حدث بالفعل .. الرخصة اتسحبت عشان الكهربا عالية
احكيلكوا بقه على موقف حصلى يوم الاحد اللى فات
فى اليوم ده انا كنت مسافر من بعد الفجر من طنطا رايح اسماعيلية عشان شغل ... ولأن العربية كانت مليانة كتب ( الشنطة على آخرها والكنبة اللى ورا والدواسات وكان ناقص احط على رجلي ) قررت انى اخد طريق القاهرة الزراعي واطلع الدائري واخد اسماعيلية الصحراوي على اساس ان الطريق ده هيبقى سالك ومفيش مطبات لان العربية هبطت اوى بسبب الوزن الكبير اللى فيها عكس طريق بنها منيا القمح الزقازيق او طريق زفتى وميت غمر ( العربية فيها يايات اكبر لفتين عن العادي وده مخليني بحملها كتب زي النقل بالظبط ومش بتضايقني فى اى حاجة خالص لا مطبات ولا سرعة )
حصل عطل فى العربية ( وير الدبرياش اتقطع وركبتلها وير توكتوك باكور ورا وقدام مؤقتا لحد ما وصلت اسماعيلية ) عطلنى حوالى ساعتين كدا على الطريق قدام ميت حلفا قبل الدائري بحاجات بسيطة بس كله خير وظبطها ومشيت ... المهم على ما اتحركت مفيش دقيقتين ولاقيت لجنة تحت الدائري وقفتنى ... قالى سيب العربية شغالة ... وحط فيها خابور كدا غريب حبتين من ورا فى الشكمان ... وموظف بيبص فى جهاز كدا على شاشة فى النص ... بسأله بيعمل ايه قالى بفحص العربية ... انا لسه عامل صيانة للعربية من شهر تقريبا بس قلت ( ببراءة شديدة ) فى سري ان الحكومة عاملة خدمة فحص مجانية للعربيات على الطريق .... واهو مصر بتتقدم يا ولاد ... وعنها ولاقيت الموظف بيقول للنقيب اللى جنبه اسحب الرخص .. اسحب الرخص لييييييييييييييييييييه ؟؟ .... وكان الرد ان العربية مش بتدخن والموتور كويس بس كهربة العربية عالية .... بقيت واقف هتجنن وبضحك فى نفس الوقت ... اللجنة هتسحب رخصة العربية عشان كهربتها عالية !!!!!!
للى مش شافنى قبل كدا عربيتي نوعها فورد اسكورت موديل 99 ومعروف عن العربيات الفورد عموما ان لو فيها سلك مقطوع ولا حاجة واحدة مش متظبطة العربية كلها هتقف ومش هتشتغل ... بقيت عمال اقولهم طب يا جماعة حد يجرب العربية ... طب انا مش من هنا ومش فاضي اجى مشوار تانى عشان استلم الرخصة من وحدة فحص العادم اللى ف شبرا الخيمة على الكورنيش ... وكان رد سيادة النقيب المحترم ان الوصل اللى هاخده ممكن امشي بيه شهر وشهرين ... وطبعا انا لو سمعت كلامه ومشيت بيه شهر ولا حتى اسبوع بعد الاسبوع اللى فيه المخالفة هتبقى اكبر
اللى غايظني اوى هو سبب سحب رخصة العربية ( كهرباء عالية ) طب وانت مالك عالية ولا واطية المهم فى دخان ولا الموتور سليم
وطبعا محدش عرف الموضوع ده من قرايبي الا واتريق عليا على اساس ان موظف البيئة ونقيب ومقدم وكام امين شرطة ضحكوا عليا عشان يسحبوا الرخصة بسبب اهبل ملهمش فيه
وفى النهاية لو كان ليا قريب واصل ولا رتبة كبيرة كان زمان الموضوع خلص بمكالمة تليفون لكن المواطنين العاديين فى البلد دي ملهمش ضهر يحميهم ومعرضين فى اى لحظة للسرقة بالاكراه سواء سرقة من حرامية او غرامات ومخالفات وهمية وتعسفيه .... ولازم تدفع
بالمناسبة البيت اللى انا ساكن فيه قيمته لا تزيد عن 500 ألف جنيه حسب قانون الضريبة العقارية ورغم كدا عليه ضرايب السنادى 620 جنيه
تحيا مصر
