الموضوع: بين الاخذ بالاسباب و اراده الخالق

الكلام سهل لكن فيه ناس الواقع بتاعها مش هيتغير و لو سجدت سنين ضوئية

طب ما تقلنا اهدافك ايه اللى متتحققتش لحد دلوقتى ، يعنى عرفنا التفاصيل بدل الكلام العام

يمكن نقدر نساعدك

فى الافلام لما بيجيبوا واحد بيدعى البرق و الرعد يشتغلوا و العربية تنقلب و الشبابيك تنقفل و تنفتح
بس فى الحقيقة انت لما بتدعى بتحس براحة نفسية و تحمد ربنا انه خد بأيده و خلاه فى وسط الهم و الغم يعرف ان هناك رب رحيم تلجأ اليه وقت الحاجة و تحس انه بالرغم من تخلى كل الناس عنك فيه رب يسمعك و حاسس بيك

فى فيلم رابعة العدوية مثلا جايبين لما كانت بتدعى مصباح بقى حوالين راسها و الناس يخبطوها بالطوب و ما يحصلهاش حاجة
اذا كان الرسول صلى الله عليه و سلم كان المشركين بيأذوه و كانوا بيحطوا امعاء و احشاء الحيوانات عليه و فى غزوه أحد اتعور

الدعاء مش مجرد استجابة لطلب الواحد بيطلبه
الدعاء دنيا تانية دنيا تحس بيه بوجود ربنا جنبك و تحس بيه و هو بيسمعك
فى اوقات ببص على السما و عارف ان مافيش حد فى العالم حاسس بالوجع اللى انا فيه الا ربنا

هو الدين حل للاكتئاب ولا حل للمشكله ذاتها
هو ده السؤال لو على الاكتئاب فليه علاج و مسكنات و حتى مخدرات
لكن المشكله ذاتها حلها ايه؟ فرضا فرضا ان عصر الممعجزات الاهيه انتهى و ان المنطق يحكم و مش فى ايدك تغيره
طيب هتقول ما ادام الحل فى ايدك ما تتصرف هقولك الحل مش فى ايدى لأن فيه ثوابت ما ينفعش تغيرها من ضمنها اتولدت غنى ولا فقير و عيشت ماضيك ازاى مبسوط ولا متكحرت
زى المنطق الى بيقول ان الفقراء اكتر ناس بتمرض و اكتر ناس بيحصلها مصايب و اكتر ناس لو راحت قسم شرطه بتاخد على قفاها يعنى القرف من كل النواحى مش من ناحيه واحده بس علشان الناس الى بتقول ان الارزاق متوزعه بالتساوى
الفقير مش معاه ثمن العلاج ولا ثمن الاكل ولا ثمن اى حاجه و لا حتى فى ايده يحسن من نفسه لأنه تحت الصفر بداء من تحت الصفر و فيه غيره بادء من فوق الصفر و انطلق و انت بتجاهد علشان تعيش عيشه بنى ادمين مش حيوانات ...
تسأل نفسك بقى ايه الى وصلك لكده و انت توصل لبدايه موضوعى
هل الدين حل للمشكله ولا مجرد مسكن ؟
انا معاك انى لما بصلى و بدعى بستريح بس المشكله هيا هيا .... زى واحد فقير مريض هيدعى ربنا هيستريح نفسيا و هيبقى راضى بس مش هيخف الا بالعلاج الى مش معاه تمنه و بنسبه 90% لو ما اخدش العلاج هيموت زى اى كلب فى الشارع ....
الدنيا ماشية بأيه بالاخلاق الحميده و السنه النبوية
ولا بالقوانين و الثوابت الى بتقول البقاء للاقوى و الى بيطول حاجه بيعملها و كلها مصالح و الى يقف قدام مصلحتى ادوسه
الدين و الدعاء ممكن يخلينى اهدى نفسيا يبعد عنى الشياطين و الفواحش بس هيساعدنى انى اتغلب على شيطانى الشخصى لكن هل ده كفايه ....
هل هيساعدنى انى اتغلب على شيطان المدير الى بيقرفنى و لا اتغلب على شيطان الحكومة الرشيده الى بتنهب فلوس الناس نهب ...ولا شيطان اخوتنا المضاربين و السماسره الى خلو سعر الشقة فى مصر اغلى من سعرها فى امريكا ولا هيرجع الامن بدل ما كل شوية طفل يتخطف و يتباع قطع لتجار الاعضاء ...
فيه خط فاصل بين الى تطلبه من ربنا و تنتظره و بين الى بيجيلك فعلا ده الى محيرنى

انا ممكن اطلب انى ارجع بالزمن و اختار اهل غير الاهل و سكن غير السكن و عيشه غير العيشه و بلد غير البلد و ادعى بده طول حياتى هل ممكن يتحقق ؟

انا مش يائس من قدره الله او رحمته بس خايف اكون منتظر شىء مش هيتحقق و افضل طول عمرى عايش فى اوهام

مش قادر اوصل لنقطه تحصيل الرزق و تقسيمه و السعى ليه كل سبب المشكله انى ما سعيتش كويس طيب ما غيرى سعى اقل من كده ووصل لأكتر من الى انا وصلتلته هل الموضوع مالهوش علاقه بالسعى و هى ارزاق مقسومه يبقى ليه اسعى اساسا
على قد التعب بتكون النتيجه ؟ ولا على قد الوسايط من الاهل و الاحباب و المعارف ؟ و الى بيطول حاجه بياخدها


الدعاء و التضرع و الصلاه و الذكاه كل شىء كويس روحيا و نفسيا و بتهدى فعلا و انا مع انى مش مواظب و بعيد عن الدين كليا حاليا لكن اعترف انى لما بعمل كده ضيقى بيقل كتير جدا لكن عمليا ؟؟؟ الحل ايه لأى مشكله بتقابلك تدعى بس ولا تدعى و تسعى ولا تسعى و تدعى و فى الاخر تفشل ؟!

