مخصص للرد على أسئلة الأعضاء في مجال التوظيف و سوق العمل

**OlaOsman** · 30-10-2008 10:43 PM

بالإشارة للموضوع المفتوح بعنوان تعالوا نفيد بعض و اللي بنحاول فيه إفادة بعضنا من خلال تخصصاتنا المختلفة، الموضوع اللي احنا فيه ده هايكون مخصص بإذن الله للرد على استفسارات الأعضاء في كل ما يخص مجال التوظيف و سوق العمل و السير الذاتية و أي أسئلة عن كيفية إجتياز المقابلة الشخصية بنجاح لو متقدم لوظيفة و أي نصايح حد محتاجها في هذا الخصوص.

و عشان الناس تعرف عن اللي بيرد على الأسئلة اكتر، انا باشتغل بقالي حوالي 10 سنوات في شركة استشارات توظيف و سوق العمل و وظيفتي في قسم التوظيف نفسه، يعني باختار الناس اللي هاتشغل الوظيفة المطلوبة و اعمل لهم انترفيو و على أساسه باقدر أقيم إذا كان الشخص ده يصلح للوظيفة و لا لأ، و في نفس الوقت باقدم خدمات استشارية في مجال سوق العمل، يعني مين يشتغل ايه يقوم ياخد كام امتى و ازاي و فين

و عن طريق خبرتي دي ربنا وفقني اني أقدر أدي دورات تدريبية في تخصصي، و تحديدا في كيفية كتابة سيرة ذاتية باحتراف و كيفية إجتياز المقابلة الشخصية بنجاح، و بقالي في مجال التدريب حوالي 4 سنين و لله الحمد.

ان شاء الله ربنا يوفقني و أقدر أرد على كل أسئلتكم و استفساراتكم سواء هنا أو ع الخاص و يفضل طبعا الأسئلة تكون هنا عشان الكل يستفيد، و لو السؤال عشان أجاوبه هاكون محتاجة اعرف تفاصيل أكتر لا يستحب انها تكون على العام، ساعتها هارسل لصاحب / صاحبة السؤال على الخاص و أجاوب عليه هناك.

بالنسبة للأسئلة اللي تخص الوظائف التكنيكال المتخصصة و انا معنديش أجابته، فبعد إذن كل اللي شارك في الموضوع الأصلي اللي الرابط بتاعه موجود في أول الصفحة، فأنا هاحيله هناك للرد عليه من المتخصصين، و يا ريت الرد برضه يكون هنا عشان الفايدة تعم بإذن الله.

المشاركة اللي جاية ان شاء الله هارد فيها على أول سؤال يرد لي في حدود تخصصي.

**OlaOsman** · 30-10-2008 11:10 PM

المشاركة الأصلية كتبت بواسطة elbaz45

انا عندى سؤال مهم لحضرتك "عاجل"

انا على اى اساس بكتب فى C.V مستوايا فى اللغة الانجليزية ..............؟
للعلم انا رحت بعد التخرج على طول "تقريبا من شهرين" اعمل Conversation test فى الجامعة الامريكية وزى ما حضرتك عارفة ان الكورس عبارة عنsix levels وفى ال Test الخبير رشحنى ل level four
وكنت عاوز اخد راى حضرتك فىC.V بتاعى بس ازااااااى ...........؟

شوف يا سيدي، هو تقييم مستوى اللغة الإنجليزية عموما عند المتقدم لشغل أي وظيفة بيكون غالبا على أساس المحادثة، يعني بيعرف يتكلم انجليزي و لا لأ.. فيفضل انك ما تهتمش بتقسيم مستوى اللغة لتحدثا و كتابة و الكلام ده.. ركز في مستوى تحدثك اللغة الانجليزية و هي باختصار كالتالي:

Excellent
Very good
Good
Fair

شوف انت تقدر تقيم نفسك في أي مستوى من دول، و لو محتاج مساعدة في التقييم انا ممكن أفصل لك أكتر في طريقة تقييم كويسة من غير ما تحتار في موضوع مستويات الجامعة الأمريكية ده.

ربنا يوفقك ان شاء الله و لو احتجت أي حاجة تاني انا موجودة :)

**OlaOsman** · 30-10-2008 11:17 PM

في رسالة جت لي ع الخاص هاستسمح صاحبها بس ارد عليه باستفاضة بكرة ان شاء الله عشان فعلا شايفة اللاب توب بيرقص قصادي مش عارفة ليه

لأ فعلا مرهقة جدددددددددددددا و الرد على السؤال ده محتاج حد مركز.. غيري طبعا حاليا :)

**Moh.Abdelbaset** · 31-10-2008 12:22 AM

المشاركة الأصلية كتبت بواسطة OlaOsman

و لو محتاج مساعدة في التقييم انا ممكن أفصل لك أكتر في طريقة تقييم كويسة من غير ما تحتار في موضوع مستويات الجامعة الأمريكية ده.

