عاجل جداا : اشتري شقه في دجله بالمز ولا لا ؟

**Hikayat** · 23-11-2014 03:08 PM

عايز رايكم اشتري شقه في دجله بالمز تبع اعمار المرشدي في 6 اكتوبر ولا لا ؟ انا لو اشتريت هشتري شقتين وهفتحهم علي بعض
الشقه 80 متر الصافي 68 متر التسليم بعد 3 سنين تمنها 200 الف تقسيط 6 سنين او 140 كاش ( للشقه الواحده ) وانا زي ما قلت ان شاء الله ناوي اشتري شقتين وافتحهم علي بعض
الحجز في المشروع ده خلصوا المرحله الاولي والتانيه ودلوقتي شغالين في التالته .. المشكله كمان اني لما رحت لقيت كل الشقق اللي في الاماكن الحلوه دور 3 واخير بس بيقولولي ان السطح معزول وكمان هيتعمل روف فوق
فكنت عايز اسال الناس اللي من اكتوبر بالذات المشروع ده مكانه حلو ولا ايه ؟
ورايكم الشقه دي تمنها هيزيد بعد كام سنه ولا هتبقي حاجه بسيطه ؟
يعني من الاخر اتكل ع الله واشتري ولا بلاش احسن ؟
وياريت لو حد يكون اتعامل مع المرشدي يقولي بيسلموا في المواعيد ولا ايه ؟
وكمان لو حد اشتري حاجه بالتقسيط يديني رايه اشتري كاش ولا تقسيط انا معايا امكانيه اني اشتري كاش بس مش عارف ادفع المبلغ كله ولا اقسط علي 6 سنين ؟
اخر حاجه مفيش غير دور 3 واخير فهتفرق ولا لا ؟

**shiko85** · 23-11-2014 03:41 PM

انا كان ليا تجربه معاهم بس فدجله جاردنز شقه فالمرحله الأولى (اخويا) و شقه فالمرحله التانيه (انا) و شقه تالته (صديق اخويا) و كان ميعاد الأستلام عدى و البناء كان متوقف تماما و كنت بتابع الموقع البناء بنفسى و بتابع مع الشركه بأستمرار و كان الكلام غير مطابق للواقع خالص
و طبعا لازم دفع الأقساط بأنتظام حتى و هم مش بيشتغلوا و النتيجه فسخ عقد الشقق و استرداد المبلغ المدفوع بعد مماطله و تهرب و مراوغات كتير منهم و محاولات بأقناعى انى هخسر و ان المشروع ممتاز و اى كلام وخلاص بس انا كنت واخد القرار و كان الرد واحد الشقق ترجع و اخد فلوس و ده اللى حصل الحمد لله
نصيحه بلاش تشترى هناك و دور فـ 6 اكتوبر او الهضبه و هتلاقى مساحات قريبه من مجموع الشقتين و بسعر قريب و بالتقسيط
صديق ليا كان بيدور على شقه من فتره قريبه و شاف شقه فأكتوبر 145 متر بـ 410 الف استلام فورى و تقسيط على 5 سنوات (نصف تشتطيب)

**احمد المصرى** · 23-11-2014 03:47 PM

المشاركة الأصلية كتبت بواسطة hikayat

عايز رايكم اشتري شقه في دجله بالمز تبع اعمار المرشدي في 6 اكتوبر ولا لا ؟ انا لو اشتريت هشتري شقتين وهفتحهم علي بعض

تقدر تفتحهم على بعض بس بعد لما تدخل عداد الكهرباء لكل شقه لوحدها وبعد كدا اعمل ال انت عايزه
الشقه 80 متر الصافي 68 متر التسليم بعد 3 سنين تمنها 200 الف تقسيط 6 سنين او 140 كاش ( للشقه الواحده ) وانا زي ما قلت ان شاء الله ناوي اشتري شقتين وافتحهم علي بعض
الحجز في المشروع ده خلصوا المرحله الاولي والتانيه ودلوقتي شغالين في التالته .. المشكله كمان اني لما رحت لقيت كل الشقق اللي في الاماكن الحلوه دور 3 واخير بس بيقولولي ان السطح معزول وكمان هيتعمل روف فوق
فكنت عايز اسال الناس اللي من اكتوبر بالذات المشروع ده مكانه حلو ولا ايه ؟

مكانه حاليا مش حلو لانه يعتبر بعيد مثلا عن الحصرى حوالى 8 كيلو بس بيفكرنى باكتوبر من 12 او 15 سنه وحاليا اكتوبر موقعها ممتاز يعنى اعتقد مستقبلا موقعها هيكون ممتاز وعمران بعد دخول المترو وتشغيل المطار
ورايكم الشقه دي تمنها هيزيد بعد كام سنه ولا هتبقي حاجه بسيطه ؟

