المشاركة الأصلية كتبت بواسطة MohabSaeed
امبارح كنت فى مدينه نصر , جه فى بالى اروح روكسى و اتفرج على الFRV و قد كان
كنت هناك تقريبا الساعه 10 مساءً , الحمد لله المعرض كان لسه شغال .
الانطباع الاول :-
العربيه من بعيد تديك انطباع جميل و مبهر و تديك احساس انها عربيه غاليه و محترمه " خصوصا الهاى لاين " الجينوط بتاعها جميله جدا ولايق اوى مع العربيه .
الصاج ما شاء الله ممتاز و قوى .
كان فى عربيتين واحده اخضر ميتالك " هاى لاين " و للاسف كانت مقفوله
و التانيه بيضاء " ميديم لاين " و ديه الى كانت مفتوحه .
طبعا استنيت حوالى ربع ساعه لان فى ناس دخلو العربيه " اربع افراد تقريبا اسره واحده " متحركوش من العربيه و كان فى حد بيشرحلهم مميزات العربيه .
بعد عناء دخلت و قعدت فى كرسى السائق , بجد فاقت توقعاتى من حيث جودة التقفيل او الخامات المستخدمه ....... فعلا احسن عربيه صينى قعدت فيها , اساسا ظلم للعربيه ان يبقى اسمها مرتبط بالصين , جوده الخامات المستخدمه فى الصالون و التابلوه توازى السيارات الكوريه " الحديثه " . التابلوه ممتاز و البلاستك بتاعه كويس جدا .... زراير االكاست و التكيف كلها بلاستك مصنوع " بنضافه " و ملمسه كويس جدا .
الكاست جميل جدا بأضائه برتقالى و صوته كويس لكن مقدرتش احكم عليه اوى لان الدنيا كانت زحمه ,
طاره الدركسيون شكلها جميل جدا و ملمسها جميل ,
شكل العدادات جميل جدا و رياضى بأضائه برتقاليه جميله جدا جدا .
تقفيل الابواب من الداخل فوق الممتاز و من خامات ممتازه بجد نضيف جدا جداو زرار الزجاج الكهرباء تحس انها متينه ... مش زى اللعب . زى ما اتعودنا من الصين , و اكر الباب الداخليه كروم .
فرش الكراسى و الصالون " الابواب , السقف " ممتاز و خامته كويسه جدا .
النقطه الوحيده الى معجبتنيش فى الصالون ... درج التابلوه لانه كان بيفتح و يقفل بعصلجه شويه
غير كده الصالون كجوده و شياكه و تقفيل .. اديله " جيد جدا "
الكراسى مريحه جدا جدا و مصممه بشكل جيد , وضعية القياده ممتازه " انا طولى 185 سم " و ظبط الكرسى على الابعاد المناسبه ليا و كان لسه فى مسافه لرجوع الكرسى للاخلف , و كنت قاعد مرتاح جدا
الفتيس و الدبرياج ناعمين جدا و ان كان نقلات الفتيس بعيده شويه عن بعض . بس عجبنى سلاتسه جدا
بعد ما ظبط الكرسى رجعت و قعدت ورا فى الصالون ورا كرسى السائق بعد ما ظبطه على الابعاد المناسبه ليا . المفاجئه انى كنت قاعد ورا مرتاح جدا و الكرسى مكانش زانق على الكنبه زى ماكونت متوقع و واحد صاحبى جه و قعد جمبى و حسيت ان الكنبه من ورا واسعه ... تشيل 3 متوسطين فى كامل راحتهم .
الهاى لاين تفرق عن الميديم لاين فى :
باركنج سينسور
مفتاح ريموت كنترول و ايموبلايزر
فوج لايتس
جينوط جميل جدا 15 بوصه
* سواء الميديم لان او الهاى لاين المرايات فى الاتنين بتحكم يدوى من الداخل .... مش كهرباء
الموتور و الحوض :
الموتور فعلا مكتوب عليه ميتسوبيشى تيك بس هو نفس شكل الموتور الى موجود فى الانسر ال 4G18 بالظبط .
تقفيل الحوض جيد و البلاستيكات و الخراطيم المطاطيه شكلها جيد , لفت نظرى ان رشاشات الحقن الالكترونى من شركة " بوش " .
تقفيل الحوض عموما جيد و و بالمقارنه احسن من الفيرنا و الانوس ... بكتير
كان فى عيب لاحظته فى الحوض و الشنطه ان نهايات الرفارف محطوط عليها سيليكون بشكل سئ نوعا ما ... لكن الموضوع ده فى حتت صغيره مش على طول الرفرف او فى كل اماكن اللحمات .
الشنطه حجمها متوسط , مش كبيره اوى , تقريبا فى حدود350 لتر مش متأكد بس حجمها معقول و الكنبه ممكن تتفرد بشكل جزئى او كلى و المساحه حتكون كبيره جدا
تقفيل الشنطه جيد جدا و متغطيه كلها بالموكت .
كنت قريت تعليق قبل كده ان فى فرق مابين الفوانيس الخلفيه و باب الشنطه ..... انا شايف ان الموضوع مش ملحوظ اوى ... يعنى انا لو مكونتش قريت التعليق ده و دقت مكونتش حاخد بالى منه .
اجمالا العربيه جيده جدا حقيقى و فاقت توقعاتى من حيث الجوده تحديدا " مش حقول انها ممتازه لكن جيدا جدا "
العربيه ديه لو مصنوعه فى اى مكان غير الصين .. كوريا مثلا او ماليزيا حتتباع مش اقل من 85 الف جنيه .
الى اقدر اقوله لكل الى حجز العربيه ديه ربنا يباركلك فيها بجد العربيه جميله و سعرها ممتاز ... الف مبروك مقدما
لفت نظرى معرض البافاريه و طريقه العرض جميله جدا و حاطين جمب العربيه حاجه زى دولاب زجاج و فى قطع غيار للfrv كان فى عدادات و فوانيس و كذا قطعه تانيه .
المعرض كان فى ناس كتير جدا لدرجه انهم قفلو النور علاشان الناس تمشى .
معرفتش اكلم اى مسئول هناك من كتر الزحمه .
كان فى التحفتين الجالينا و الاسبليندور.....
الجالينا انا عارف انها روعه لانى ركبتها قبل كده فئه " جالينا اسبورت " و كانت روعه .
الجديد و الى مخادتش بالى منها اوى قبل كده الاسبليندور ..... تحفه تحفه بجد شكل العربيه و الصالون و التابلوه بجد ممتاز جدا.....
بجد الماركه ديه حتعمل شغل كويس فى البلد ... لانهم بيلعبو فى اربع نقط رئيسيه
جوده , شكل , سعر , خدمة مابعد البيع .