الموضوع: عاجل جدا بخصوص تقسيط سيارة زيرو

المشاركة الأصلية كتبت بواسطة NEW2014

السلام عليكم جميعا
وعليكم السلام ورحمة الله وبركاته
أنا الحقيقة متوفر معايا مبلغ 25000 جنية وكنت عايز اجيب بيهم عربية مستعملة لأنى لسة جديد
بس لقيت أن أى عربية مستعملة فى الحدود دى هتكون حالتها تعبانة جدا وهصرف عليها كتير صيانة كل شوية ففكرت أجيب زيرو من البنك الاهلى ولقيت أقل عربية زيرو فى مصر ومش صينى ( عشان طبعا الصينى ما يتضمنش ) هى السوزوكى ماروتى وثمنها 46000 جنية ففكرت أنى اعمل وديعة فى البنك الاهلى من خلال أنى هدى المبلغ اللى معايا لواحد قريبى عندة وديعة فى البنك بس وديعتة بــ 20 ألف وبكدة توصل وديعتةبعد ما يضيف فلوسى معاة لقيمة العربية وأخد العربية من البنك بضمان الوديعة وهتكون كدة وديعة 100%,,,وقولت بعد كدة هسدد المبلغ الأصلى بتاع قريبى منى لية ويبقى فلوسة رجعتلة تانى وتفضل الوديعة لأنها طبعا هتتربط,,,وبكدة يبقى العائد من الوديعة يسدد القسط

اللى عايز اعرفة بقى :

1_ هل فى الحالة دى لازم أدفع مقدم بردة ولا كدة خلاص؟
على حسب نظام التقسيط نفسه - فيه من غير مقدم خالص بس الفائده اكتر
2_ فى الحالة دى هيكون أية الضمانات المطلوبة منى علما أنى بشتغل حر ومش هقدر اوفر مفردات مرتب؟ وهيطلبوا ضامن ولا لأ؟
هتاخد جواب من البنك و تشترى بضمان الوديعه
3_ العربية هيكون عليها حظر بيع أو أى شروط ولا لأ؟ ولا العربية كدة ملكى 100% ؟
عليها حظر بيع لحد ما تكمل الأقساط - هى مش بأسمك اصلا هى هتكون بأسم صاحب الوديعه (قريبك)
4_ هل العربية هتكون بأسمى ولا بأسم البنك؟
بأسم قريبك صاحب الوديعه
6_ القسط الشهرى كدة هيكون كام ؟
هتدفع مقدم ولا لأ ؟؟
7_ المدة المسموح بها للتقسيط حد أقصى قد أية؟
5 سنوات لكن فيه اماكن 7 سنوات (على حسب نظام التقسيط و الفائده)
8_ هل هيكون فى تأمين إجبارى على العربية ولا لأ؟ ولو فى هيكون كام شهريا؟
التأمين اجبارى على العربيات اللى بالتقسيط - سنوى مش شهرى و بيكون من 2.5 لـ 5 حسب نوع العربيه
9_ لو حبيت أسدد قيمة العربية بالكامل قبل مدة التقسيط هل هيكون فى غرامة مثلا أو أى مصاريف زيادة؟
لا, هتسدد عادى
12_ العربية كدة هتكون بأسم صاحب الوديعة ولا بأسمى؟ولو لازم بأسمة هل ينفع يبيعهالى بعد ما نستلمها بحيث تبقى ملكى أنا فى النهاية؟
بأسم صاحب الوديعه و مش هينفع يبعهالك الا بعد فك الحظر (انتهاء الأقساط او تسديد المبلغ)
13_ الإجراءات هتكون إزاى وفى مدة قد أية؟
هتروح المعرض و تحدد العربيه المطلوبه و اللون و تختار نظام التقسيط و المعرض هيحدد الأوراق المطلوبه من البنك تخلصها و تستلم العربيه
فيه معارض فيها مندوبين لبنوك و هم بيخلصوا الأجراءات
أسف جدا على كثرة الأسئلة بس بصراحة تعبت من التفكيرالبحث والأسئلة ومش بوصل لحاجة ونفسى اعرف راسى من رجلى
نصيحه منى بلاش تقسيط خصوصا ان بعد فتره هتحتاج عربيه اكبر او على الأقل فيها تكييف
اشترى ماروتى مستعمله بالـ 25 الف او عربيه صينى و لما ربنا يكرمك بمبلغ اكبر اشترى عربيه تانيه اكبر حتى لو بالتقسيط
العربيات الصينى مش كلها وحشه و انا كان عندى عربيه جيلى فروته من 2006 لـ 2012 و الحمد لله كانت ممتازه