الله اعلم بس لو قلنا ان الاسعار كلها بتغلى يبق المدينه دى بعد لما تخلص وتظهر السعر هيكون اضعاف حاليا وخاصه ان اكتوبر حاليا اصبحت شعبيه شويه

يعني من الاخر اتكل ع الله واشتري ولا بلاش احسن ؟

صلى استخاره الاول طبعا
وياريت لو حد يكون اتعامل مع المرشدي يقولي بيسلموا في المواعيد ولا ايه ؟

لو الشقه موجوده بيسلموا فى الميعاد بس كل الشكاوى انه بيتاخروا شويه بس مش نصابين

وكمان لو حد اشتري حاجه بالتقسيط يديني رايه اشتري كاش ولا تقسيط انا معايا امكانيه اني اشتري كاش بس مش عارف ادفع المبلغ كله ولا اقسط علي 6 سنين ؟
اخر حاجه مفيش غير دور 3 واخير فهتفرق ولا لا ؟

معرفش افيدك فى النقطه دى بس من وجهه نظرى عيب المشروع دا ان الشقه مش كبيره صافى 136 متر الشقتين ودى مساحه عموما مش كبيره

الميزه انه مقفوله مش هتلاقى دكتوك ولا الكلام الفارغ دا

**Hikayat** · 23-11-2014 09:29 PM

ايه يا جماعه مفيش حد من اكتوبر ولا ايه ؟

**cheetos_892005** · 23-11-2014 09:41 PM

اللي اعرفه انها شركه اي كلام و متعبين في الاتسبيم و بتوع 3 ورقات فا سيبك منهم
محسوبك ملسوع من شركه مشابهه اسمها المغربي و المشروع اسمه مروج في 6 اكتوبر

فبقا عندي خبره في القرف ده

**Hikayat** · 23-11-2014 10:33 PM

المشاركة الأصلية كتبت بواسطة cheetos_892005

اللي اعرفه انها شركه اي كلام و متعبين في الاتسبيم و بتوع 3 ورقات فا سيبك منهم
محسوبك ملسوع من شركه مشابهه اسمها المغربي و المشروع اسمه مروج في 6 اكتوبر

فبقا عندي خبره في القرف ده

هيه مش المفروض شركه المرشدي شركه كبيره وليها اسمها ولا ايه ؟

**shiko85** · 23-11-2014 10:34 PM

المشاركة الأصلية كتبت بواسطة Hikayat

طيب حضرتك عندك فكره هما سلموا الشقق بعدها بقد ايه ؟
و الله انا مش عارف التسليم كان امتى بس انا كنت بشوف مشاركات و تعليقات الملاك على الفيس و اقدر اقول لحضرتك ان حتى بعد سنه من وقت فسخ العقد كان لسه تسليم الوحدات متوقف
وبعدين اكيد لو في كمبوند هتبقي احسن من البلد نفسها ولا ايه رايكم ؟
على فكره الشقه اللى كنت بقول لحضرتك عليها كانت فالريهام فالتوسعات الشماليه و الريهام تعتبر كمبوند بس بدون اسوار حاليا

**Hikayat** · 24-11-2014 03:21 PM

طيب في اراء تانيه ولا ايه ؟

**yassermahmmoud** · 24-11-2014 03:48 PM

شوف يا عزيزي أنا هقولك الخلاصة من تجربة حقيقية .. أنا كنت حاجز معهم ثلاث شقق واحدة في مشروع بافاريا تاون الاستثمار على طريق الدائري المعادي وكان سعرها 500 ألف جنية، وكانت تقسيط وفي موعد التسليم تأخروا جداً وتم التسليم سنتين تأخير عن الموعد المتفق عليه، ثانياً كنت حاجز شقة في دجلة جاردنز وكانت الشقة ضيقة جداً ومينفعش عفش يتحط فيها نهائي وقد لاحظت تأخير في موعد التسليم وتوقف العمل في المشروع بصفة دائمة، ثالثاً كنت حاجز شقتين في دجلة بالمز في الدور الثاني وكنت عايز أفتحهم على بعض وبعد مشاهدتي للموقع لم يعجبني وكذلك لو تم فتح الشقتين على بعض لم يكونوا بالشكل المطلوب وفسخت العقد معهم. هذه تجربتي معهم ونصيحة لا تحجز معهم، هناك أماكن أفضل من دجلة بالمز بكثير .