الموضوع: سيارات كسر الزيرو

كسر الزيرو ده موضوع كبير جداً لأنه عبارة عن واحد بيبيع عربية عاملة كيلومتراج قليل باقل من تمنها الزيرو وده ناتج عن عدة اسباب منها ممكن يكون صاحب العربية مزنوق فى فلوس او مسافر او شاريها بالتقسيط وعاوز فلوس كاش بأى شكل (بيحرق العربية) أو ممكن كمان تكون عملت حادثة وإتصلحت وصاحبها إتشائم منها أو ممكن تكون فيها مشكلة فنية مالهاش حل وصاحبها مش عارف ياخد من التوكيل حق ولاباطل وممكن كمان يكون مش قادر على مصاريفها وكمان ممكن يكون ربنا كرمه وعاوز عربية أعلى او ممكن قوى تكون مسروقه ومعاها ورق ورخصة مضروبين وده منتشر.
لو العربية كسر الزيرو دى من نوعية صاحبها مزنوق فى فلوس او مسافر او عاوز يجدد بعربية اعلى مابيبقاش فيه مشكلة بس لوسبب من الأسباب التانية بيبقى طبعاً فيه مشاكل. أهم حاجه إنك تكون عارف تاريخ العربية والسبب الأصلى لبيعها وتكشف عليها كويس وتسأل عليها فى المرور لو فيها قضية لحادثة ولا حاجه زى كده ويستحسن لما تحب تشترى عربية كسر زيرو تشتريها من واحد مضمون قريبك او صاحبك أو جارك وطبعاً تكون من الماركات اللى ماشية فى السوق مش عربية تكون نادرة ومافيش منها كتير وتنقل ملكية وتسجل على طول ماتمشيش بتوكيل.
أنا بس حاولت اجاوب بإختصار وأكيد فيه أعضاء هنا فى المنتدى حيدوك تفاصيل فى الموضوع ده أكتر منى لأن الموضوع ده بحره واسع.

المشاركة الأصلية كتبت بواسطة eng.mark

الرد وافي و كافي ... مفيش كلام بعد كلامك

تسلم ياباشا ربنا يخليك