المشاركة الأصلية كتبت بواسطة mohamed.ramah

طيب انا فهمتك بس انت بتحسن الظن بالله علشان لو انت بتدعى ومن جواك لا انا هفضل كدة او بتحس انك بتدعى وكانة تحصيل حاصل ربنا مش حيحاسبك على الكلام الاعمال بالنيات ولكل امرئ ما نوى - ثانيا انت اتكلمت عن الرضا لو انت مش راضى لية بتخلق لنفسك مشاكل وعاوزلها حل مشكلتلك انك مش عارف تجيب شقة ولا عربية ولا عارف تسافر برة مصر

موضوع الشقة فية ايجار جديد او مقدمة صغيرة وفى وحدات حتطرح قريب ومصر مليانة اشكال وانواع وكل مستويات الشقق والمساحات والمواقع وفى ايجار جديد وطالما انت ناوى خير الزواج ربنا هيكرمك بس ابدأ انت وتوكل عى الله

موضوع العربية فى ناس كتير معاها عربيات وبتشتكى وفية البيركنها وبيركب مواصلات انا فاهم عاوز تجربة شعور تركب عربية نضيفة من حقك بس الامور كلها مش مرة واحدة حتتحقق على قد سعيك وخلى بالك انت لو فضلت تجرى وتعمل كل حاجة وربنا رايد بشىء معين فى النهاية هو الهيكون فأحسن الظن بالله وتذكر قول الله تعالى أَنَا عِنْدَ ظَنِّ عَبْدِي بِي ، إِنْ ظَنَّ بِي خَيْرًا فَلَهُ ، وَإِنْ ظَنَّ شَرًّا فَلَهُ.

ولا تفتكر ان اى حد مبيدعيش حتى ومعاة فلوس او اصلاً من كتر مشاغلة وحياتة البتلهية وبيزيد وبيكبر وانت عارف انة مبيركعهاش حتى دة كدة علشان قانون الحياة والبقاء للاغنى والافضل ربنا قال عنهم ان جنتهم هى دنيتهم وربنا بيزيدهم اكتر واكتر بس دة مش رزق ربنا لا ربنا يمدهم فى طغيانهم و ليهم عذاب عسير خسرو دنيتهم واخرتهم وحتى لو راحو وعملو 100 حج

( قل هل ننبئكم بالأخسرين أعمالا ( 103 ) الذين ضل سعيهم في الحياة الدنيا وهم يحسبون أنهم يحسنون صنعا ( 104 ) أولئك الذين كفروا بآيات ربهم ولقائه فحبطت أعمالهم فلا نقيم لهم يوم القيامة وزنا ( 105 ) )

ومتنساش ان الرسول سيدنا محمد صلى الله علية وسلم كان عايش فى اية ولا كان بيفكر يجيب عربية حديثة مع انة بيتحدث مع لله سبحانة وتعالى وهو نبى الله ولا كان مستنى شقة فى مكان فى بلد معينة !

اوعى تفتكر ان كلام ربنا هين وان الدين مسكنات ربنا سبحانة وتعالى خزائنة ملىء السموات والارض يقول للشىء كن فيكون بس انت محتاج ترتب افكارك واستعيذ بالله وتدور حاجة حاجة عاوز تبدأ بيها وتدعى ان ربنا ييسرلك وياريت لو حوشت مبلغ صغير وتقدر تعمل عمرة هيكون افضل وربنا بأذن الله يحققلك ما تتمناة فادعى ولا تنسانا من صالح الدعاء .

حضرتك انا مشكلتى مش ماديه
و بدل العمرة عملت 3 و حجيت اخر موسم و كاتب ده فى موضوعى... و مشكلتى مش مشكله ماديه او على الاقل حاليا
ولا مشكلتى انى اجيب شقة و عربيه ولا هجره حتى .كل ده ممكن حله بالمجهود و التخطيط و لو ماوصلتش للى انا عايزه حتى فده نتيجه كسل منى و انا عارف كده ...و انا مش قاعد فى مصر اساسا ولا ناوى استقر فيها .. لكن المشكله انى علشان اوصل للى انا فيه بدايه من وضع كان صعب ماديا و ظروف ملطشه ... جه على حساب حاجات تانيه مهمه يمكن لو ظروفى الماديه كانت ميسرة فى بدايه حياتى كانت الدنيا اتغيرت الغربة ليها تمن زى اى شىء ليه تمن بس مش كل الناس بتدفعه و برضه نرجع لنقطه الصفر لو كنت مستريح فى مصر ماديا ايه الى كان هيخلينى اسافر .....على الاقل فى الوقت الى سافرت فيه تحديدا ....
كل ده وصلنى لنقطه انا مش يائس او بشكك فى قدره لله او رحمته لكن يائس من انتظارها لدرجه خليتنى اتشكك هل فعلا كل شىء ربنا بيكتبهولنا خير حتى لو ظاهره شر لينا ؟