الموضوع: كيفية الحفاظ على فتيس الاوتوماتيك للرائعة شيفورلية كروز

بسم الله الرحمن الرحيم

هذا الموضوع هو مجهود مجمع مشترك من ملاك شيفورلية كروز واخص بالذكر

هانى موافي
عمرو عاطف
حاتم فاثي
حسام علوانى
احمد طوبار



وباقي الملاك الذي لم تسعفنى الذاكرة تذكر اساميهم.


نبدأ:

العربية دى من اول ما جت وهى عانت معاناة شديدة ما بين:

جهل توكيل بالفنيات البسيطة مثل تغيير الزيت وخلافة

ومابين فنيين ومهندسيين مش عايزين يقروا ولا يطلعوا على كل جديد بتقدمة شركة جنرال موتورز العالمية

ومابين زيت ذو نوعية رديئة جدا ويكاد يكون مغشوش ومابين اللى بيغير زيت برة وميعرفش هو بيحط اية وهو اسمة غير زيت وخلاص

اللى احنا عملناة هو قراية جديد جنرال موترز وجديد الاسواق العالمية وبعض معلومات بسيطة عن زيوت الفتيس واسباب تلفة


الفكرة ببساطة شديدة ان زيت الفتيس الفابريقة خاص جدا وبلزوجة معينة جدا لتوفير البنزين

ولكن بما ان مواصفات السواقة عندنا صعبة جدا ما بين نقلات اللاف المرات في اليوم وشد وحرق وسواقة عادية هادية ونقل في زحام و حرارة ما بين اول وتانى

الزيت بيفقد خواصة سريعا وتقريبا على 30الف بيكون خلاص انتهي

وييجي بقي دور التوكيل في غيار الزيت

وهو ذى اي عامل في محطة بيفضي من تحت ويعبي من فوق وشكرا

وتناسي تماما وجود طبة اخري اساسية اسمها طبة القياس او حنسميها الفايظ اللى لازم تتفتح بعد التعبئة عشان تنزل الزيادة

لية لازم ؟ لأن التفريغ من الطبة الاساسية مش بينزل كل الزيت ! بيتبقي شوية لازت يطلعوا من طبة القياس هما كمان


المعلومات دى مش سر حربي ... المعلومات دى عند توكيلات امريكا واوروبا وكندا طبعا وانا عرفتها من متابعة منتديات اجنبية ولقيت الناس كلها بتجاوب على السؤال دة ببساطة ذى كائنك بتسأل ضغط الهوا في الكاوتش كام !

ومن هنا نكتب طريقة غيار الزيت الصحيحة والسليمة :

==================================
الطريقة المتبعة عالميا لتغير زيت الفتيس:
اولا. يتم تنزيل الزيت القديم من الطبة الرئيسية .
ثانيا. يتم قفل الطبة و يضاف الزيت بالكمية كاملة ٤ لتر و نصف
ثالثا. تشغيل السيارة قليلا و تحريك الفتيس علي كامل النقلات ويفضل السير بها كيلومترات قليلة.
رابعا. غلق السيارة و تصفية الزيت الجديد من طبة القياس اولا ثم من الطبة الرئيسية
خامسا.: يضاف زيت جديد مع غلق الطبات جميعا و بعد الاضافة بتدور وتجيب النقلات كلها وبتصبر علي كل نقلة 3 ثواني و بعدين (والعربية دايرة) تفتح فقط طبة القياس ليتم اخراج الزيت الزائد


سادسا. الانتظار حتي يتوقف نزول الزيت تماما من طبة القياس وتغلق الطبة جيدا.
سابعا. تكرر العملية كل ٣٠ الف كيلومتر
نعم تتضمن العملية ٢ غيار زيت ( هو كدة في كل الدنيا ).
=================================

بيغيروا الزيت مرتين ورا بعض عشان يضمنوا ان كل الزيت نزل وكل الرايش و الشوائب نزلت.


طب عامة اية الداعي اننا نفتح موضوع من اول و جديد


الداعي ان في عربيات موديلات حديثة مع اول غيار زيت في التوكيل بأى طريقة الفتيس بقي بينتش و احيانا يهبد


اصحاب العربيات دى ) اول حاجة شكوا فيها هو الزيت مش تمام وفي حاجة مش صح


وفعلا نزلوا الزيت بعد 500 كيلو تقريبا وكانت المفاجأة ان الزيت هلكان ونازل مية وفاقد خواصة تماما !!

و دة معناة ان الزيت اللى acdelco اللى بيتعبي في التوكيل ذو نوعية رديئة جدا تعبان


الناس دى فضت الزيت تماما ... وعبت زيت جديد ماركة بيزول المانى ومتوافق مع متطلبات جى ام وهو ديكسرون6

والمفاجأة التانية ان النتش والهبد و الترزيع راح تماما ورجع الفتيس تانى ذى الزيرو.



المهم اللى احنا لازم نتكلم عنة

ان التوكيل لما بيلاقي الفتيس بينتش او يهبد على طول بيقولك العربية جابت فتيس ولازم يتغير

وهو بصراحة مش بيتأخر وبيغير على طول للي في الضمان و اللى برة الضمان بالتفاوض بيغير بفارق سعر بسيط من ثمنة الاصلي.


