عرض للطباعة
السلام عليكم أعضاء المنتدى الكرام ...
بقالي كتير بخش على المنتدى هنا والناس دايماً بتكتب كلمة bass بالعربي .. بيز !
مع العلم ان النطق الصحيح ليها هو .. بيس !
وممكن نسمع النطق الصحيح للكلمة من على الموقع ده:
bass - definition of bass with pronunciation by Macmillan Dictionary
ده النطق البريتيش .. او البريطاني .. النطق الأمريكي:
bass - definition. American English definition of bass with pronunciation by Macmillan Dictionary
أرجو تصحيح المعلومة وتثبيت الموضوع لتعم الفائدة .. وشكراً
base>>>بيز
bass>>>بيس
بس مش هتفرق في النطق مادام اللي قدامك فاهمك ... حضرتك لو سافرت برة أو لو اتكلمت مع حد أجنبي لو نطقك أو نطقه مش قد كدة بس عارفين تفهموا بعض يبقي كدة تمام :) ... اللغة معمولة عشان الناس تعرف تتواصل مع بعض
مظبوط كلام حضرتك .. بس مع احترامي .. هو النطق الصحيح هيؤدي الى عدم التواصل ؟! :)اقتباس:
المشاركة الأصلية كتبت بواسطة ENG.MaRk
base - definition of base with pronunciation by Macmillan Dictionary
ده نطق كلمة base برضه بتنطق بيس :)
يعني تقريباً مفيش حاجة في الانجليزي اسمها بيز !
حضرتك احنا في المنتدى بنتواصل ونتعامل لتعم الفائدة .. اللي عنده معلومة بيحاول انه يوصلها لغيره بدون انتظار مقابل
لكن فكرة طالما اللي قدامك فاهمك مش فارقة تنطقها ازاي .. مع احترامي مش متفق معاك فيها ومش شايف ليها علاقة بالموضوع :)
في أمريكا بينطقوها بيز
في بريطانيا و أستراليا مثلا بينطقوها بيس
و افتح يوتيوب و شوف بس مش اشكال برضه انت عندك في مصر الAmplifier بيسموا جي أم و في الخليج مضخم
في امريكا بتتنطق بيس برضه يا باشا وانا حاطط لينك من اونلاين ديكشينري بيوضحلك النطق الامريكي والبريطانياقتباس:
المشاركة الأصلية كتبت بواسطة hesham ista
شوف حضرتك اليوتيوب واي اونلاين ديكشينري ولو بتتنطق بيس احب اعرف والله الكلمة جت منين فعلاً انا مش بجيب حاجة من عندي
بالنسبة لموضوع الامبليفاير ..
بيقولو عليه في مصر هنا جي ام عشان نزل موديل من بايونير كان اول حرفين فيه جي ام وانتشر جداً وبقو بيسمو الامبليفاير جي ام ، وده كده يضاف الى قائمة الفضايح اللغوية اللي عندنا لأن ممكن تسأل مليون واحد يعني ايه جي ام هيقولك الشيء اللي بيركب ده عشان الصب .. لو كان عارف انه اسمه امبليفاير .. لو سالته طب جي ام دي اختصار ايه مش هيعرف
في الخليج مضخم صوت لأنه هو معنى كلمة امبليفاير مضخم ..
احنا عندنا الشعب ما شاء الله بيحط لغة تانية من عنده في البداية بتكون للاختصار او للاستسهال في النطق او غلط في النطق من عند واحد وبتبتدي تعم وتنتشر وتغطي على الاصل لحد ما توصل للاجيال اللي بعدك على انها الصح وتسأله على الصح تلاقيه ما يعرفش عنه حاجة
تيجي بعد كده تخش امتحان تويفل ولا تقعد في انترفيو تلاقي نفسك بتتكلم لغة تانية واللي قدامك هتقوله بيز وماي نيم ايس محمد ... هو هيفهمك اه بس هيعرف انك مش مثقف من كلامك وهيعلم عليك ... عشان كده انا حبيت اوضح للناس كلمة غلط من ضمن كلام كتيييييييييير اوي غلط عشان اللغة الاصلية بقا بيتردم عليها بجد والجهل بيمتد ما بين اللغة والتصرفات
يعني في الجيم اي واحد لو سألته عن تمرين منطقة الصدر .. هيقولك آه .. انت هتتمرن بنج النهارده .. أو بنش
لو سألته يعني ايه بنش ... هيتنح برضه .. لو عارف هيقولك الترابيزة اللي بتتمرن عليها .. كده بقا تمرين عضلة الصدر اسمه بنش !!!
