الموضوع: بين الاخذ بالاسباب و اراده الخالق

المشاركة الأصلية كتبت بواسطة hitman235

خلال برضه من 2011 لدلوقتى مريت بمشاكل شخصيه بشكل تحس انه مترتب ترتيب الاهى حاجه خارجه عن المنطق و الصدفه حاجه تحس انها مقصودة بحيس توصلك احساس انك مكروة من الله او مغضوب عليك بدون سبب مع انك مبتعملش اكتر من الى غيرك بيعمله يعنى لا بتسرق ولا بتزنى ولا بتتعاطى ولا بتأذى حد...
و بصراحه الضغوط النفسيه فاقت قدرتى على اللاحتمال اخر محاوله للتقرب لله كانت فى انى حجيت فى الموسم الى فات بس بصراحه حتى و انا بحج كنت بفتكر الى اذانى و ضايقنى و ضرنى و اتضايق حتى و انا فى الطواف ...

خليني أبتدي بمقولة "المؤمن مصاب", و دي حقيقة بنسبة كبيرة..
محدش قال أن طريق الأيمان ده طريق سهل أو سكته سالكة, و إلا كانت البشرية كلها ضمنت دخولها الجنة من الباب الواسع, لكن هو أصلاً مفيش باب واسع..
الحديد مبيزدادش صلابة غير لما يتسخن و يتضرب عليه بعنف..
نفس المثل ده ينطبق علينا أحنا كبشر, قوة أيمانك بتكون مرهونة بالتجارب الصعبة اللي عديت منها.. زي بالظبط الطالب الشاطر, أنت هتعرف بس أنه شاطر لما ينجح أنه يحل كل سؤال يعدي عليه صح..
هتفق معاك أن كتير بيعدي علينا مواقف صعبة مبنقدرش نفهم هي حصلت ليه و كتير بتسأل أشمعنا ده حصل معاك أنت بالذات في الوقت ده بالتحديد لكن مبتعرفش توصل لأجابة..
أنا هقولك على حاجة و عايزك تجربها بس معلش حاول تستخدم خيالك فيها شوية, حاول تتخيل نفسك كناقد فني بيتفرج على فيلم فيه قصة حياتك أنت بالتفصيل, حاول تعدي على كل المواقف الصعبة اللي فاتت على الشخص ده "اللي هو أنت يعني".. خلي تفكيرك كله كأنك بتقيم الشخص ده دلوقتي فبتبصله نظرة شاملة Overall بكل ماضيه و حاضره.. ممكن تستخدم ورقة و قلم و تكتب المشاهد اللي لفتت أنتباهك..
عايز أقولك أنك ممكن تلاقي نفسك بتضحك على تجارب كتير كنت شايف وقتها أنها مستحيلة, و يمكن تستغرب من تصرفاتك في مواقف تانية أفتقدت فيها الحكمة, و يمكن تضايق أوي من نفسك في مواقف تعاملت فيها بغير وعي..
أكيد أكيد لما تحط شخصيتك التخيلية "الناقد الفني" مكان شخصية بطل الفيلم " اللي هو أنت يعني " و تفكر أزاي هتتصرف في أي موقف من المواقف دي, هتلاقي نفسك بتتصرف بشكل أعمق و أكثر نضجاً عن ذي قبل..
هتلاقي أنك عمرك ما كنت تتخيل أن الموقف الفلاني اللي حصل مثلاً من 10 سنين فاتوا كان هيأثر في شخصيتك بعدها بالفترة دي كلها, لأ ده أكتر من كده, ده ممكن خلاك تكون سبب في تغيير ناس تانية غيرك عن قصد أو غير قصد..
فكرة الأطار الزمني "Time Frame" دي فكرة محدودة تتناسب مع طبيعة العقل البشري المحدود, فطبيعي في حاجات كتير بتحصل تبدو غير منطقية و يستحيل علينا فهمها لأنه ممكن يكون لسة مجاش ميعاد تعلم الدرس بتاعها..
لكن المهم بقى في ده كله أن التقرب الي الله هو السبيل الوحيد لتقبل مثل هذه الأمور, الله هو الوحيد القادر على أعطاءك البصيرة لترى حكمته في حياتك و في كل ما حولك..
بطبيعة الحال الشيطان دايماً بيدور على أضعف منطقة للشخص و يبتدي يركز الضرب فيها, فخد بالك من النقطة دي..

