الوصلة الجديدة ( محور عرابى - المهندسين )

السلام عليكم
طبعا كلنا سمعنا عن الوصلة الجديدة من الدائرى واللى بتوصل لشارع احمد عرابى على طول واللى اتعملت مكان ارض المطار ( مطار امبابه القديم ) ويمكن اغلبنا مشى عليها واللى مشى عليها عارف ان الوصلة دى تعتبر اختراع جامد جدا جدا جدا لكن للاسف الحلو ما يكملش ليه بقى لان النزلة بتاعتها من الدائرى وانت رايح على المحور فها منحنى خطر جدا جدا واللى بيكون جوة نفق وللاسف النفق ده بيكون فيه زى النهاردة مثلا وانا داخل للنفق لقيت عربية كارو بتعدى النفق وماشية عكس ولولا ستر بنا كنت دخلت فيه والحاجة التانية انك بعد ما بتعدى النفق ده بتدخل على النفق التانى ( نفق واسع وكبير ونضيف واللى منه بتطلع كوبرلى احمد عرابى ) لكن للاسف برضه النفق ده مع انه لسه جديد الا انه فيه فواصل كتييييييييير جدا وغبية جدا جدا وبتخلى العربية تتهبد كل هبده وهبده ( الفواصل دى زى فواصل الكبارى كده بس من غير حديد يساويها ) .
بصوا بقه كل اللى فات ده حمادة واللى جاى حمادة تانى خالص وانت جاى من كوبرى احمد عرابى ودخلت النفق الكبير ابو فواصل غبيه ده ولما تيجى تطلع طلعة الدائرى فى اتجاه شبرا هتلاقى على اول طلعة الدائرى مطب صناعى زى الزفت معرفشى اى مهندس طرق حمار عمل مطب زى ده فى طلعة كوبرى ومش اى كوبرى دى طلعة الدائرى واللى يغيظك انه عند المطب ده النور بيبقى ضعيف طبعا لو باليل يعنى وكشافات العربية مش هتميزهالك لان المطب متسفلت ومش متلون يعنى زيه زى الاسفلت بتاع الطريق ولما العربيات بتقرب منه تسمع احلى صريخ للعجل مع الفرامل او تسمع احلى هبد للعربيات بعد ما بتطير من على المطب او لا قدر الله تسمع طراخخخخخ لان عربية داست فرامل مفاجىء والعربية اللى وراها لبست فيها ( المطب مش من السهل انك تاخده وانت بتجرى بالعربية لانه عالى ورخم )
ودى الحمد لله انا موقعتش فيها بس وجب التنويه علشان غيرى ما يوقعشى فيها .
ويارب الحكومة تاخد بالها وتشيل المطب ده لانه اساسا مش مكانه .