الموضوع: تغوووور التكاتك باللي سايقينها ..شر ماشي على ألأرض

عندي واحد صاحبي بينزل كل يوم مع والده عشان يروحوا الشغل سوا ..بس صاحبي معاه عربيه ماروتي ..ووالد صاحبي معاه عربيه فيرنا ..صاحبي بيمشي قدام ووالده وراه ..أو العكس ..بس المهم إن هما بيمشوا مع بعض لغاية منطقة محطة الرمل عندنا في إسكندرية وبعد كده بيتفرقوا كل واحد على شغله ..في يوم وهما لسه جنب البيت عندهم في منطقة العصافرة ..يجي توتوك يخبط العربيه الفيرنا ..وطبعا بتاع التوكتوك هو اللي غلطان بصرف النظر عن الغلطه اللي عملها بتاع التوكتوك ..يقوم الوله اللي سايق التوكتوك يبص لوالد صاحبي ويقوله ..مش تفتح يا حاج على الصبح ..لولا سنك كنت مسحت بكرامة أمك الأرض ..طبعا والد صاحبي مبقاش عارف يرد ولا ياخد ولا يدي من هول المفاجأة ..وخصوصا إن الخبطه كانت جامده وطيرت رفرف خلفي وفانوس خلفي في العربيه الفيرنا ..طبعا صاحبي شاف المشهد كله ..بيقولي أنا كل اللي لقيت نفسي بعمله إني نزلت من العربيه بتاعتي ورحت ساحب الصايع اللي سايق التوكتوك من هدومه ونازل في فرم ..صاحبي بيقولي فجأة لقيت حاجه تقيله نزلت على دماغي ..أتاريها ماسوره حديد ..وبيقولي لقيت تكاتك كتير جت إذ فجأة كده ..تقولش الأرض إنشقت وطلعت منها ..وبيقولي بصيت لقيت سيوف طلعت وجنازير من التكاتك ..ووالد صاحبي قعد يصرخ بيستنجد بالناس عشان يلحقوا إبنه اللي هيموت سواء من الماسوره اللي نزلت على دماغه أو من أي سلاح من الأسلحه اللي طلعت فجأة من التكاتك وكانوا على وشك إن هما ينزلوا بيها على جتة صاحبي..لغاية ما جه عسكري غلبان بيحرس كشك غاز طبيعي عندهم في المنطقه وقعد يخوفهم ويزعق فيهم والناس إتدخلت وتم فض المشكلة

النهارده بقى وأنا ماشي عندنا في الشارع ..الشارع كله مطبات وحفر وقرف على الشارع وعلى اللي عمله وعلى اللي عاملين المطبات ..فأنا متعود أمشي فيه وأنا ضارب النور الواطي ..عشان ملبسش في مطب أو حتى في حته عيل قاعد على الرصيف وأنا مش واخد بالي ..فجأة لقيت توكتوك جاي عليا وش في وش أنا من دهشتي وقفت مكاني بهدوء لما أشوف ناوي يعمل إيه وخصوصا إن المسافه كانت لسه بعيد وبعدين لما قرب مني لقيته قام كاسر بعيد عن العربيه بسرعه وبيخبطلي على الكبوت وبصوت فظيع بيقولي ..طفي النور ده ..إنت مش ماشي لوحدك ..طفي النور بدل ما أنزل أطفوهلك ..أنا لسه بفتح الإزاز بتاعي عشان أعرف أرد عليه حتى قام واخد بعضه وجري ..طبعا فيه كام واحد كانوا ماشيين قعدوا يقولولي معلش ..تلاقيه ضارب حاجه تلاقيه مش في وعيه

أنا بقى عايز أعرف ..هي الحكومه لما منعت إستيراد التكاتك مش كان المفروض يلموا التكاتك اللي مرميه في الشوارع دي ..مش كفاية بقى قرف وزهق ..يعني مش كفاية المطبات اللي ماليه الشوارع هيبقى كمان التكاتك بالسلاح اللي فيها باللي سايقينها كمان ..أنا لما كان معايا ال 128 مره توتكتوك خبطلي الباب ومخدش بالي إن الباب داخل لجوه غير تاني يوم لإن ساعة ما خبطلي الباب كانت الدنيا ضلمه ومشفتهاش ..ده غير الإزعاج اللي التوكتوك ماشي بيه طول اليوم مهرجانات وصوت عالي وخناقات وشتيمه وسب دين..أنا عايز أعرف ..لمصحلة مين الشر اللي إسمه توكتوك اللي ماشي في الشارع ده يفضل ماشي لغاية دلوقتي ..التوكتوك ده كان سبب إن عيال يسيبوا دراستهم ويشتغلوا عليه سواقين عشان يمسكوا فلوس يروحوا يصرفوها في القرف والهباب اللي إسمه كيف

بجد ..أنا من أكتر الناس اللي زعلت على قرار الحكومه منع إستيراد التكاتك عشان كنت بقول حرام ده بيصرف على ناس..دلوقتي بقى ..أنا من أكتر الناس حزنا على عدم لم الحكومه لشوية التكاتك اللي موجوده في الشارع لإني بجد إكتشفت إنه شر بيمشي على الأرض

المشاركة الأصلية كتبت بواسطة rotanamasoud

بالرغم ان فيهم ناس كويسه نقول 2% مشكلتنا متمثله فى ال98% الباقيين ومش لاقى حل منطقى يعنى لو لاقو نفسهم عواطليه والحكومه سحبت التكاتك ممكن يتحولو بلطجيه او حراميه وتبقى المشكله من سيء الى اسوء
البلد عايزه عباقره تخطط تخطيت مدروس لحل مشاكل متراكمه بس انسى

أحمدك يارب ..واضح إن مش أنا لوحدي اللي بعاني من الشيطان اللي إسمه التوكتوك ..أنا كنت بعمل المشاركه ومنتظر الناس تدخل تقولي كلام على شاكلة ..حرام عليك ..الناس دي لو ملقتش شغلانه تشتغلها هتتحول لبلطجيه ..بس على فكره والكلام للأخ العضو rotanamasoud ..ممكن الحكومه بدل ما هي طالقه التكاتك دي علينا كده ..لا مخالفات ولا ضابط ولا رابط ولا قانون ..ممكن يقننوا وضعهم ..يعني مثلا يتعمل ليهم رخص ..للتكاتك ..ويتعمل لسواقين التكاتك رخص ..ويتعمل أرقام شاسيه للتوكتوك ولوحات معدنيه ..عشان لما توكتوك يخطف شنطه من حد ويجري أعرف أبلغ عنه برقمه ..أنا مش فاهم إزاي وسيلة تنقل منتشره زي التوكتوك ملهاش أي ورق ولا أي إثبات في الحكومه ..التكاتك دي عامله زي ولاد الزنا ..ملهومش أي صفه في البلد من نسب وأب وأم ....برضه التكاتك كده ..لو ليها قانون يحكمها مش هتبقى كده مطلوقه في الشوارع بدون ضابط أو رابط