الموضوع: عند تركيب السيراميك ايه ممكن اخد بالى منه قبل وخلال شغل الفنى

السلام عليكم ورحمة الله وبركاته

اخوانى واحبائى الكرام

بصراحة موش عارف اشكركم اذاى لاهتمامكم الكبير بالموضوع
ولسرعة تفاعلكم والمعلومات الفنية الغزيرة والتى كنت اجهل معظمها
ودى الميزة اللى يتميز بها منتدانا لمساعدة بعضنا البعض
فى جميع المجالات ربى يحفظكم ويسعدكم جميعا

المشاركة الأصلية كتبت بواسطة طارق _عبد السلام

هتخبط على البلاط بعد التركيب المطبله او تحس ان تحتها فاضى لازم يشيلها

والفروقات بين البلاط لازم كلها تتملى كويس جدا ولو هيقطع بلاط لازم بالمكنه بلاش الصاروخ لانه بيعمل شرشره

واشترى له اعواد بلون البلاط علشان الزوايا فى المطبخ والحمام بتبقى شيك جدا وامان لانها بتكسر حرف الزاويه

طارق باشا بالنسبة للاعواد اللى بلون البلاط علشان الزوايا
انا شفت فى السوق اعواد بلاستيك مسطحة يعنى موش زاويا
عرضها حوالى 3 سم ولها شفة مائلة حوالى 3او 4 مللى وعليها نقوش زخرفية ملونة
هى دى اللى تقصدها وهل بتركب فى نهايات الحوائط مع السقف والا فى زوايا الحوائط بس
بصراحة موش عارف بتركب اذاى بالضبط
لو عندك معلومة تفصيلية ياريت تقولها لى عشان الصنايعى
سيبدأ عمله بعد اسبوع ان شاء الله تعالى

المشاركة الأصلية كتبت بواسطة ahmedwagdy03

خد عندك يا سيدى :

1- الصنايعى النضيف لازم يوزن الحيطة بخيطان قبل التركيب فلازم تتأكد إنه شادد خيطان على الجنب أو ممكن المبيض يوزن حوائط المكان كله بحاجة إسمها بؤج و ده أفضل .
2- وهو بيركب و بيحط المونة على ظهر البلاطة لازم و هو يلزقها المونة تطلع من الجنب الفاضى علشان مايبقاش فيه تعشيش (فراغ ) خلفها و دى حاجة كدة زى الكاتشب لما يبظ من الساندوتش .
3- بعد ما يخلص الجنب أو جزء منه فيه حاجة إسمها إدة (مسطرة ألومنيوم طويلة ) ممكن تخليه يحطهالك علشان تتأكد إن الجنب فى سوا واحد
4-يا حبذا لو تخليه يجيب زاوية حديد يحطهالك فى الكورنر علشان تتأكد إن الزوايا 90 درجة تمام
5-طبعا العراميس تبقى على خط واحد و دى ممكن تلمحها بالعين أو بحاجة بسيطة إن عدد البلاطات فى كل صف متساوى أو مقاس آخر بلاطة مش سليمة (غلاقة) يبقى ثابت تقريبا .


طبعا بعد كل ده لو كان صنايعى مؤدب حيلاقيك بتحبكها معاه و حيطلب سعر أزيد أما لو ضربك فأرجوك ما تدعيش عليا

كلامك كله فى الصميم ياباشمهندس احمد
بالنسبة للبؤج ده اعتقد فى المحارة وانما ميزان الخيط فعلا بيقبى فى السيراميك

بالنسبة بقى لو انا ركبت فوق دماغ الصنايعى وبحبكها
انا وافقت على سعر مصنعيته كما طلب بدون مساومة
بشرط يعمل شغله صح على اكمل وجه بدون مطالب تانية وبدون تهدير للبلاط
ووالموضوع موش راح يوصل للضرب هههههههههه
لانه معرفة و صديق اخى وربنا يسترها معانا
احسن فعلا الصنايعية الايام دى اذا لم تتفق معاهم على كل حاجة من البداية
ممكن تفاجىء خلال الشغل انه قسم العملية لاجزاء ومراحل
عشان يكبر فى اجره الا من رحم ربى
موضوع الصليبة البلاستيك دى ماحدش عندنا فى السويس بيستخدمها انا شفتها على اليوتيوب فعلا حاجة ممتاز