كفاية كده عشان حسيت أني رغيت كتير.. lol

تخيل ان انا مثلا واحد صاحبك و كل ما بتعوز مني حاجه بقل معاك كل ما تطلب مني حاجه مبتاخ ش عليك .. بس في مره طلبت مني حاجه رفضت لسبب ما ... خلاص كده بقيت مش صاحبك... بقيت مبحبكش ؟؟

طب قبل متزعل علي الحاجه الي نفسك تتحق و بتدعي ربنا عشانها شكرت ربنا علي النعم الكتير الي عندك

شكرا يارب انك مكتبتش عليا اكون اعمي
شكرا يارب انك مكتبتش علي اكون اصم
شكرا يارب انك مكتبتش عليا اكون فقير ... اكون عندي مرض خبيث ... اكون مشلول ... !!

المشاركة الأصلية كتبت بواسطة hitman235

بقالى فتره مش قليله بحاول ايه النظام الى الدنيا ماشية بيه و مش لاقى حل
هل الموضوع اخذ بالاسباب يعنى الى يجتهد يلاقى و لكل مجتهد نصيب ولا ده كلام فارغ
ولا اخذت او ما اخدتش بالاسباب اراده الخالق هى اللى هتم
يعنى الى عنده مشكله هل سبب المشكله تصرفاته ولا الاراده الالهيه
طيب فرضا خلاص فيه مشكله و عايز يحلها و اخذ بالاسباب برضه ما اتحلتش
هيلاقى المستشيخ يقول سيبها على الله
طيب سابها على الله و دعا فى المسجد النبوى و دعا فى العمرة و دعا فى الحج و برضه ما اتحلتش
يعمل ايه تانى
يمين شمال مافيش فايده التجاء للدين او الكفر بيه برضه مش هيحل دعيت مدعيتش برضه مافيش فرق
تواكل او السعى و الاجتهاد برضه مافيش

السؤال هنا واحد كان على قدر هقول مش كبير يعنى ضعيف من الايمان بس على الاقل موحد و بيصلى بعض الفروض و مؤمن بأن فيه الله عادل يجيب الدعوات ............ دعا مرتين تلاته و تلاته مليون ....... مافيش اجابه دعا فى البيت و فى المسجد و فى الكعبه و فى عرفات برضه مافيش دعا الصبح و الظهر فى الفجر و وقت نزول المطر برضه ولا الهوا .......... بعد كل ده صديقه او صاحبه او جاره او واحد فى الشارع حياته ماشية من غير ما يقول يارب ........
الى بيدعى و حاله مش بيتغير ده مش يجيله وقت يزهق ...وقت ييأس و يحس ان الى خلقه خذله وقت ما كان محتاجله زى بالظبط واحد خلف واحد ورماه فى الشارع ........الى بيدعى و يأس ده مش هيجيله وقت يبطل دعاء ثم يبطل صلاه ثم يحس ان الخالق بيكرهه مهما عمل كويس مهما حاول يلجأله و يطلب المساعدة مش هيحس ان ماقدامهمش الا طريق ابليس الى يكرهه فى الدين و يشجعه على التطاول على الدين و كره الخالق ذاته .....

انا مخى شت كتير و عملت كل حاجه غلط و مشيت يمين و شمال و فوق و تحت
و فى الاخر الحقيقه واحده لكن المشكله الكبيره ان الواحد علشان يوصل للحقيقه دى شىء صعب جدا رغم انه ادام عيون الجميع
انا هلخصلك الموضوع
*فى البدايه لازم تفهم اننا بنعمل كل حاجه بتحارب الله و دينه و ده ميكانيزم اجتماعى و فردى
و ان الله بيقول (ان الله غنى عن العلمين) ده مش جاى من فراغ هو فعلا متعال و اكبر من اى حد
طيب هو اداك كتالوج تمشى عليه فى حياتك و هو اللى خلقك و عارف احسن منك , لو مشيت على الكتالوج ده هيبقى اقرب اليك من حبل الوريد رغم انه متعال و مش محتاج حد لكن هيقف جنبك و مش هيسيبك
و لو ممشتش على الكتالوج هيكون برده موجود بيديك اشارات علشان تحاول تتفكر فيها علشان ترجعله
و كل واحد حر فى كيفية تفكيره
طيب الله بيقولك لا تتعامل بالربا ليه ؟ علشان الربا استغلال و ابتزاز و سيطره من قبل الغنى على الفقير
الله مش عايزك تكون ضعيف و مش عايز حد يتحكم فى رقبتك , تقوم انت (الناس يعنى ) تتعامل بالربا بل و تدافع عن الربا طيب انت واحد جاهل عايز تأذى نفسك و الكتالوج موجود ادامك مش باصصله و رايح تدخل نفسك فى عبوديه لبشرى مثلك مخلوق من الطين

