توكيل نيسان وبليه الميكانيكى
السلام عليكم ورحمة الله وبركاته
كان معى سياره قديمه وكنت كل لما أركب العربيه بشيك على المياه والزيت باستمرار ولأن العربيه كانت بتعطل منى كتير فاتعلمت اعمل حاجات بإيدى بحيث لو العربيه عطلت اعرف اتصرف بس العربيه بهدلتنى وكانت بتعطل منى فى أوقات كتير ومعايا أسرتى
المهم الحمدلله ربنا كرمنى وجبت عربيه نيسان تيدا وقولت همشى مع الضمان وكده كده لما بفتح كبوت العربيه مش بشوف فيه حاجه علشان الفبرة اللى على الموتور المهم جيتها من حوالى سنه وعامل بيها 15 الف كم وطبعاً بعمل كل الصيانات فى التوكيل علشان احافظ على الضمان واخر مره روحت صيانة كانت يوم السبت اللى فات الموافق 2014-11-22 ودفعت 200 جنيه علشان اربط عفشه وعلشان احافظ على البيه الضمان
المهم العربيه الفنى بعد المهندس ما بيستلمها منى بيخدها فيه هناك قاعتين قاعه فيها ازاز ممكن اشوف بس العربيه وقاعه وراه مش بابقى عارف ان كانت العربيه اصلا عملوا ليها صيانه ولا لاء
المهم المره اللى فاتت حظى كان ان العربيه فى القاعه التانيه
اللى حصل ان امس الموافق الاحد 2014-11-30 كنت واخد ولادى لدكتور فى روكسى ولقيت العربيه نتشت منى ولمبة التشيك نورت قمت ركنت على جنب وفتحت الكبوت لقيت ان غطاء الريداتير مش موجود والكبوت غرقان ميه بس قربة المياه مليانه مياه لحد الماكسيميم فطبعاً بطلت العربيه وخلتنى واقف جنبها اشوف اتصل بالتوكيل محدش بيرد قولت اشوف ونش
فربنا كرمنى وسواق تاكسى ربنا يكرمه وقف دورنا العربيه وزودنا مياه عاديه وادانى غطاء ريداتير عنده قاللى انه بينفس وهوه مغيره بس لمبة التشيك برضه مطفتش
مع العلم اننى ممدتش ايدى على الكبوت ومعتمد على الصيانه
وهوه بالتأكيد فنى الصيانه فتح الغطا بتاع الريداتير ومحكمش غلقه
طبعاً انا بكره هاخد اجازه واروح التوكيل المفروض يدونى غطاء ريداتير ويفضولى المياه العاديه ويحطوا المياه الخضراء او الحمراء ولمبة التشيك يشوفوا ايه مشكلتها
وطبعاً محتمل ان هما يقولوا انى انا اللى فتحت الريداتير وانا والله العظيم ممدتش ايدى على اى حاجه فى الكبوت
انا بقول اتصل بيهم اعمل شكوى فى نيسان مصر الأول
وعاوز اعمل شكوى فى نيسان العالميه علشان الموضوع ده الله اعلم ممكن يكون قصر على الموتور ولا ايه
ياريت يا جماعه تفيدونى باللى المفروض اعمله وانا عاوز ادخل الورشه اقف على ايديهم علشان يعملوا المطلوب
اوازى اعرف انهم غيروا المياه بمياه خضرا ومش ساب مياة الحنفيه وهل المفروض يغسلوا دورة التبريد ام ماذا وشكراً جزيلاً
انا بصراحه لو بعمل صيانه عند البليه الميكانيكى هيبقى احسن من التوكيلات الفاشل ده على رأى اخونا صدام