من فضلك عايز أعرف طريقة التقييم دي علشان أعرف أنا فين علشان هتخرج السنة الجاية ان شاء الله ، وعايز أعرف انا فين
شكراً على مجهودِك ، جزاك الله خيراً

**elpasha009** · 31-10-2008 07:28 AM

بجد جزاك الله خيرا يا أستاذة علا وجعله في ميزان حسناتك.
معلش أنا هتقل على حضرتك شوية بس أنا مطلوب مني أكتب Cv بتاعتي في خلال يومين وكنت محتاج من حضرتك بس الخطوط العريضة لكتابة Cv وأهم الحاجات اللي المفروض ناخد بالنا منها.
معلش تعبت حضرتك مقدما:) وشكرا.

**michohat** · 31-10-2008 01:44 PM

حاليا انا مستقر فى شركه وشغال فيها محاسب اول بس كل فترة والتانيه تيجى لى فرصه اظنها كويسة فبروح اعمل انترفيو
فنقطه الضعف (الناس شايفاها ضعف) انى فى بعض الاحيان بتعلثم فى الكلام
فمن اول ما بدخل وبقعد بفهم اللى بيعمل الانترفيو معايا انى بتلعثم فهل الاسلوب ده كده صح ولا فيه طريقه تانيه
و بعد اذن حضرتك ينفع تقيمى لى ال cv بس مش عارف اقدر ابعته ازاى

**elbaz45** · 31-10-2008 02:21 PM

المشاركة الأصلية كتبت بواسطة OlaOsman

شوف انت تقدر تقيم نفسك في أي مستوى من دول، و لو محتاج مساعدة في التقييم انا ممكن أفصل لك أكتر في طريقة تقييم كويسة من غير ما تحتار في موضوع مستويات الجامعة الأمريكية ده.

ربنا يوفقك ان شاء الله و لو احتجت أي حاجة تاني انا موجودة :)

بالفعل اللى حصل فى conversation test اللى فى A.U.C ان الخبير كان بيحادثنى بالغة النجليزية ويسالنى عن نفسى وعن حياتى الشخصية وكمان انا بساله نفس الاسئلة وفى نهاية المحادثة بيقيم مستوايا فى المحادثة, وبعرف النتيجة بعدها بكام يوم
وزى ما قولت لحضرتك انه قيم مستوايا فى المحادثة بالمستوى الرابع من اصل ستة
فماذا هذا يؤهلنى انى اكتب مستوايا فى المحادثة فى C.V ........؟

وبالطبع احب جدا اعرف طرق التقييم الكويسة اللى حضرتك اشرتى اليها

**OlaOsman** · 31-10-2008 10:27 PM

أنا جيت

عذرا للتأخر في الرد على الجميع، اللي سألوا هنا أو ع الخاص و ان شاء الله هارد على الكل حالا، بس كنت طول اليوم برة و يادوب راجعة من ساعة زمن.

**michohat** · 31-10-2008 10:41 PM

حمد الله على السلامة

**OlaOsman** · 31-10-2008 11:20 PM

المشاركة الأصلية كتبت بواسطة etrawy

من فضلك عايز أعرف طريقة التقييم دي علشان أعرف أنا فين علشان هتخرج السنة الجاية ان شاء الله ، وعايز أعرف انا فين
شكراً على مجهودِك ، جزاك الله خيراً

شوف يا سيدي.. لو انت بتعرف تتكلم إنجليزي بدرجة مقاربة للي لغة بلدهم الإنجليزي أو لو لما بتتكلم مع حد من دول ما بتلاقيش صعوبة في انك توصل اللي انت عايزه و تفهمهم بسهولة و بتستعمل الكلمات الصح في المكان الصح و بتقدر انك تفهم مصطلحاتهم و كل كلامهم يبقى انت كده الانجليزي بتاعك Excellent

لو بتفهم الكلام العادي بس و بتعرف ترد عليه من غير ما تلاقي صعوبة شديدة و بتقدر انك توصل اللي انت عايزي تقوله من غير سوء فهم، يبقى انت كده الانجليزي بتاعك Good

أما لو ممكن تتكلم شوية انجليزي بس بصعوبة و بلجلجة و "أحيانا" بتفضل تدور على الكلمة المناسبة في الجملة و بتلاقي صعوبة في فهم اللي بيتكلم معاك بالانجليزي، بس في الآخر بتقدر تجمع هو يقصد ايه، يبقى كده الانجليزي بتاعك Fair