اشتريت سيفيك 2008 ومحتاج مساعدة

**mekkawy0** · 18-11-2014 01:13 PM

أنا الحمد لله اشتريت عربية سيفيك موديل 2008 حالتها كويسة ماشية 105000 كم وكل صياناتها في التوكيل. العربية بسم الله ما شاء الله عليها جميلة خصوصا إني كنت راكب لانوس بس أنا محتاج مساعدة في كذا نقطة:-
1- لقيت في شنطة العربية زيت موبيل 1 10w50 فهل دي لزوجة الزيت الصحيحة؟ أنا شايف المفروض يتحط زيت 5w30 أو 40 وللأسف اللي باعلي العربية مش عنده الكتالوج بتاعها.
2- مروحة الردياتير بتشتغل وتفصل كتير أوي (تشتغل نصف دقيقة وتفصل نصف دقيقة) والحرارة مضبوطة وماء الردياتير كامل. هل ده طبيعي في الهوندا؟
3- لما الروحة تشتغل أو أقلب نور والعربية واقفة، الموتور بيرعش شويه وال rpm بينزل سنة. نصف ثانية كدة الدنيا تتظبط. ده ممكن يكون عيب إيه؟
4- العربية عملت صيانة ال 100000 كم في التوكيل. هل أروح دلوقتي ولا أتنى لغاية 110000 كم وأكون بالمرة شفت كل الملاحظات.
5- لو حد عنده كتالوج المالك أو كتالوج الصيانة ويقدر يبعتهوملي أكون شاكر ليه جدا.

**hany63** · 18-11-2014 09:10 PM

الف مبروك
موضوع الرعشه دي طبيعيه
بس ازاي العربيه دي عملت كل صياناتها في التوكيل و بتحط زيت من بره ؟
حضرتك سئلت في نفسك في التوكيل عن النقطه دي تحديدا ؟
على العموم الزيت بتاعها 0w-40 موبيل ١
و هدور عندي على الكتالوج بتاعها لو لقيته هقولك

**mekkawy0** · 19-11-2014 08:24 AM

الله يبارك فيك يا أ/هاني.
أنا بصراحة ماسألتش في التوكيل لأني شاريها من واحدة قريبتي.
أنا قلت يمكن التوكيل هو اللي بيحط 10w50. على العموم أنا هاسألها إذا كانت بتغير زيت في التوكيل ولا برة. مستني منك لزوجة الزيت الموصي بها في الكتالوج.
لو تقدر تفيدني في موضوع المروحة اللي بتشتغل وتفصل كتير تبقى عملت معايا أحلى واجب.
للأسف البنات بيركبوا وخلاص فهي مش ملاحظه أي حاجة من الحاجات من الحاجات اللي أنا قلت عليها. البركة فيكوا يا رجالة الهوندا.

**SAMEH_FOUAD** · 19-11-2014 01:30 PM

الف مبروك ياباشا ربنا يديك خيرها ويكفيك شرها

بالسنبة للزوجة الزيت : الموصى بية للهوندا فى التوكيل بيكون ( 5w-40 ) او ( 0w-40 ) لكن 10w-50 دية غريبة شوية

- بالنسبة للمروحة , لأ انت كدة فية عندك مشكلة فى الثرموستات بتفتح بسرعة وتقفل بسرعة , روح التوكيل او انزل عند محمد على فى اخر شارع جمال عبد الناصر

- موضوع الرعشة دية لو بتيجى مع تقليب النور قيس شحن الدينامو والبطارية و ممكن تلاقى البطارية ضعيفة شوية
لان السيفيك الجيل الثامن موضوع البطارية بيؤثر فيها جداااااا , يعنى تكون مهتم بيها جدااا

**mekkawy0** · 20-11-2014 06:20 PM

ربنا يخليكوا ليا يا شباب.
أنا بكرة إن شاء الله هاكشف على البطارية والشحن وإن شاء الله أحجز في النوكيل على الأسبوع اللي جاي.

**M2014** · 22-11-2014 10:30 PM

السلام عليكم
أعتقد طالما إن السيارة عاملة صيانة ال ١٠٠٠٠٠ كم بالتوكيل فمن حق السيارة التى عدادها حالياً حوالى ١٠٥٠٠٠ كم (وسواءً مازالت السيارة بإسم المالك السابق أو المالك الجديد لأن التعامل لدى التوكيل برقم الشاسيه ورقم الموتور) أن يتم الكشف لدى التوكيل دون مقابل ، هذا على ما أعتقد وأتمنى أن يكون لدى حضرتك فاتورة الصيانة السابقة وإظهارها لمسئولى التوكيل كإثبات مستندى وفى حالة عدم وجود الفاتورة فإنه من خلال رقم خدمة العملاء ١٩٨١١ يتم التأكد من إثبات بيانات أحدث صيانة وماذا تم خلالها وماذا لم يتم عمله من أعمال الصيانة الموصى بها عند الوصول إلى ١٠٠٠٠٠ كم وهل يوجد تعليقات للصيانة على السيارة بالكامل مذكورة بقاعدة البيانات الخاصة بالتوكيل أم لا ؟
خالص تحياتى . .