الموضوع: مقاارنه

لو سمحت يا شباب كنت عاوز رايكوا
انا نااوى اشترى عربيه شبابى ان شاء الله
ف كنت محتاار بين
مازدا ٣ و جين ٢
ف كنت عايز اعرف مين احسن
من حيث الاداء وقطع الغياار واسعارهم الاتنين
وشكرا

المشاركة الأصلية كتبت بواسطة jisso82

بص يا سيدى على حد علمى و الله أعلم طبعا
أولا انت داخل بتسأل فى قسم بروتون فأكيد هيبقى فى نوع من التحيز مع أو ضد الماركة اللى انت يتسألأ فى المنتدى بتاعها حسب التجربة الشخصية
أنا هحاول أكون محايد على قد ما أقدر و هقولك من البداية الجين لأسباب كتيرة جدا مش منها إنها أحسن من المازدا فى كل حاجة لأن أكيد ده مش حقيقى بس نبتدى على بركة الله:
1- السعر الجين ب116 ألأف و المازدا ب 184 ألأف أول فئة يعنى لو الفلوس تفرق مع حضرتك أكيد ما فيش أى نوع من المقارنة فى النقطة دى بالعكس ده الفرق بينهم تقريبا تمن عربية تالتة
2- الصاج اللى أعرفه عن المازدا و الشكل القديم مع زميل ليا هنا معرفش إذا كان ده اختلف فى الموديل الجديد و لا لأ كان خفبف جدا و بسكوتة زى ما بيقولوا زيها زى النيسان القشقاى إنما عن تجربة البروتون صاجها محمل و محترم جدا و معلومة زيادة البروتون الوحيدة مع البى إم و المارسيدس اللى صاجها سمكه واحد ملم.
3- الثبات فى الجين عالى جدا و ده من مميزاتها الكبيرة بس الأمانة لله عمرى ما سمعت حد اشتكى من المازدا فى الموضوع ده
4- 100% هتلاقى عفشة المازدا أكيد أنعم من الجين
5- قطع الغيار أعتقد بنسبة كبيرة الجين قطع غيارها أرخص من المازدا بس بصراحة ما عنديش مقارنة سعرية مباشرة
6- إعادة البيع فى الجين تحديدا ابتدت تبقى قوية جدا مقارنة بالمازدا فى الفترة الأخيرة
و فى النهاية المازدا عربية حلوة بس بتلعب و بتنافس فى فئة سعرية مختلفة تماما و عشان كده بتخسر فى كل المقارنات اللى بتدخلها فلا هى أحسن ثبات و لا أقوى صاج و اتاحية قطع غيار و لا أحسن إعادة بيع فبتخسر كل مقارنتها فى الفئة السعرية بتاعتها لكن لما تقارنها مع الجين أكيد المعايير المفروض تختلف.
مش عارف أنا كده لخبطتك و لا فيدتك بس أتمنى أكون قدرت أوصلك معلومة تفرق معاك فى اختيارك و ربنا يوفقك للى فيها خير ليك إن شاء الله

لا واللهى تسلم المعلومه وصلت
شكرا