تقرير تركيب حساس ركن امامي و تشغيله على زرار في التابلوه - ميجان2

سلام عليكم
قصة ممكن تكون الناس عارفاها , بس عموما قلت اعمل تقرير عشان لو فيه حد مش عارف تبقى المعلومة وصلت

بقى لي فترة عايز اركب حساس ركن امامي , بس العائق اللي كان قدامي هو تشغيله
اللي ورا بيشتغل مع المارش دير , اللي قدام مش هاسيبه شغال على طول , فكان لازم يشتغل على زرار
المكان الوحيييييييييد اللي ممكن يبقى فيه زرار زيادة في تابلوه ميجان2 هو الوحدة اللي عند ركبة السائق الشمال في الطبة اللي جنب مثبت السرعة

http://www.kmarty.bluetone.cz/pics/m...sl_switch1.jpg

المهم دورت على زرار مثبت سرعة بفيشته , لحد ما لقيته الحمد لله
و عند كهربائي معرفة , خليته ركب الزرار في الوحدة اللي عندي و وصل حساس الركن على ناحية في الزرار
اما الناحية التانية فحملت عليها الDRL اللي كنت عامل عنه التقرير ده
http://www.nilemotors.net/Nile/442637-drl-2-a.html

و بقى الوضع كده في التابلوه
http://content.screencast.com/users/...12-01_1302.png
و ما رضيتش اخلي الكهربائي يوصل النور بتاع الزراير عشان طبعا مش طالباها شكل المثبت و المحدد يبقى متكرر مرتين

حتة ان الناحيتين مش بيشتغلوا مع بعض مش فارقة مع الوظيفتين حاجة تذكر تقريبا
و الحقيقة انا لو اطول اشغل الDRL لوحده على الزرار بحيث فوق يشتغل و تحت يشتغل بس لو النور الصغير مطفي و في النص يطفي , كان يبقى احسن كتير
بس ما كنتش هلاقي زرار اشغل عليه حساس الركن هههههههههههههه

و اخيرا , دي صورة الوضع برة
http://content.screencast.com/users/...12-01_1303.png

الله ينور يا باشا :)

هل حاسس بفايدة ملموسة من السنسورز الامامية ؟

اقتباس:

---

المشاركة الأصلية كتبت بواسطة monamize4

الله ينور يا باشا :)

هل حاسس بفايدة ملموسة من السنسورز الامامية ؟

---

ينور عليك يا باشا :)

فايدتها في حالتين , لما اكون باركن في مكان مش واسع للدرجة باستفيد من الحتة اللي قدامي لأقصى حد , ما كنتش باعرف اعمل كده
و لما اكون باركن عمودي في وش رصيف بيقول لي قبل ما اخبط الاكصدام في الرصيف (كنت باعاني فعلا من دي بقى ) , و برده ماركنش بعيد عن الرصيف , و ان كان النقطة دي مش راضي عنها بما يكفي برده حتى بعد التركيب

مبروك عليك و الله ينور

عندي الحساسات الأمامية في السيراتو ماشية مع نفسها .. لما تحب تصفر بمزاجها و لما ما تحبش بمزاجها بردو .. بس يمكن علشان 2 بس مش 4 زي عندك

اقتباس:

---

المشاركة الأصلية كتبت بواسطة hunting_eagle

مبروك عليك و الله ينور

عندي الحساسات الأمامية في السيراتو ماشية مع نفسها .. لما تحب تصفر بمزاجها و لما ما تحبش بمزاجها بردو .. بس يمكن علشان 2 بس مش 4 زي عندك

---

عايز اقول لك اني ركبت 6 هههههههههههههههههههههه
الاتنين اللي في الصورة و واحد كمان في الجنب

بس بعد ما ركبت لقيت واحد في النص قدام مش شغال و لازم اجيب حساس تاني :(

مبروك يا تامر , بس مش هايمشى مع موضوع الرصيف ده قوى لانه مستوى الرصيف هايكون اقل من مستوى اشارة ذبذباته

ألف مبروك يا تامر باشا و حلوة فكرة زر مثبت السرعة.
بس رأى أن الحساسات الأمامية مش مفيدة فى الأمام و ذلك لأن أقل مدى لحساسات ال after market هو 30 سم و بعدها بتديك نفس صوت التنبيه العالى لأى مسافة أقل من 30سم....يعنى 30سم بالنسبة لها مساوى ل 5 سم فى التنبيه و ده بيخليك مش قادر تميز المسافة اللى أقل من 30 سم
طبعاً 30 سم مسافة أمامية فى مصر تعتبر كبيرة شوية نتيجة صغر أماكن الركن....
إنما بالنسبة للحساسات الخلفية و بما أننا مش شايفين حاجة أصلاً و خصوصاً لو حد داقق عامود حديد إرتفاعه أقل من مستوى الشنطة أو حتة حجر فى الأرض أو عيل صغير أقصر من العربية أو ما شابه فأعتقد ليها أهمية قصوى و لو حتى على حساب المسافة الكبيرة (30سم)
على العموم التجربة خير برهان و مستنيين رأيك بعد التجربة لفترة معقولة

تحياتى

الف مبروك فكرة جميلة :)