طب اسمها ايه بالانجليزي يا برنس ؟ برضه هيتنح ... تسعين في الميه دخل الجيم لقا الناس بتقول النهاردة هتمرن بنش خلاص فهم ان عضلة الصدر هي البنش .. وده طبعاً تهريج وجهل روعة .. عضلة الصدر هي الشست .. وواحد في المليون اللي بيقول كده
بالمثل عضلة الترابيزيوس .. ما بين الرقبة ولوح الكتف .. اي حد هيقولك الترابيس .. قوله طيب ايه الترابيس دي ؟ !!
ده غير الفتي في اسلوب التمرين وكل ما يتعلق بالتمرين
كل حاجة في الموبايلات والكمبيوتر بقت ابداع تاني: مذر بورد .. بوردة ، فان .. فانة ، شيب .. شيباية ، الصب ووفر برضه تسعين في الميه من الناس ما تعرفش ايه الكلمة دي ومعناها ايه ... هي سماعات وخلاص ويمكن ما يعرفش انها بتطلع البيس بس او الصوت التخين يعني .. وفي اللي يقول صب هوفر ، وصب بوفر ، وصب اوفر ....... وأخيراً .. صباية :36_2_49[1]:
ههههههههه الله ينور عليك بجد جبت مالأخراقتباس:
المشاركة الأصلية كتبت بواسطة ashjo
السلام عليكم يا شباب
هو مش بيتهيألى احنا فى قسم الصوتيات و لآ فى قسم تعليم النطق فى بوابة الثانويه العامه
يا استاذ ashjo الناس فى مصر بتفهم بعضها بالاشاره ومش مستهله الدرس التعليمى ده كله
خلينا فى حاجه تهم القسم عشان نقدر نفيد الناس فى المواضيع الخاصه بالصوتيات
او على الاقل نخلينا فى الحاجات الخاصه بالسوند سيستم اللى معظم الناس مهتمه بى هنا فى القسم
مش بيز وبيس!!!!!
وعموما عشان اريحك روح عند ادؤيان او السجان او اى توكيل فى مصر كل الناس المتخصصه فى بيع السوند سيستم بتاع العربيات هتلاقيهم بينطقه الكلام بالعميه مش باللغه الانجليزيه الفسحه ههههههههههههههههههههه
واعتقد من يوم ما اتفتح منتدى نايل موتورز لحد ما انت عملت الموضوع ده محدش علق على الكلمه لان الناس فهمه المعنى كويس بغض النظر عن بيز او بيس
تحيات...........................
لو مش مريحه البيز يخليها الدبه والدبه الجامده بتهز الارضاقتباس:
المشاركة الأصلية كتبت بواسطة body7733
اقتباس:
المشاركة الأصلية كتبت بواسطة ashjo
شست ؟!!!!!!!!!!!!!!!!!!!!!!
اصلا بتنطق تشست و ليس شست زى ما انت قولت
وممكن نسمع النطق الصحيح للكلمة من على الموقع ده:
chest - definition of chest with pronunciation by Macmillan Dictionary
ده النطق البريتيش .. او البريطاني .. النطق الأمريكي:
chest - definition. American English definition of chest with pronunciation by Macmillan Dictionary
المهم ان عضلة الصدر ف الاناتومى اصلا اسمها (pectoralis major & minor)
رفقا بالناس
هو بغض النظر عن بوابة الثانوية العامة .. انا قريت الكلمة دي هنا كتير جداً مش في بوابة الثانوية العامة وعشان كده حبيت اصححها للناس اللي بتنطقها كده .. هنا !اقتباس:
المشاركة الأصلية كتبت بواسطة body7733
والتعليم مش مقتصر لحد الثانوية العامة .. التعليم من المهد للحد حضرتك .. تحياتي :)
سيادتك ده كمان من الغلطات الجميلة اللي ملهاش حصر عندنا .. لأن البيس مش هو الدبة .. لأن معنى كلام حضرتك اني لو مشغل قرءان يبقا مش هسمع حاجة خالص لأن القرءان طبعاً مفيهوش اي دب .. لكن البيس حضرتك هو الصوت التخين :)اقتباس:
المشاركة الأصلية كتبت بواسطة rotanamasoud
تحياتي ...
