الموضوع: مقارنة كورولا 2015 او فوكاس 2015 محتاار جدا ارجو المشوره

السلام عليكم
الموضوع زي ما هو باين في العنوان
انا محتار جدا جدا

عقلي بيقولي كورولا
وقلبي بيقلي فوكاس

عايز عربيه اداء واعتمادية واستخدام يومي بدون اعطال مفاجاه ولا مشاكل ولا مصاريف تشغيل مكلفه

وحقول وجهة نظري بس استحملوني حطول شوية
ويا ريت حد يدلني عالصح
لو مكاني تعمل ايه او تفكر ازاي


1_اولا نيجي ل كورولا 2015 عربيه لا يعلي عليها لكن
انا معايا كورولا 2011 وقبلها 2012 وياريس 2011 2009 و2008 مرورا بسيفيك 2002
سياراتي الشخصيه وليست لاخوتي او والدي ببدل ياباني بياباني علطول
يعني عارف الكورولا والتويوتا ظهرا عن قلب ومريحاني جدا جدا جدا
ومصاريف علي قد الجيب

وعقلي بيقلي هات كورولا
سحب وثبات واعتمادية وقلة اعطال وتكييف واعادة بيع وكل حاجه
ووضع السواقه في كرسي السائق مريحني اوي والدريكسيون قريب منك مش لازم تفرد دراعك للاخر زي الالنترا يعني هي تمااااام
بس عندي مشكله
ان الشكل الجديد مش عاجبني من بره ولا من جوه خااااااالص عكس الشكل القديم اللي معايا (كلها ازواق طبعا عشان محدش يتضايق )

يعني كل ما ابص للعربيه من بره اتضايق اوي احس ان فيها حاجه غلط في شكلها خصوصا من الخلف
وتحس انها صغيره كده او كومباكت كنزة شويه من بره
ومفهاش الفخامه المطلوبه علي قد فلوسها مثلا



اقول مش مشكله اقعد جواها
الاقي التابلوه كانك قاعد في مكروباص او العربيات الشيفروليه الكابريس القديمه
وتحس ان التابلوه اعلي من مستواك وشكل عصاية الفتيس عره اوي الصراحه
حتي مش حاطين علي العصاية الجلد زي اللي في السيراتو مثلا
والكونسول اللي في النص مش اوي عكس كونسول الالنترا مثلا او حتي الشكل القديم كان نازل انسيابي كده
وتحس انه قاسم التابلوه حتي درج التابلوه وفتحات التكييف شكلهم مش حلو
حتي الطاره بالمالتي اللي فيهم شكلهم شعبي اوي
طبعا كلها ازواق عشان محدش يزعل من ملاك الشكل الجديد



صورة عصاية الفتيس


العصايه مش متغطية بجلد زي السيراتو الفئه الاقل مثلا





تابلوه وفتيس الفوكاس



دي صوره للفول اوبشن كورولا بس شكلها مش قد كده برده
وتقريبا مش دي اللي في مصر بس برده عشان تكون الصوره كامله





يعني بعيدا عن اسم العربيه وتاريخها وكل شئ بس الشكل بس اللي مش مالي عيني لا من بره ولا من جوه لكن انا عارف انها عربيه كاداء واقتصاديه لا يعلي عليها

2_ نيجي للفورد فوكس
العربيه تصميمها رااااائع بالنسبالي اول ما بشفها بتشدني جدا جميييله جداا




والتابلوه بتاعها رهييييب اول ما تقعد فيها تحس ان العربيه بتحتويك






تصميمها مرتب وبسيط من الخارج


بس المشكله ان كل الناس بتخوفني من الفورد فوكاس بالزات واعطالها وكده مش عارف ليه
والصراحه عمري ما جربتها لمدة طويله ومش مع حد من اصحابي عشان اقيم اداءها او اخد الخبره عن تجربه من الواقع مش ريفيوهات اليوتيوب بس
بس شكلها عاجبني جدا

لو مكاني تنصحني بايه مع المعطيات دي
معلومه علي السريع
1_انا دماغي عملية جدا في العربيات
يعني انا كائن مش توكيلاوي خاااالص يعني عمري ما حروح احجز موعد واضرب مشواار واقعد كم ساعه عشان اغير زيت في التوكيل وميهمنيش موضوع الضمان اوي
محدش بياخد حقه في مصر اصلا وانا بالي مش طويل للمشاكل
يعني موضوع التوكيل وخدمة ما بعد البيع والحاجات دي مش اوي
بس اللي يهمني ان قطع الغيار تكون في اي مكان مش لازم الف عليها كتير
واي مركز خدمه ممكن يادي الغرض
علما اني من مدينة اقليمية يعني مش عايز اضرب مشوار القاهره عشان الاقي اي حاجه
ودي ميزة الكورولا اللي معايا قطعها موجوده في بلدي واي ميكانيكي بيشتغل فيها الي حد ما
بس مش عارف ايه نظام الفورد فوكاس ولا الكورولا الجديده
لان انتوا عارفين في مصر ممكن تنزل من بيتك تلاقي وكتوك تاكسي تروسيكل خابطلك الرفرف ولا االفانوس
وربنا يعوض عليك يا بيه دي عربية اكل عيش والكلام ده

