الموضوع: اول مرة اسافر بالعربية في القاهرة فازاى اوصل ؟

مساء الخير جميعا
يارب تكونوا كلكوا بخير
معلش استفساري النهاردة طويل شوية علشان دي اول مرة اسافر بالعربية للقاهرة و معايا والدتي فعاوز بإذن الله ربنا يكرمني و نوصل باقصر الطرق بمساعدتكوا ان شاء الله
دلوقتي انا طريقي من الزقازيق و رايحين للدكتور في حدايق القبة شارع مصر و السودان قريب اوي من مترو الدمرداش
انا طريقي قبل كدة دايما كان عن طريق المترو فبالنسبالى سهل
لكن ما اعرفش الطريق علي الارض بالعربية
كنت كل مرة بانزل موقف السلام و اركب عربيات مترو المرج و اركب المترو للدمرداش
او انزل عبود ( او كلية زراعة ) و اركب مترو و اغير في الشهداء و انزل الدمرداش
فدلوقتي انا بإذن الله طريقي هايبقي بكرة صحراوي ( اخري موقف السلام ) و انا راجع هارجع زراعي ( موقف عبود )
الطريق بقي من موقف السلام لحدايق القبة ( شارع احمد بسيوني متفرع من مصر و السودان ) عبارة عن ايه
يعني امشي ازاى و هاطلع كباري و كدة ولا ايه
و ان شاء الله بعد ما نوصل بالسلامة و نخلص عند الدكتور هاحتاج اعرف الطريق من شارع احمد بسيوني متفرع من ش مصر و السودان لحد دخلة عبود اللى هي الطريق الزراعي بتاع اسكندرية علشان هافضل ماشي فيه لحد كوبري بنها و هاكسر يمين علشان اروح الزقازيق
الطريق بتاع السفر السريع انا الحمدلله عارفه
محتاج بس الدليل جوة البلد من و الي
و الف شكر مقدما