شكراً على التوضيح وانا عارف نطق الكلمة ومتشكر على الايضاح حضرتك .. بس انا ما حبتش اكتبها كده عشان ما حدش يقراها T-shest فأكيد شست اقرب بكتير من تـــ شستاقتباس:
المشاركة الأصلية كتبت بواسطة monamize4
بالنسبة لتعديل حضرتك التاني ... حضرتك اللي قلته كأنك بتقولي ان لا الذراع فيه باي سبس !
البكتوراليس في "الأناتومي" اللي هو مالوش دعوة بالجيم طبعاً عضلة من عضلات الصدر اللي هو الشست
http://www.bodybuilding.com/fun/chestbig.jpg
لكن الصدر ما اسموش البنش ، ولا الشست معناها الترابيزة :)
فحضرتك كده معرفش افدتنا بايه ... بغض النظر عن مكوناته .. الصدر هو الشست والشست هو الصدر
بالنسبة لغلطات حضرتك الاملائية في النص اللي فات حيث إنها تهمك:
" اصلا (أصلاً) بتنطق تشست و ليس شست زى (زي) ما انت (أنت) قولت (قلت)
المهم ان (إن) عضلة الصدر ف الاناتومى اصلا اسمها (في الأناتومي أصلاً إسمها) (pectoralis major & minor)
رفقا (رفقاً) بالناس"
وأخيراً الموضوع مش معمول بغرض إهانة حد او التعالي على حد ولكن للإفادة فقط .. فاللي عايز يستفتيد .. اللهم زده علماً .. واللي مش عايز .. يا ريت يفسح المجال أمام غيره عشان يستفيد :)
تحياتي :)
أولا أنت بتهرى كتيييييييييييييير أوى حتى موضوعك اللى انت بتسأل فيه عن تظبيط الصوت فى الإلنترا 2007 مفيش حد رد عليه بإفاده لآنك بتكتب كتير جدا
بصراحه أنا بشفق عليك ربنا يكون معاك دا أنا بكتب سترين ايديا بتوجعنى انت بصراحه سوبرمان فى الكتابه
ثانيا هو انت شغال فى وزارة التربيه والتعليم
حضرتك انت محسسنى كأنك بتشرح حاجه صعبة اوى دى كلمه
وبعدين انت بتقول التعليم موقفش لحد الثانوية العامه ودى عندك حق فيها
بس انت فعلا بتفكرنا بأيام درس الإنجليزى فى الثانويه العامه
ثالثا ده قسم للصوتيات مش قسم للترجمه او قسم لتعليم النطق وبعدين بيز او بيس هى هى نفس المفهوم
رابعا انت مكبر الموضوع أوى وواخده على أعصابك هدى نفسك وكده كده الناس فهما المعنى
أخر حاجه هقولهالك انا بصراحه كان نفسى الإدارة تلغى الموضوع
أساسا لآنه ملوش اى صله بقسم الصوتيات خالص انت بتتكلم فى مصطلحات تخص اللغة فقط متخصش القسم
وده موضوعك 160 مشاهده و4 ردود و 2 منهم رد فقط للأعضاء ومفيش فيهم أى إفاده بسبب كتر الكلام مع إحترامى
وده لينك للموضوع بتاعك http://www.nilemotors.net/Nile/451464-2007.html (تظبيط صوت النترا 2007)
اقتباس:
المشاركة الأصلية كتبت بواسطة ashjo
ايه يا بنى اللى انت بتكتبه دا ؟
انت عايز الناس تكتب (إن) بدل (ان) و تكتب (رفقاً) بدل (رفقا) ؟!!!!!!!