ممتاز..أنا عايز أخوه بس خلفي بقى

الله بنور عالشغل يا باشا

امبارح جربت اركن عمودي في وش رصيف
اللي حصل كالآتي
0.7
0.6
0.5
0.3
--

تفسيري للي حصل تقريبا ان لما الرصيف قرب عن حد معين خرج من زاوية الحساس , مش عارف ازاي مع ان ده مش منطقي , فوقف كأنه مش شايف حاجة
بالمنظر ده لما الحساس بيجيب 0.3 بتبقى العربية قدام الرصيف على طول فعلا

هو لسه مافيش حساس بيقيس اقل من 30 سم مافيش ليه تطور في الموضوع ده ؟
وهل معنى كده ان العربيات اللي فيها اوتو بارك لازم يكون المكان فيه على الاقل 40-50 سم زياده عن طول العربيه عشان توافق تركن يه ؟
ناقص بس انك كنت ترشهم سلفر عشان الشكل الجمالي

مفيد جدآ الحساس الامامي خصوصآ العربيات الكبيره

ما شاء الله عليك - تقرير ممتاز ألف شكر - سؤال معلش لو انا عايز اجيب الزرار ده اشتريه منين؟
شكرا مقدما

ربنا يخليك
بتجيبه من بتوع الاستيراد
سواء الزرار لوحده او الوحدة كاملة , بس لازم تاكد ان فيها زرار مثبت سرعة

تسلم على ردك وذوقك - استأذنك لو تدلني على حد كويس عنده قطع غيار استيراد . ألف شكر

ممكن تسال عند عمدة اللي جنب رامي الكهربائي اللي في صقر قريش المعادي :)

ألف شكر على ردك واهتمامك - ربنا يحفظك ويحفظلك عربيتك :)

هو مين الكهربائي اللى نفذ الشغل ده؟؟؟

اقتباس:

---

المشاركة الأصلية كتبت بواسطة fepsceasar

هو مين الكهربائي اللى نفذ الشغل ده؟؟؟

---

احمد مجدي

اقتباس:

---

المشاركة الأصلية كتبت بواسطة fepsceasar

هو مين الكهربائي اللى نفذ الشغل ده؟؟؟

---

سؤال وجيه - انا كان نفسي اعرف برضه. شكرا

هل حضرتك مركب حساس ركن خلفي برضه
ولو كان هل شاشه التنبيه لكل حساس ( امامي / خلفي ) مستقله ولا مشغلهم كلهم على شاشه تنبيه واحده
حضرتك قولت انك مركب 6 حساسات في الاكصدام الامامي و مجموعه التركيب اللي بتتباع بتكون فيها 4 حساسات وكمان الجهاز مجهز ب 4 منافذ بس ال2 الباقيين هل بيتباعوا فرداني وركبتهم على انهي فتحه في الجهاز

اقتباس:

---

المشاركة الأصلية كتبت بواسطة a7med_3omara

سؤال وجيه - انا كان نفسي اعرف برضه. شكرا

---

واحد اسمه احمد مجدي في المقطم , و باعتذر عن تأخر الرد , اول مرة اشوفه دلوقت

اقتباس:

---

المشاركة الأصلية كتبت بواسطة michohat

هل حضرتك مركب حساس ركن خلفي برضه
ولو كان هل شاشه التنبيه لكل حساس ( امامي / خلفي ) مستقله ولا مشغلهم كلهم على شاشه تنبيه واحده
حضرتك قولت انك مركب 6 حساسات في الاكصدام الامامي و مجموعه التركيب اللي بتتباع بتكون فيها 4 حساسات وكمان الجهاز مجهز ب 4 منافذ بس ال2 الباقيين هل بيتباعوا فرداني وركبتهم على انهي فتحه في الجهاز

---

انا مركب برده حساس ركن خلفي اه
و كنت بادور على جهاز يشتغل ورا و قدام على شاشة واحدة و ما لقيتش فجبت جهاز امامي كمان بشاشة مستقلة و خلاص لكن الصراحة منظر الشاشتين مع بعض سخيف جدا
بالنسبة للجهاز الامامي انا دورت لحد ما لقيت جهاز نازل معاه 6 حساسات و 8 منافد للحساسات , لكن بعد التركيب الجهاز ما شغلش غير 4 حساسات بس , و لحد دلوقت مش عارف ده عيب جهاز ولا محتاج اي configuration مثلا , لكن الصراحة هو جهاز اي كلام و انا حاليا بادور على جهاز محترم يشغل ورا و قدام على شاشة واحدة بس لسه ما لقيتش

بالنسبة للحساسات بتتباع فرداني اه

اسمع عن ان في ارابكوم في جهاز شغال امامي وخلفي بس اللي اعرفه ان اسعار ارابكوم عاليه وفي ناس بدئت تشكك في جوده بضاعتهم

مش عارف , ممكن ابقى اروح ابص

سؤال بقى. هو انا ينفع اركب حساسات و بعدين اوصل عليها اس شاشة. يعنى هل محتاج نوع حساسات معين او طريقة توصيل معينة؟ و للا كله شغال . علشان انا حركب امامي و خلفى في فلوانس ان شاء الله و حبقى احيبلها شاشة نافيجيشن امفروض انها بتقرى الحساسات