ومن هنا بقي كل شوية يطلع سمعة ... الكروز بتجيب فتيس


هى فعلا بتجيب فتيس في حالة الاستمرار على السير بالزيت اللي انا بقول علية عيان دة


الزيت العيان دة بيسخن جدا و يبوظ بلوف الفتيس و ينشف وبعدين يحرق كلتشات الفتيس الاوتو ويبوظ تماما الفتيس

والتوكيل يغير والناس تتأكد ان العربية معيوبة


لازم اقول برضوا وبصراحة تامة ان في عربيات من قبل ما تغير زيت الفابريقة ممكن تنتش او الفتيس يدخل safe mode

اية ال safe mode ؟ هو ان الفتيس بيوقف النقلات بسبب السخونة لحد ما الزيت درجة حرارتة نهدي ويشتغل تانى تجنبا لحرق البلوف والكلتشات

يعنى الفتيس بيحاول يحمي نفسة لحد ما صاحب العربية يغير الزيت بتاعة.


فالحل هو غيار زيت بدري قبل ال 30 الف كمان

بزيت نضيف محترم متوافق مع متطلبات dexron6

اللى الناس جربتة وجاب نتيجة هايلة جدا هو البيزول و فى انواع تانية طبعا محترمة ذى الفالولين والكاسترول

نيجي بقي للصور :


هنا عمرو و هانى بيغيروا زيت الفتيس اللى عامل 500كيلو من التوكيل اللى في العلبة دى



ونازل محروق وغامق والعلبة دى المعيوبة العيانة



هنا بقي صورة طبة المقاس او الفايظ اللى عالجمب ... الطبة السحرية اللى هى روح الفتيس








دى صور علب الزيت البيزول المحترم جدا اللى جربوة وبقالهم حوالى 1000ك علية وضيع كل اعراض نتشة الفتيس والهبد






هنا و هما بيعبوا الزيت من فوق




دى بقي صورة ال acdelco اللى بتبباع برة ومش عارف هل التوكيل يعرف ان العلبة الحمرا التعبانة دى تعبانة ولا لأ




نيجي بقي للبدائل

طبعا القمة زيت فالفولين ديكسرون6



و زيت كاسترول ترانس ماكس الرائع






..............


عشان بس منذمش في حد وعشان ربنا مراقب لقولنا وعشان منقللش من مجهود حد


التوكيل متعاون جدا وقاللى هات الزيت بتاعك وغيرة

و بالفعل التوكيل بيغير على طول من غير نقاش مع كل الناس طالما في الضمان

ولو طلعت برة الضمان بيكون بنسبة تحمل وفعلا في عربية عضو معانا كانت 2013 اتغيرت ب موديل 2014 واى عربية بتشتكي من حاجة بيغير بدون نقاش.


الكلام دة لا يعفى مسئولية التوكيل في انة طلع سمعة سيئة جدا على فتيس الكروز بسبب قلة المعلومات اللى استطاع افراد عاديين مثلنا التوصل لها ببساطة

يأما من مراسلة جنرال موتورز او الاطلاع على خواص الزيوت والنت والمنتديات الاجنبية

__________________________________________________ _______


خلاصة الكلام الكتير دة كلة



غير زيت الفتيس بدري مش لازم تستنى ال 30الف يعنى كل 20الف حلو

حط زيت محترم ونضيف

اتبع الطريقة الصحيحة في التغيير المذكورة فوق

العربية بتاخد 4 لتر زيت ... ولو حطيت زيادة تأكد من تفريغ الفايظ من الطبة اللى متصورة فوق


اتبعوا الكلام دة وانسوا اى حاجة بعد كدة واستمتعوا بالعربية الرائعة جدا جدا جدااااا

الكروز


__________________________________________________ ___________


اقتباس لكلام م/هانى و د/عمرو


:


تجربه النشه فتيس كروز تم تغير الزيت في التوكيل اسي ديلكو علبه سوده ولوجو احمر من غير باركود والعلبه الاصلي لونها اسود واللوجو ازرق في البيض وليها باركود استعملت انا زيت الماني اسمو بيزول ديكس ٦ علا مرتين كل مره اربعه كيلو والفاصل اسبوع علشان انضف كل اللي في الفتيس
وتم تغيير البوجيهات الان جي كي الواحد شمعه ببوجيهات بوش سوبر فور خلوص ١.٢ ملي النتيجه مفيش نتشه والمكنه ناعمه حتى علا السرعات البطيئه ومفيش كركره نهاءيا والبنزين ٩٢ بدون اضافات


:


السلام عليكم اهل الكروز الطيبين
حبيت ارجعلكم بتقرير كده كان نوه عنه Amro Atif عن اللي عملناه النهارده بخصوص موضوع الفتيس
حابب اقول حاجه بس في الاول ... يشهد الله اننا مش عاوزين اي حاجه من اللي بنعمله ده غير ان الفايده تعم علي الناس جميعا والمساعدة قدر المستطاع في حل او منع مشاكل ممكن تتلحق من الاول قبل الدخول في متاهات ملهاش نهاية
في البدايه عمرو كان عنده نتشه واضحه في الفتيس وحاول معاها مرارا وتكرارا ومكنش في فايده .. لغاية ماجرب زيت بيزول ده المهم هو غير الزيت كاملا مرة وجربنا العربيه فحسينا بفرق واضح وملموس في موضوع النتشه بس بصراحة مكنتش انتهت تماما فحوالي 3 ايام كده وغيره تاني ولسنا مجربنها النهارده ..
العربيه مافيهاش نتشه نهائي ولا حتي إحساس بالنقلات من اصله لا علي الاربي ام العالي ولا الواطي ونعومه واضحه في كل الغيرات
واستجابة الفتيس رائعة في السحب والتجميع والكيك داون طبعا.
بالنسبالي انا بقه كنت كتبت من فتره كده علي موضوع صوت الونه المسموع عندي واللي بيروح لما امور الفتيس والصوت ده ماظهرش الا بعد لما غيرت زيت الفتيس علي 20 الف في التوكيل ومن ساعتها والونه موجوده والفتيس حاسه مش طبيعي بس بكذب نفسي ساعات كان يأخر نقلات وساعات يبرجل وتحسه مش عارف يعمل ايه كده يعني..المهم بعد شكاوى كتير للتوكيل غيرت زيت الفتيس في التوكيل تاني علي 30 الف ومشيت عليه حوالي 500 كيلو تقريباً المهم ماحسيتش بأي تغيير والونه زي ماهي وحال الفتيس هو هو بالاضافة للهبده اللي كتبت عنها امبارح وكانت اول مره تحصل
فقولت هروح للتوكيل تاني اشوف اخرهم ايه بقي بس قبل مااروح هجرب اغير الزيت كده فروحت للدكتور عمرو عاطف النهارده وبالفعل حطينا 4 لتر زيت بيزول ونزلنا القديم .. بس المفاجأة الصادمه ان الزيت اللي المفروض مشيت عليه 500 كيلو بس نزل محروووووق وفاقد لكل خواص الزيت الطبيعي والله نازل مياه وصوته في مكان الصرف بتاع الزيت ده اكنك بتكب مياه في حوض وبيجري في المواسير والله نفس الصوت حتي احنا استغربنا اوي الصوت ده والصور هتوضح الكلام ده حاجه محدش يصدقها الصراحه
النتيجه بعد التغيير ... النقلات مش محسوسه نهائي زي عند عمرو بالظبط ومفيش لخبطه ولا تهييس واضح كده زي قبل كده وصوت الونه فعلا فعلا اقل من الاول بس لسه موجود بس اقل كتير ومش واضح وعالي زي الاول كده... فناوي ان شاء الله شوية صغيرين كده وانزله تاني واحط جديد علشان اضمن ان اللي في الفتيس كله نضيف
الخلاصة.. العربية دي ممتازه ورائعه وملهاش حل والله
بس وكيلها مضيعها
الموضوع كله ... زيييييييييييييييييييييييي ت
حطوا اي زيت تاني يكون نضيف ماشي مع المواصفه ديكسترون 6 بس اوعو اوعو اوعو اوعو تحطو زيت التوكيل... مضرووووووووووب مش طبيعي والله ... وفعلا فيه حاجه غلط
وان شاء بعد تجربة كام يوم كمان كده بالزيت ده هقولكم النتيجه ايه
اللهم بلغت اللهم فاشهد ...
الصور المرفقه هتوضح الزيت القديم البني المحروق .. والزيت الجديد الاحمر الواضح ... وطبعا هو اتقل من القديم شويه
وتصبحو علي الف خييير جميعا....





حتى يكتمل الموضوع ... زيت الموتور بيقي 5w30 بتاخد 4 لتر و ربع او نصف بالفلتر او 4 فقط بدون فلتر

اسهل طريقة لتغيير الزيت

1- دور الموتور و سيبها توصل لدرجة الحرارة الطبيعية
2- ارفعها من قدام و ورا لتكون مستوية
3- هات بتاعة مياة نستلة الكبيرة وعلم عند كل لتر بقلم الوان
4- او هات بتاعت زيت 5 لتر شفافة من الجمب اللى متعلمة
5- نزل الزيت في الجركن و سيبة يبرد خالص
6- شوف قد اية زيت وحط زيهم بالضبط
7- تكرر العملية بعد يومان


والسلام عليكم ورحمة الله

المشاركة الأصلية كتبت بواسطة shoooma

ياشباب انا لقيت ليكومولى 1200 دكسترون 6 ، ينفع وﻻ ﻻزم الكاسترول او البيزول؟

اهم حاجة يكون متوافق مع متطلبات dexron6 ودة مش متوافق للاسف

المشاركة الأصلية كتبت بواسطة Mahmoud_Yassin

الف شكر ليك يا دكتور شهدى ولكل من ساهم فى الموضوع . موضوع رائع ومهم جدا

تسلم ياباشا