المشاركة الأصلية كتبت بواسطة D . a .\ AYMAN
لو عايز التوفير ومصاريف التشغيل البسيطة والصيانات السهلة اللى مش مغالى في سعرها ... وفي نفس الوقت أداء كويس جدا وثبات كويس جدا ويعتبر أفضل ثبات في نفس فئتها يبقى السويفت بدون تردد
نقطة تحسب للسويفت إن سير الكاتينة بتاعها جنزير مش بيتغير ... وزيت الفتيس الأتو بتاعها بيتغير على 165 ألف كيلو ... ودول أكثر حاجتين الواحد بيشيل هم تغييرهم في مصر (حتى لو في التوكيلات) بسبب إن الغلطة فيهم يا إما بالموتور لو سير كاتينة أو الفتيس كله لو زيت الفتيس
لكن لو عايز أداء ممتاز وقوي وثبات خرافي على الطريق ولما تطلب منها حاجة هاتديهالك من غير ما تقول لأ وعربية أوسع من جوة ومن الشنطة وصاج محمل وقوي ... بس على حساب استهلاك وقود عالي وصيانات أغلى بشوية يبقى الجين 2
الإثنين قيادتهم ممتعة جدا ...
الإثنين تقفيلهم من جوة كويس جدا ... مع أفضلية بسيطة للسويفت
الإثنين نفس الأوبشن والكماليات وعوامل الأمان ... مع أفضلية لفرامل السويفت (أقوى واستجابتها أسرع لأنها من الجيل الثاني)
نظام الصوت في الجين 2 ... أفضل من السويفت بكثير ... لو بتحب البيز العالي نظام السويفت ممكن يكون غير كافي ليك ... وده مش معناه إن بتاع السويفت وحش ده كويس جدا صوت نقي وأربع سماعات و2 تويتر ... لكن بتاع البيرسونا أو الجين أقوى وبيديك البيز اللى انت عايزه من غير جي إم ولا أي حاجة إضافية
البروتون (جين أو بيرسونا) ممتعة أكثر في السفر ... وبالذات لو البيرسونا عشان فيها مثبت السرعة ... لكن ده مش معناه إن السويفت وحشة في السفر
السويفت ممتعة أكثر جوة المدينة ... وبالذات عشان الحجم الصغير والباور الكهرباء الناعم لدرجة عالية جدا وكرسي السواق العالي بالإضافة لأن العربية نفسها عالية عن المطبات ... 17 سم من الأرض (يعني نفس ارتفاع الكارينز والسبورتاج والقاشقاي) ... لكن برضه ده مش معناه إن البيرسونا وحشة جوة المدينة
.....................
أنا رأيي لو ناويت على السويفت ... يبقى تجيبها من الوكيل ... تحجزها بسعرها الرسمي 101900 دلوقتي وتستنى عليها .. هي تستاهل
انت معاك الكورسا تمشيك لغاية ما تستلم على خير ... ولا الحوجة للتجار واستغلالهم البشع
وعلى فكرة لو الكورسا مريحاك ومش تاعباك في القعدة يبقى السويفت مش هاتتعبك لأنهم قريبين من بعض في المساحة الداخلية ... وطبعا الفيصل في النقطة إنك تنزل تركبها في المعارض وتشوف هاتريحك ولا لأ
...................
لو مش قادر تستنى ولازم تجيب بسرعة بدون فترة انتظار ... يبقى حرام تدفع في السويفت الرقم ده كله أوفر برايس ... ويبقى ساعتها الجين أو البيرسونا أفضل بكثير ... لأن فرق توفير الوقود ومصاريف الصيانات هايروح في جيب التاجر كأوفر برايس ... ومش انت المستفيد بيه كدة في جميع الأحوال