إزاي أتعلم الإنجليزية من الأغاني ................... !!؟؟؟

**Mahmoud Naguib** · 03-12-2014 05:17 PM

كنت قرأت أكتر من مرة عن الطريقة دي وفاعليتها ف إنها تخليك محترف ف النطق والإستماع وكدة

بدأت أعمل بيها فعلا بس المشكلة إني مش عارف ليها قواعد

زي إنه في أغاني نطقها مش بيكون واضح
أو اللهجة مش صح
أو سريعة بدرجة كبيرة

فكنت حابب لو حد عنده خبرة ف المشوار ده يدلني على أفضل أغاني مثلا ممكن أستفيد منها
وهل أسمع الأغنية الأول أكتر من مرة وبعدين أشوف الكلمات ولآ اشوف الكلمات مع الأغنية
والترجمة مهمة ولآ لآ !!

ومين المغني اللي ممكن أستفيد منه لما أسمعله ؟؟

ولو في طرق تانية لتعلم الإنجليزية ياريت يوضحها

شكرا

**mastr_n** · 03-12-2014 06:04 PM

بص هاقولك على حاجة حلوة

فى موقع اسمة lyrics.com دة علية كلمات اى اغنية لاى مطرب و اى فرقة
الاول هاتسمع الاغنية وتعصر دماغك انت تفهم كلماتها وبعد كدة تسمعها وانت بتقرا كلماتها

انصحك ماتسمعمش راب مش هاتفهمة لانها لغاتهم العامية ومش هاتفهمها الا لو عشت هناك واتكلمت بيها

**besso** · 03-12-2014 07:31 PM

حاجه كمان
ابتدي بالاغاني الهاديه
وتركز مع اغنيه واحده كتير لحد لما تلاقيك بتنطقها زي المغني
انا بعمل كده

**dede_dodo88** · 03-12-2014 10:42 PM

المشاركة الأصلية كتبت بواسطة mastr_n

الاول هاتسمع الاغنية وتعصر دماغك انت تفهم كلماتها وبعد كدة تسمعها وانت بتقرا كلماتها
ا

بالظبط كده..
أسمع الأول الأغنية و حاول تفهم اللي تقدر عليه بعد كده هات كلماتها و قارن اللي فهمته باللي أتقال فعلاً..
الفكرة أصلاً في موضوع الأغاني ده أنك تحسن قدرتك على سمع و فهم اللغة مهما كانت سرعة الكلام, فهو الأساس عشان تتعلم حاجة من الأغاني أنك تعرف تتابع مع الأغاني السريعة, مش بس في الفهم سمعياً, لأ في التطبيق كلامياً كمان..
اللي هتعمله كالتالي, هتقسم الأغنية لمقاطع و لتكن كل جملة تكون مقطع, هتسمع المقطع ده و توقف الأغنية, و تحاول تقول المقطع ده بنفس سرعة الأغنية بدون أخطاء لغوية..
مع التمرين المفروض الموضوع ده هيطور من مرونة لسانك في التعامل مع اللغة, و هيخليك لما تسمع كلام بالسرعة دي تفهمه بسهولة..
في تمرين هيساعدك على الموضوع ده أسمه "Tongue Twisters", ده تمرين بتقرأ فيه جملة مكونة من مجموعة كلمات متقاربة الشبه في الكتابة لكنها مختلفة في النطق.. زي فكرة "السجع" بالظبط في اللغة العربية..
مثال صغير, "Six sleek swans swam swiftly southwards"
الفكرة أنك تقرأ الجملة دي بأقصى سرعة ممكنة مع مراعاة النطق السليم لكل كلمة..

**Bassem Youssef** · 03-12-2014 10:58 PM

اعتقد ان تعلم اللغه هيبقي صعب من خلال الاغاني

خليك في الافلام افضل عن تجربه و ممكن تستخدم ترجمه انجليزي

يبقي انت بتسمع و بتقرأ في نفس الوقت

**NaderNabil** · 04-12-2014 12:26 AM

كتر سماعي للاغاني الانجليزية وقت اعدادي و ثانوي و جامعة كان له فضل كبير بجانب الافلام الاجنبية و الدراسة في تحسين اللغة سواء سمع و فهم او تحدث

ابدأ بأغاني westlife و back street boys و celine dion ... اغانيهم تتفهم و ليها معنى و تقدر تقلدهم و تغني معاهم لما تبدأ تحفظها

و زي ما الشباب قالوا خلي الlyrics دايما جنبك بس اقراها بعد ما تكون سمعت الاغنية اكتر من مرة و تكون بدأت تكون الكلمات و الجمل

**Mahmoud Naguib** · 04-12-2014 12:45 AM

تمام جدا والله إستفدت منكم كتير

ربنا يقدركم دايما على فعل الخير

**prof2013** · 04-12-2014 01:19 AM

اللي يعرف يجيبلنا افلام اجبني مترجمه للغتين العربي والانجلش مع بعض يبقى كتر الف خيره

**naser_56** · 04-12-2014 01:47 AM

يا سلام فكرتني بأيام تايتانيك وسيلين ديون (every night in my dreams)
عموما الافضل انك تسمع الاغنيه وانته بتقرا معاها الكلمات ودي هتساعدك جدا لانك لو هتسمع بس ممكن كلمات كتير مع اللهجه بتاعت المغني متستوعبش الكلمه مضبوط ولكن لو عينك علي الكلمات هتفرق معاك جامد وبعدين اسمع الاغنيه بس بدون ما تقراء الكلمات هتلاقي نفسك بتغني مع المطرب لوحدك حتي لو اكل نص الكلمه

هديه علي الماشي

[youtube]http://www.youtube.com/watch?v=zCLJU1z8Cw4[/youtube]