بجد انت عندك كام سنة ؟
حضرتك الحمد لله انا خريج علوم قسم الرياضيات وعلوم الحاسب .. وخدت كورس Typing .. واشتغلت Typist قبل كده .. فالكتابة عندي مفيش اسهل منها :)اقتباس:
المشاركة الأصلية كتبت بواسطة abdelrhman010
بالنسبة للهري حضرتك .. ممكن تقرا اول مشاركة في الموضوع مش هتلاقي فيها غير سطرين فيهم المفيد لكن الهري اللي بعد كده لأن كل واحد بيقرا الكلام بيحس انها شتيمة ليه واهانة ليه يا اما يدافع عن الكلمة يا اما يهاجم الموضوع .. يعني الموضوع ببساطة .. فضلاً انطق الكلمة بيس بدل بيز .. بسسسسسسسسسسسس
المفروض اللي يقرا والله وعرف الصح يستفيد ويغير .. او في ناس ما بتتغيرش خلاص زي الطبع يغلب التطبع كده ثابت على حاجة معينة بقاله فترة مرتاح بيها مش عايز يغيرها زي السجاير
لكن اغلب الناس هما اللي واخدين الكلام على اعصابهم بصراحة مش انا والله عشان كده بدل ما يسمع ويقول شكراً او يمشي في هدوء .. تلاقيه حس انك بتغلط في لغته العظيمة وتعليمه العريق مع ان الموضوع ابسط من كده بكتير والله
بالنسبة لحذف الموضوع والله الكلمة ما بتتكتبش تقريباً غير هنا بالشكل ده .. فهي حاجة تقريباً تخص القسم ده .. وبعيداً عن حصص النحو واللغة العربية والخ ... لو هي ملهاش علاقة بالقسم عشان احنا مش في درس انجليزي .. يبقا الموضوع المثبت في اول القسم اللي بيتكلم عن الوات والقدرة الفعلية والمدى المسموع والغير مسموع لدى أذن الانسان ده ملوش مكان في القسم حيث اننا في قسم الصوتيات مش في حصة فيزيا
وكان في موضوع قبل كده بيتكلم عن اصل كلمة جي ام اللي الحمد لله عرفت المعلومة دي منه ربنا يباركله بدل ما ابقا بردد وخلاص جي ام وانا مش عارف الحروف دي اختصار ايه .. يبقا كان الموضوع ده المفروض يتحذف حيث اننا في قسم الصوتيات مش في حصة تاريخ
موضوعي اللي عن تظبيط صوت الالنترا ممكن اكتب زي العنوان جوه .. عايز اظبط صوت الالنترا واسكت مش هخسر حاجة والله .. وكل مشاركة سؤال وارد واسال على سؤال جديد الى ما شاء الله .. ما هو الاختيارات كتير جداً حضرتك والعربية مش معمول في الصوت بتاعها حاجة وانا عايش طول عمري هوايتي الصوت بس في حدود اوضتي ما حطيتش حاجة في عربية فاكيد عندي استفسارات كتير حطيتها كلها في مشاركة واحدة احسن ما ارد على كل مشاركة بسؤال جديد انا اريحلي كده لأني قريت مسبقاً ردود الاعضاء الخبراء زي حضرتك واللي عايزين يعرفوه فبحط اللي مطلوب قبل ما اتسئل عنه .. والحمد لله حتى بعد ما لخصت الموضوع ما حدش قال كلمة مفيدة في الموضوع اللي هو في صميم القسم لكن هنا في الموضوع اللي حضرتك شايف انه بعيد عن صميم القسم المشاركات والمشاهدات اكتر بكتير مع انه بعد الموضوع التاني .. فمش عارف بصراحة كده مين اللي واخد الكلام على اعصابه :)
هو انا مش ابن حضرتك الحمد لله :)اقتباس:
المشاركة الأصلية كتبت بواسطة monamize4
مش فاهم ايه علاقة السن بالموضوع بصراحة ...
موضوعي الاصلي كلمة bass بتنطق بيز وده نطق خاطئ يا جماعة النطق الصحيح بيس ..
