هل انت مبسوط من عربيتك

**MedaSam** · 02-11-2008 03:53 PM

نوع العربية: دوجان 1600
سنة الصنع:1996
سبب السعاده: الحمد لله أولا عليها و يا رب يبارك لنا فيها ........ مريحاني قوي في قطع غيارها المنتشره و الرخيصه ...... سحبتها كويسه ........ مشكلتها معايا في التقفيل و الثبات ....... بس فعلا كل واحد بيتعايش مع عيوب سيارته قدر الأمكان لحد ما ربنا يكرم و يجيب سياره أفضل

**mazen86** · 02-11-2008 07:57 PM

نوع العربية: لانسر 2008 اوتوماتيك
سنة الصنع :2008
سبب السعادة : الثبات الثبات الثبات وكل ما فيها كويس
سبب الحزن :بعيط من البنزين حاسس انها بلاعة بنزين ولا يمكن عشان كان معايا كرولا قبلها انا حاسس
بكدا

**Nasser** · 03-11-2008 12:13 AM

نوع العربية: VW Passat High Line
سنة الصنع :2007
سبب السعادة : نعمه من الله ربنا يديمها .
بالنسبه لى ليس بها عيوب تذكر والحمد لله

**Ahmed Samy** · 03-11-2008 02:56 AM

موضوع كويس الحقيقة

انا فعلا بافكر في تغيير العربية العربية ( لانسر 2002 كاملة اوتوماتيك)
ولكن من شهر تقريبا كده فكرت ..هوا انا عايز أغير العربية ليه ؟؟؟

فعملت تقييم ليها و بدأت أجربها في حاجات ما كنتش جربتها قبل كده

الثبات ... العربية بجد ثباتها أحسن مما كنت متوقعه بكتير و خدت بيها ملفات على سرعات عالية نسبيا 120 -140 و كانت مستقرة و تحت السيطرة بشكل أدهشني ...
علما انى مش مركب جنوط ولا كاوتش عريض !

الحاجة التانية الكويسة طبعا ....قلة الشكاوي و الاعتمادية فوق الممتازة

العربية مريحة في السفر (أو يمكن انا بارتاح فيها)

قطع الغيار أسعارها ظريفة (الأصلي مش رخيص قوي يعني و انا باجيب قطع أصلية) ولكنها لا تقارن بأسعار سيارات أخرى ....

طب انا عايز أغيرها ليه بقى ؟؟؟

العربية موتورها بدأ يزعجني في تجميع سرعات عالية يعني أنا أخري 160 بيها و فوق كده بقى نبقى في معركة مزعجة مع الموتور

حتى الحفاظ على 160 لفترة طويلة هي مهمة مزعجة بألف و ثلاثمائة من السنتيمترات المكعبة فقط .

السبب التاني البنزين ...بلاعة بنزين ...يمكن رجلى تقيلة !! يمكن علشان كاربيراتير !! مش عارف بس ((( التانك ))) بيعمل 400 كيلو بس

السبب التالت بقى الحقيقة هو اني عايز أغير علشان عايز أغير يعني ..

بس عموما الأزمة الحالية وصلت و الحمد لله و جمدت الأصول و جعلت التصرف في السيولة ضربا من العته المبكر ....

يمكن أسقط مكنة 1600 و جنط محندق كده لحد السنة (البيضا) ما تعدي :)

الخلاصة : مبسوط

**Nour_Peugeot** · 03-11-2008 03:17 AM

السيارة : بيجو 405
موديل : 1990
سبب السعاده : الحمد لله نشكر فضله

اولا العربيه دي فيها 70 % من ذكرياتي و عمري مهفرط فيها عربيه العمر ان شاء الله و بسم الله مشاء الله معمره و قطه غيارها معقوله العربيه مريحانا جدا جدا

و يارب يارب متجيش ظروف تحكم اني اغيرها يا رب

**tutankhamoun** · 03-11-2008 08:53 AM

نوع السيارة : بروتون جين 2
سنة الصنع : 2007
سبب السعادة : ( أولا و أخير نعمة من عند ربنا )

و بتسعفني لو بتاع ميكروباص رزل أو كسر عليا
بطلع عين اللي جابوه .......... بذله ورايا مش أقل من 2 أو ثلاثة كيلومتر ......... ( أنجدنا يارب من أرزل الناس ) ( دائرة الإنتقام )

**Ahmed REDA** · 03-11-2008 09:44 AM

نوع العربية :بروتون جين 2 سنة الصنع : 2008سبب السعادة : ريحتني من المواصلات و تناكة سواقين التاكسي و طبعا عربية اختي ال 127 لما كانت موجودة ,كانت كل شوية بتعطل ,انما جينا عمرها ما قلت باصلها معايا ابدا حتي يوم المطرة في بحر طريق النصر قامت بالواجب و زيادة توت لسة امبارح سواق عربية نص نقل كسر عليا جامد و عصبني الصراحة و فضلت ماشي وراة ضارب النور العالي راح مهدي و جيت قدامة و ضرب نور عالي هوة كمان رحت رافع المرايا اللي في النصف لفوق و قفلت المرايات اللي في الجنب و شغلتلو الفوجات اللي ورا لحد ما زهق و دخل يمين انا بصراحة نفسي نفسي ابطل التفاعل جامد كدة مع الناس اللي بتضايق الواحد و هوة سايق لانة بيقودك انك تعمل حاجات غلط زية ,صدقني يا توت دة مش صح ,يولع سواق الميكروباص و يروح في مصيبة بس المهم ان احنا منبقاش زيهم