2_الصراحه مش كل الكماليات بتهمني
يعني الاوتو بارك حتي حساسات الركن وتسخين المقاعد والحاجات دي مش بتهمني اوي
بس اللي يهمني الثبات رقم واحد ووسائل الامان والفرامل وكده
abs والحاجت بتاعة الثبات دي
والتسارع والسحب
لاني بشد شويه وبحب الجري الي حد ما

معرفش الفورد ولا التويوتا اي واحده احسن فيهم الصراحه

3_ سعر اعادة البيع
الصراحه النقطه دي مش هي الاساس برده
لان العربيه اللي حجيبها حتكون عربية للعمر الي حد ما او حتقعد فترة طويله فمش لازم النقطه دي اوي
بس الصراحه برده مش عايز حاجه تكون واقعه عالاخر يعني
برده عشان اكون ماسك العصايه من النص لان انتوا عارفين في مصر العربيات غاليه وتعتبر جزء من راس المال وممكن لا قدر الله تتضطر تبيعها في اي وقت

4_رابعا وده الاهم بالنسبالي الصراحه مش مهم اسعار قطع الغيار اوي
لان معظم الجديد قطعه الاصليه نااار
بس اللي يهمني اوي اوي اوي
مصاريف العربيه زات نفسها يعني running cost زي ما بيقولوا
يعني تدور وتمشي مش كل يوم اعطال ولا كمبيوتر ولا حساسات ولا الحاجات دي اقتصادية في البنزين
وكده يعني
ودي ميزة الكورلا اللي معايا بتتخبط كل شوية بس بقضيها بفانوس مش اصلي لحد ما ربنا يسهل وكده واي كهربائي بيركبه عادي مش قضيه
بس معرفش برده الجديده والفوكاس ايه نظامهم

يعني من الاخر 1_العقل مع الكورولا بس الفل اوبشن بتاعها معدي 200 الف
تعليقا عالسعر ((برده سعرها اووفر الصراحه حاسس انها نطت في فئه اعلي منها الي حد ما ))
او اغلي من قيمتها الفعليه
وخايف ادفع مبلغ جامد في حاجه بس كل ما تبصلها متبقاش ماليه عنيك

و25_القلب مع الفوكاس بس مش عارف ايه ظروفها غير الشكل الحلو



معلش طولت عليكم
بس محتار جدا
لو مكاني ونفس تفكيري تعمل ايه
تستغني عن الشكل شوية مقابل الاداء والمميزات
ولا حرام تدفع 200 الف في حاجه حاسس انها اقل من تمنها
انا عارف محدش بياخد كل حاجه بس الافضل ايه


انا ممكن احط حاجه تانيه في الاختيار عادي
1_فنتازيا




انا الفانتازيا ركبتها مع صاحبي رغم ان شكلها متغيرش اوي ومش شبابي شويه وشكلها solid كده من الخارج يعني مفهاش حاجه جامده في التصميم بس مالية مركزها ولها هيبه عن الكورولا الي حد ما
وقعدتها من جوها كانت عجباني شوية وتحس بفرق التقفيل من الداخل عن الكورولا


بس المشكله مصاريفها كتير علي زميلي ومره خبط في الاكصدام الامامي دفع 12 الف جنيه علي شوية حاجات
ايه التعليق علي النقطه دي ومصاريف تشغيل العربيه
غير برده موضوع الفتيس ال dsg اللي ماشي اليويمن دول بس محدش اشتكي قدامي بقرا علي النت بس الصراحه

2_الفلوانس


بقرا كتير عن مميزاتها هنا في المنتدي
بس سقتها ولقتها مش وهم زي ما هو مكتوب هنا الصراحه من ناحية العزل والثبات
حلوه بس مش وهم يعني
غير ان شكلها من بره مش للدرجه يعني

3_كروز




عربيه شكلها جميل جدا من بره والتابلوه بتاعها جامد وشكله مرتب في التصميم
بس مش عارف ايه ظروفها كاداء واعتماديه وثبات وكده

4_استرا



شكلها حلو من الخارج مشفتهاش عالحقيقه بس ممكن كنزة شوية
والداخل تابلوه جميل جدا انا بحب التصميم ده
بس مش عارف ايه ظروفها برده كاداء واعتمادية واستخدام يومي