حضرتك سبت الموضوع الاصلي ولقيتك بتقولي ايه ده .. انت كاتب chest شست .. لا دي بتتنطق تشست .. وواخد اقتباس من كلامي وحاطه مع تغيير اللنكات للنك الكلمة
وبعدين اضفت اضافة تانية مش عارف علاقتها بالموضوع وقلت ان في الـ "أناتومي" عضلة الصدر اسمها pectoralis minor and major
فصححت لحضرتك حيث انك مهتم بالتصحيح شوية الغلطات اللي عندك عشان تاخد بالك منهم لكن مش عايز "الناس" تكتب إن بدل ان (مع ان ده مفهوش حاجة خارقة للعادة .. بس معلش كل واحد على قد تعليمه) ولا عايز الناس تكتب رفقاً بدل رفقا .. ولا حتى حضرتك .. كل واحد يكتب زي ما هو عايز
انا موضوعي السبب منه محطوط في البداية وواضح وصريح للي عايز المعلومة .. اللي مش عايزها شكراً اعتراضك على الغرض من الموضوع يا ريت تحتفظ بيه .. حاسس ان فيه اهانة ليك دي مشكلتك الشخصية وبكرر تاني:
وأخيراً الموضوع مش معمول بغرض إهانة حد او التعالي على حد ولكن للإفادة فقط .. فاللي عايز يستفتيد .. اللهم زده علماً .. واللي مش عايز .. يا ريت يفسح المجال أمام غيره عشان يستفيد :x1[1]:
تحياتي :coolio:
هههههههههههههاقتباس:
المشاركة الأصلية كتبت بواسطة ashjo
انت كدا هيجيلك ضغط وسكر
هدي اعصابك يا اكسلانس
هههههههههههههههاقتباس:
المشاركة الأصلية كتبت بواسطة speed_magnum
أعمل ايه يا دكتور طيب ..
ما كل القيم والاخلاق والعلوم والفنون والحقوق عمالة تندثر تدريجياً والعالم كله بيتقدم واحنا بنتأخر بشكل مرعب ولو فكرت في ذكرياتك هتلاقي اغلبها كانت حاجات حلوة ... عشان زي ما قلت لحضرتك بنتأخر مش بنتقدم .. مفيش حاجة تقريباً بشوفها بقول الحمد لله ان احنا بقينا كده غير التكنولوجيا اللي بتيجي من برة كما انزلت واحنا علينا الاستخدام بس ده لو عارفين نستخدمها حتى
لكن لو تفتكر زمان القيم .. الاخلاق .. العلوم .. الفنون .. الحقوق .. الصناعة .. البناء .. الأذواق .. وسائل المواصلات .. الترفيه .. التواصل الاجتماعي "الحقيقي انك تتواصل مع المجتمع نفسه مش انك تتواصل مع شاشة الموبايل او الكمبيوتر اللي أدت الى انعدام التواصل الاجتماعي الحقيقي تقريباً .. .بقينا بنقعد مع بعض في الزيارات كل واحد مش بيكلم الناس اللي قاعد معاهم لكن بيكلم شاشة الموبايل!!!!" كل حاجة هتبص عليها هتلاقيها كانت احلى بكتييييييييييييييييييييير من دلوقتي
وزمان ده والله مش ايام الابيض واسود .. انا عندي تسعة وعشرين سنة .. بس فعلاً كل ما اشوف حاجة الاقيها اتدهورت .. مفيش حاجة بتتقدم ..
للأسف لما بشوف فيلم عسل اسود عينيا بتدمع والله عالحال المزري اللي وصلنا له :(
للاسف كلام حضرتك مظبوط وكل حاجه بتتغير وحتى مش مدين نفسنا فرصه للتعلم
كامل احترامى لحضرتك
جزاك الله كل خير وربنا يكتر من أمثالك :)اقتباس:
المشاركة الأصلية كتبت بواسطة tamermegahed
انا بصراحه عاوز اقولك حاجه انت برضو بتهرى كتيييييييييييييير جدا
وبصراحه انت عندك حق احنا هنسبلك المجال واسع للرد وللاستفاده من خبراتك
بس انا عاوز اعرف انت ايه اللى مزعلك من موضوع النطق الكلمه دى وبعدين انت المفروض تحترم آراء الناس مش ترد على العضو monamize4 وتقول انا مش ابنك وترد ردود ولو انك بتكلم واحد من الشارع هو له رأى وهو حر فى رأيه وعموما احنا مش هنرد عشان نريحك بس خد بالك شويه من كلامك مع الناس عشان فى ناس بتستحمل وناس لأ
كلمات كتيييير اصلها مش عربى لان الاختراعات معظمها اجنبى
و ليها ترجمة عربى لكنها بتبقى صعبه شوية
اقولك على حاجة اسهل احنا فاهمين بعض كدا ,,
انت بقى لما تروح تصلح عربيتك ابقى قول للصنايعى (ناقل الحركة) بدل ماتقول (الفتيس)
و لو اوتوماتك ابقى قوله (ناقل حركة تلقائى) وابقى قوله (مقود السيارة) بدل من (دريكسيون)
و (نظام التعليق) بدل من (العفشة) و (شمعة احتراق) بدل من (بوجيه)
و لما تروح الجيم ,, بدل ما تقول ترابيس ابقى قول العضلة شبه المنحرفة :grinder:هههههههههههه
و ماتنساش تقول (اللوحة الام) بدل من (مذر بورد)
و هكذا براحتك خالص حتى لو عايز تقولهم باللغات الاصليه عادى خالص
اه صحيح ,, ماتنساش تحط همزة ل (ان) و (انت) و تحط تنوين ل (رفقا) :baby25:
بس قبل ما تدخل تتريق على الناس و اللغة بتعتهم ابقى اسأل نفسك هل انت لغتك سليمة 100% ??