- يَا أَيُّهَا الَّذِينَ آَمَنُوا اتَّقُوا اللَّهَ وَذَرُوا مَا بَقِيَ مِنَ الرِّبَا إِنْ كُنْتُمْ مُؤْمِنِينَ * فَإِنْ لَمْ تَفْعَلُوا فَأْذَنُوا بِحَرْبٍ مِنَ اللَّهِ وَرَسُولِهِ

طيب الناس متعلقه بالماديات و هى اساس حياتها , لكن عند الله الموضوع مختلف

-لَوْ كَانَتِ الدُّنْيَا تَعْدِلُ عِنْدَ اللَّهِ جَنَاحَ بَعُوضَةٍ مَا سَقَى كَافِرًا مِنْهَا شَرْبَةَ مَاءٍ


طيب ييجى بقى عيل ابن امه متدلع و مقضيها او واحد متعين بالواسطه فى مكان له سلطه او جاه او واحد فرحان بالدبابه اللى معاه و عمال يتصور بالبدله الميرى و يقتل فى خلق الله زى الامريكان و من يدور فى فلكهم , دول مش عارفين ولا فاهمين يعنى ايه سنن

-وَأَمَّا ثَمُودُ فَهَدَيْنَاهُمْ فَاسْتَحَبُّوا الْعَمَىٰ عَلَى الْهُدَىٰ فَأَخَذَتْهُمْ صَاعِقَةُ الْعَذَابِ الْهُونِ بِمَا كَانُوا يَكْسِبُونَ


-أَلَمْ تَرَ كَيْفَ فَعَلَ رَبُّكَ بِعَادٍ 6 إِرَمَ ذَاتِ الْعِمَادِ 7 الَّتِي لَمْ يُخْلَقْ مِثْلُهَا فِي الْبِلَادِ 8 وَثَمُودَ الَّذِينَ جَابُوا الصَّخْرَ بِالْوَادِ 9 وَفِرْعَوْنَ ذِي الْأَوْتَادِ 10 الَّذِينَ طَغَوْا فِي الْبِلَادِ 11 فَأَكْثَرُوا فِيهَا الْفَسَادَ 12 فَصَبَّ عَلَيْهِمْ رَبُّكَ سَوْطَ عَذَابٍ 13 إِنَّ رَبَّكَ لَبِالْمِرْصَادِ 14

-فَالْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ آيَةً وَإِنَّ كَثِيرًا مِّنَ النَّاسِ عَنْ آيَاتِنَا لَغَافِلُون

يا بيه النبى محمد لو موجود فى بلاد العرب الان لقتله الناس الذين يدعون الاسلام


الخلاصه
كل واحد بتقوم قيامته لما يموت , ولا الدولار هينفع حد ولا الدبابه ولا الموامس
حيرتك هتنتهى اذا عرفت كيف تنظر الى الامور , طمس الله للقلوب دى فعلا صدقنى حتى لو انت مش فاهم دلوقتى بس حقيقى هى اسوأ شىء ممكن يحصل لبشرى , لان محدش ولا اتخن تخين فى الدنيا يقدر على الله واحد مخلوق من شوية تراب و بيتكبر فى اسوأ من كده ايه ؟ !!

تحية للأخوة الزملاء ول banzai خصوصا لأنى سبق أنى هاجمته فى أحد مواضيعه قديما وقد تبين لى الآن سوء تقديرى للأمور فأنا أستغل الفرصة وأعتذر له.

الأخ صاحب الموضوع : لن أزيد على كل ما قاله الزملاء الأفاضل بس عندى ملحوظة واحدة احب اشاركها معاك اذات سمحت وفكر فى معناها كويس اوى هترتاح

الله سبحانه وتعالى لا يُجرب... الله يُعبد ويُسلم له الأمر مطلقا

مينفعش نقول انا دعيت ومفيش فايدة ابدا لأن ده بينطوى على سوء فهم مطلق للحقيقة

قليل اوى من البشر اللى عندهم الموضوع ده بنسبة 100%. لكن كل ما زادت النسبة دى فى القلب كلما ارتاح العبد وهدأت نفسه.

الله يوفقنى ويوفقك ويوفق الجميع لما فيه الخير وصلاح الحال.