عودة الى المنتدى الحبيب بعد طول غياب .. بس المرة ديه فيه حاجات جديدة
واحشيننى مووووت يا اعضاء نايل موتورز .. اتعودت عليكم و ما صدقت رجعت تانى عشان اسمع اراءكم الجميلة
سلامى الى كل الاعضاء و الادارة و المشرفين و كل القائمين على الموقع الجميل ده
ممكن تكونوا نسيتونى شوية و ارتحتوا من مشاكلى شويتين بسبب حبى الغير معهود لهيونداى بس ان شاء مايكونش حد زعلان و لا حاجة خلاص الحكاية انتهت و النترا اتحجزت و مفيش مجال للعودة :)
اولا : انا قررت ابعد شهر شهرين كده بعد حملة الهجوم الرهيبة على هيونداى و حملة الهجوم و العقوبات الرهيبة عليا انا و عشان ما يتحرقش دمى كتير و اسمع كلام ممكن يأثر على قرارى عشان كده بعدت لحد ما اقرر هشتري ايه و ارجع بعد كده للمنتدى الحبيب
ثانيا : رجعت دلوقتى عشان اطمن عليكوا و اتأسف عن اى حاجة عملتها او اى رد حاد قلته قبل كده
ثالثا : تواجدى هيبقى قليل اوى لان الدراسة فى الكلية بدأت و مفيش وقت خالص للنت و كمان عندى امتحانات كمان اسبوعين و ديه كلية بترول مش اى كلام
رابعا : للى لسة ما يعرفنيش انا اسمي ايهاب عبدالرحمن نصار من المنوفية طالب بكلية هندسة بترول و تعدين السويس متواجد فى المنتدى من شهر 5 تقريبا
خامسا : الاخبار الجديدة انى خلاص قررت النترا بس بعد ما خلاص كنت هشتريها لقيت السوق بتتدمر و اسعار العربيات بتنزل و النترا نفسها نزلت حوالى 6 الاف جنيه فى اسبوعين و لسة هتنزل كمان حسب معلومات مؤكده من مهندس زميلى فى غبور قررت استنى شوية و الفلوس موجودة اهيه :)
سادسا : ياريت ما يبقاش اى فيه نصائح بخصوص سيارات تانية او اى تعليق (سيئ) على النترا لانى خلاص قررت و مش هغير مهما حصل لانها سيارة الاحلام بالنسبة لى و فعلا بقيت بموت فيها و كل يوم اسمع عنها حاجات كتيرة حلوة
سابعا : فى اول دخولى فى المنتدى بعد الغيبة ديه لقيت رسايل خاصة محترمة من ناس محترمين بيحاولوا يطيبوا خاطرى و يرجعوا الود بينى و بين بعض الاعضاء و فى نفس الوقت رسايل تانية قذرة فيها سب و شتم و لوم و رديت عليها كلها بكلمة واحدة " ربنا يسامحك"
ثامنا : ارجو اى نصائح للقيادة او نصائح خاصة بالنترا و الصيانة و الكلام ده عشان انا التلميذ و انتوا المعلمين الخبرة بجد :)
تاسعا : اتمنى ليكوا كل خير و ربنا يحفظكوا من كل شر يا رب
اخوكم فى الله م/ ايهاب نصار