ما بتستخدمش كلمات زى طنابير , جوان , راديتير ؟ و لان انت فاهم ف اللغة و بتقول عليه مشعاع ؟!!!!
دا انت اصلا مش عارف تنطق كلمة chest و سيبك من المبررات اللى ملهاش لازمة :mahf(5):
فاكس كفاية تضيع ف وقت الناس
و حقيقى كان نفسى النقاش دا يبقى وجها لوجه و نشوف مين ((اللى على قد تعليمه)) :36_1_40[1]:
أ/ عبد الرحمن .. حضرتك متعرفنيش .. وانا ما اعرفكش بس عندي خلفية بسيطة من خلال مشاركاتك انك راجل محترم وانا لسه شايف ده في كلامكاقتباس:
المشاركة الأصلية كتبت بواسطة abdelrhman010
ممكن عشان حضرتك ما تعرفنيش ميوصلكش كلامي بالشكل المقصود لأن أحياناً الكتابة مش بتعبر بالشكل الكافي ...
الهري ده حضرتك زي مثلاً:
قَالَ رَبِّ إِنِّي دَعَوْتُ قَوْمِي لَيْلًا وَنَهَارًا http://upload.wikimedia.org/wikipedi...20px-Aya-5.png فَلَمْ يَزِدْهُمْ دُعَائِي إِلَّا فِرَارًا
في ناس بتفهم بكلمة ... وفي ناس محتاجة عريضة شعر عشان تشم ريحة الفهم
برضه زي: "العبد يقرأ بالعصا والحر تكفيه الاشارة"
حضرتك انا مش زعلان من نطق الكلمة والله .. ربنا ما يجيبش زعل .. زعلان منك لما اسمع منك كلمة بيز اقولك لا معلش مبحبش اسمع الكلمة دي متقولهاش تاني واسكت
لكن زعلان عليك .. عايز انصحك .. عايز اصححلك معلومة (وده مش عيب والله) لما اقولك لا هي ما بتتنطقش بيز .. هي بتتنطق بيس :)
بس بمنتهى البساطة .. ايه الصعب في كده .. ما علينا الا البلاغ .. عرفت المعلومة والله أفادتك الحمد لله .. عارفها ومش مهتم عايز تنطقها كده .. يا سيدي براحتك ما حدش هيغصبك على حاجة ..
أ. رائد طيار / عبد الرحمن ، مفيهاش حاجة لما تكون مش عارف وتقول انا مش عارف .. مش عيب .. مفيش حد يعرف كل حاجة .. كلنا بنتعلم كل يوم .. وفوق ذي كل علم عليم .. ولو عارف اصلاً لكن بتنطق الكلمة كده اريحلك .. معقول برضه مع انه يفضل تنطقها النطق السليم مش هيشتكي .. بس في غيرك ميعرفش الكلمة دي جت منين .. هو اللي يعرفه كلمة بيز .. هييجي يكتبها مثلاً في جوجل هيكتب biz, baze, bez حاجة ملهاش علاقة بالكلمة الأصلية .. يبقا أضعف الايمان تبقا الناس عارفة الكلمة الصحيحة والنطق الصحيح .. زي ما قلت قبل كده ما تبقاش الحاجة مردوم عليها ما حدش يعرف عنها حاجة وتوصل للي ميعرفش حاجة بشكل تاني .. انت عارف الكلمة الاصلية بالانجليزي ومعناها ونطقها بس بتقولها كده .. جيت قلتها لواحد تاني كده فهمها من سياق الكلام لكن معندوش اي فكرة ايه الكلمة دي في الحقيقة .. وده الغرض من الموضوع :)
العضو المحترم اللي حضرتك بتتكلم عنه ... معلش حضرتك مع كامل احترامي ليك بس من غير اي تجريح في شخصك .. انا مش محتاج اوضح انا بتكلم ازاي وليه عشان ده ممكن يصدعني اكتر ما انا مصدع وقد يضاف الى قائمة الهري ..
