي كدة

طبعا هو اللوح لو خدته على بعض أو لو بتاخد مقاسات كبيرة عموما هتلاقيها أوفر في التكلفة

لكن المقاسات الصغيرة بتقف عليك اغلى عشان الهدر اللي بيحصل في التقطيع بيتحسب عليك

اما الألوان فهي مش درجات لأ
هتلاقي الالوان الأساسية درجة واحدة بس
يعني ازرق واحمر واخضر واصفر وابيض واسود وشفاف

متهيألي لو انت عايز لون معين ممكن تطلبه بالطلب بس هايتكلف اكتر
ممكن تسألهم بقا لما تروحلهم..

كان نفسي اقدر اديك رقم تليفون ليهم لكن للأسف زيارتي كانت من حوالي سنتين واكتر
فمتأكد اني لا هلاقي الفاتورة ولا الكارت ولا اي حاجة اقدر اساعدك بيها


ياريت بقا لو حد ساكن في الهرم او نصر الدين يقدر يعدي عليه يجيب تليفونه يحطهولك في الموضوع يبقا كتر خيره :)