الموضوع: عند تركيب السيراميك ايه ممكن اخد بالى منه قبل وخلال شغل الفنى

محدش يعرف صنايعى سيراميك كويس فى القاهره

البلاط لازم يكون بميل مظبوط ناحية البلاعه عشان مفيش مياة تقف ف المطبخ والحمام. لان الموضوع ده مجنني

خد عندك يا سيدى :

1- الصنايعى النضيف لازم يوزن الحيطة بخيطان قبل التركيب فلازم تتأكد إنه شادد خيطان على الجنب أو ممكن المبيض يوزن حوائط المكان كله بحاجة إسمها بؤج و ده أفضل .
2- وهو بيركب و بيحط المونة على ظهر البلاطة لازم و هو يلزقها المونة تطلع من الجنب الفاضى علشان مايبقاش فيه تعشيش (فراغ ) خلفها و دى حاجة كدة زى الكاتشب لما يبظ من الساندوتش .
3- بعد ما يخلص الجنب أو جزء منه فيه حاجة إسمها إدة (مسطرة ألومنيوم طويلة ) ممكن تخليه يحطهالك علشان تتأكد إن الجنب فى سوا واحد
4-يا حبذا لو تخليه يجيب زاوية حديد يحطهالك فى الكورنر علشان تتأكد إن الزوايا 90 درجة تمام
5-طبعا العراميس تبقى على خط واحد و دى ممكن تلمحها بالعين أو بحاجة بسيطة إن عدد البلاطات فى كل صف متساوى أو مقاس آخر بلاطة مش سليمة (غلاقة) يبقى ثابت تقريبا .


طبعا بعد كل ده لو كان صنايعى مؤدب حيلاقيك بتحبكها معاه و حيطلب سعر أزيد أما لو ضربك فأرجوك ما تدعيش عليا

ياريت كمان نصائح يا رجاله :d

بخصوص موضوع الميل تجاه البلاعات .. هو طبعا مفروض لكن مش إي صنايعي بيعرف يظبطه صح وهتلاقي الدنيا باظت منه.. البعض بيفضل يكون ميزان عشان تبقي مطمن إن الشغل مضبوط.

المشاركة الأصلية كتبت بواسطة amr011111

الشغل الصح
1- خلى السيراميك فى الشقه كلها افقى وليس بميل علشان العفش ميلوقش
2- الحمام والمطبخ فقط خليهم بميل ناحية البلاعة
3- خلى المبلط يبدأ مثلا بالريسبشن ويدخل على الاوض بنفس اللحامات
4- يفضل ان الوزر ميبقاش وراه مونه كتيره
5- يفضل ان الوزر يبقى ماشى مع البلاط فى اللحامات لو انت هتعمل السيراميك افقى ورأسى
6- لو السيراميك لون واحد هيبقى ده اقل معدل تهدير لو لونين وسمبوكسه هيبقى فيه تهدير أكثر
7- هات زوايا تركب فى حوائط الحمام والمطبخ عند السوك
8- أهم حاجه ان الصنايعى يملى اللحامات كويس بأسمنت أبيض

تمام الله ينور عليك : إسمحلى أضيف على كلامك حاجة نسيتها : أنه يستعمل الصليبة البلاستيك علشان يظبط سمك العرانيس بين البلاطات سواء أرضى أو حوائط علشان خط اللحامات مايلعبش منه . و بمناسبة الزوايا ممكن كمان أن صاحب الشقة يجيب سلك شبك ممدد عرض 15 سم و يخلى مبيض المحارة يثبتوا بين الكمر و المبانى علشان لو الحيطة نملت ما يسمعش فى السيراميك

كل من لديه سؤال قد يجده في هذا الموضوع عن السيراميك في قسم تجارب الاعضاء في مصر موتورز