لما يكون في "رأي" حضرتك هحترمه والله .. لما يكون في استظراف .. انا قلت ان الغرض من الموضوع مش الاستظراف .. تحياتي :)
والله حضرتك في ملكوت تاني تماماً معرفش بجد لو ده فهمك واستيعابك مش بتدعي كده "ربنا يهديك"اقتباس:
المشاركة الأصلية كتبت بواسطة monamize4
الحمد لله مش محتاج النقاش وجهاً لوجه .. كل واحد بيعبر عن نفسه وعن مستواه العلمي والثقافي والسلوكي والادبي والاجتماعي والاخلاقي من خلاله اسلوبه في التعامل والكلام وردود الافعال وانا كونت فكرة كافية من خلال كلام حضرتك مش محتاج اني احسنها او ابوظها ..
لكم دينكم ولي دين ..
من غير ما اتعب نفسي في الرد والتوضيح والنقاش اللي ملهوش اي لازمة مع ناس "زي حضرتك" لأنه ما بيؤديش الى نتيجة ايجابية .. فمن الأفضل اني اوفر كلامي
مع احترامي .. الموضوع الرئيسي النطق الرئيسي لكلمة bass بالانجليزية هو بيس وليس بيز
عندك اضافة تخص السطر اللي فوق .. اتفضل نور بيها اعضاء المنتدى ملكش دعوة بصاحب الموضوع .. معندكش .. احتفظ بكلامك لنفسك .. سمعت كفاية ومش محتاج اسمع تاني بجد وممتنع عن الرد على حضرتك ان شاء الله فيما بعد لأي سبب :)
تحياتي
شوف يا ashjo انا كده خلصت كلامى ومش هرد تانى بعد الرد ده
بس خد بالك انا مش بستظرف ولا اى عضو محترم هنا فى المنتدى مشترك عشان يستظرف
بس انت كلامك فعلا كثييييييييييير ومش مختصر زى ما قولتلك قبل كده
الموضوع مش شاغلنى اوى فى نطق الكلمه زى ما شاغلنى جدا انك بتبالغ فى زيادة الكلام
وعموما عيب جدا انك تقول استظراف لان مفيش حد فاضى هنا يستظرف معاك او فاضى لكل الهرى ده
بس عموما يا ريت متعلقش تانى على كلامى وخد نصيحه منى متحاولش تستفز حد انت متعرفش عنه غير انك بتتكلم معاه عن طريق منتدى او عن طريق الانترنت
واخيرا انا حابب اعرفك حاجه بسيطه
معظم الناس المحترمه اللى انت مش عجبك كلامهم او بتحجر على حتى مجرد نطق حرف حتى لو مش صحيح بس هما فهيمينه وفهمين المخزى منه
وخد بالك دول ناس كلهم محترمين واكبر منك فى السن مش كفار عشان تشبههم بقوم نوح وتقول فيهم امثله من القرآن عشان مجرد نطق حرف مش كلمه
انا بفكرك خد بالك كويس من كلامك مش محتاج افكرك تاااااااااااااااااااانى لانك مش صغير
وضع البلد ككل من سيء الى اسوااقتباس:
المشاركة الأصلية كتبت بواسطة ashjo
الهجرة افضل حل
ربنا يسهل والواحد يسافر دوله محترمه
يا جماعة اسمحولي ,
الموضوع بسيط ومش محتاج كل الشد والكلام والاختلاف ده
الاخ الكريم صاحب الموضوع خد الامور ببساطة وتقدر توصل المعلومة بدون كل الاختلاف ده
العضو monamize4 الي بعتبره صديق ومن الناس الافاضل
هطلب منك انك تتخلي عن النقاش فالاختلاف ده واكيد انت فاهم قصدي بدون توضيح
نقفل صفحة الاختلاف فالرأي ده وليس الخلاف زي ما علمتني كأخ ليا
وميبقاش حد زعلان من حد
تحياتي ليكم ..