والسلام ختام
ولا خاب من استشار
شكرا

الحمد لله الواخد خد نفسه شويه
بما اننا لسه بنشرك في الفوكس اخر مشكله هي مشكلة الفتيس هي صحيح مش مشكله كبيره يعني لكن لازم تذكر و هي ان الفتيس الباور شيفت زي كل الفتايس الDCT بيبقى ليها تسارع مرعب بس مشكلتها في التردد في نقل السرعات في الزحمة بتحس بنتشته مع كل نقله انما اطمن هو مش بيبوظ زي الDSG بتاع الفولكس ( اللي بالمناسبة موجود في الليون و ما بقاش موجود في الاوكتافيا) لان الباور شيفت wet type مش dry type زي الDSG
الاسترا ( اخيرا وصلنا للاسترا) ( الشكل الجميل و في رايي المتواضع هل اجمل عربية في المجموعة- جودة الخامات الداخلية و التقفيل و شياكة التابلوه قصاد الضيق الداخلي- توكيل منصور الحرامي- بنزين ٩٥ - الاداء اللي اقل من الكورولا و الفوكس بس اعلى من الفلوانس و الفانتازيا في التسارع و في الثبات تيجي بعد الفوكس و الفانتازيا متفوقة على الكورولا و الفلوانس)
الفلوانس ( السسسسسسسسسسسعر وده لوحده ميزه مرعبة لانك مش حتاخد كمية الاوبشن ده و الراحة دي بسعر يقل عن اقرانها في المقارنة بحوالي ٤٥ الف جنية و بالنسبة للفئة السعرية المتواجدة فيها الفلوانس ما فيش حد جنبها اصلا- جودة الخامات الداخلية- الاعتمادية المتوقعة لان الماتور و الفتيس من نيسان- التوكيل- كمية الاوبشن - حجم الشنطه قصاد تسارع و ثبات ضمن الاقل في المجموعة-اعادة البيع و ثقافة الخوف من الفرنساوي- شكلها مش عاطفي و خصوصا من الخلف)
بالمناسبة قصة الماتور بتاعة الفلوانس الفيس ليفت خلصت في التوكيل خلاص
الفانتازيا معرفش في منها جديد و لا لأ و لو ان اعتقادي لأ اما الA7 الجديدة مش حتكلم عنها لانها برغم انها عمليا فئة c segment بس التوكيل بيستهبل و بنزلها بسعر يخليها بره المقارنة دي فعليا

نيجي بقى للنقتطين الاهم و هما الهدف من المشاركة اصلا
١ تختار ايه لان واضح ان حضرتك زهقت من ركوب اليباني و عايز تجرب الاوروبي اللي هو ركوبة مختلفة باحاسيس سواقة تانية بس ده قصاد انك حتخوض تجربة مش مريحة زي اليباني اللي حضرتك متعود عليه و علشان ما ترجعش تندم ( اللي راكبين عربيات فرنساوي و الماني بيقدر تماما اختلاف العربية و تميزها و بيستحمل علشانه قرفها البسيط و لو ان الجديد كله لو حضرتك بتاخد بالك من العربية حيقعد معال من غير مشاكل لفترات طويلة لانها عربيات حمالة قسية بجد) و القصة دي لها حلين
الاول انك تجرب تركب العربيات دي ( الفوكس- الاسترا- الليون- الفلوانس- الفانتازيا) لمده شهر مثلا اذا كانت مع صديق او عن طريق الايجار و تجرب نفسك حتستريح و لا لأ
التاني اذا كنت مستريح في اليباني بس شكل الكورولا هو بس اللي مش عاجبك فعندك حلول كتييير زي المازدا ٣ الجديدة ( شكل حلو جدا من بره مع انتريور رهيييب في الشكل و الخامات و التقفيل من جوه- اوبشن محترم في الهاي لاين- اعتمادية عالية- ثبات محترم جدا قصاد تسارع هو الاسؤا على الاطلاق في كل ما ذكرنا- توكيل غبور اللي ما يفرقش عن منصور- سعر مبالغ فيه جدا و خصوصا في الهاي لاين)
بص كمان في طريقك علي السيفيك ( مع كل تحفظاتي) و النيسان سنترا و السوبارو امبريزا و اخيرا الشارك اذا كان الاوبشن مش فارق مع حضرتك كتير
في الاوروبي بص مرة كده علي الاسكودا Yeti ( عربية اوبشنها قليل بس رهيييبة في كل حاجة تانية) و كمان على البيجو ٢٠٠٨ ( هي صحيح فئة اصغر مما سبق بس اديها نظرة و خصوصا ان ماتورها ١٥٦ حصان)
و مبروك مقدما