مشكله في مبرد زيت الفتيس في اوكتافيا a5
السلام عليكم و رحمه الله و بركاته.
عندي اوكتافيا a5 و حصل فيها مشكله كبيره و صعوبتها انها اتكررت و خايف تتكرر كمان.
المشكله باختصار اني لقيت مؤشر القربه مديني اليرت ف نزلت اشوف القربه فيها ميه وللا فاضيه. لقيتها مليانه ميه مطحنه بيضا كده.
وديتها لميكانيكي قالي جيوان وش السلندري و ده هيخلينا نحل وش المكنه علشان ندخله علي مخرطه و سبب الكلام ده ان انا مشيت بالعربيه و سخنت مني و انا مخدتش بالي و طبعا ده محصلش.. العربيه ما سخنتش مني ولا حاجه.
المهم بعد شويه كده لقيته قاعد يقلب كده في العربيه و قالي مش الجوان ده حاجه اسمها مبرد زيت الفتيس. هوا ده اللي باظ و بيدخل الزيت علي الميه.
انا طبعا لاحظت كده بس انا مبتدي في العربيات و مش عارف اوي.
لو جوان وش السلندر هوا اللي ضرب كان زيت المكنه هوا اللي طحن و ابيض بس مش ده اللي حصل.. كل الموضوع ان زيت الفتيس هوا اللي دخل علي الميه. و ده طبعا اتأكد لما فكينا الكارتيره و نزلنا زيت الفتيس اللي لقيناه ابيض و سميك.
المشكله اني اضطريت اجيب مبرد زيت صيني ب 360 جنيه مؤقتا علشان ننظف بيه دوره زيت الفتيس و كنت هستخدمه شهر وللا شهرين و غيرنا زيت الفتيس ب نوع رخيص تقريبا 5 مرات برضه علشان ننضف دوره الزيت و كنت كل مره امشي بالعربيه مشوار صغير بزوده كل غيار بزود المسافه اكتر و الموضوع ده اخدله تقريبا اسبوع. و طبعا كان فيه تحسن واضح في شكل الزيت اللي بنغيره كل مره
اتفاجئت ان نفس المشكله حصلت بعد شهر و نص بالظبط يعني انا كنت هغير المبرد بعد 15 يوم بس المشكله حصلت تاني و قررت اجيب مبرد من التوكيل ب 2700 جنيه.
انا خايف ليكون عندي مشكله هيا اللي بتبوظ مبرد الزيت ده. و خايف اجيب مبرد من التوكيل يحصله نفس الكلام اللي فوق ده.
و هنا باه شويه اسئله و اتمني الاقي مساعده.
1. ايه الاسباب اللي تخلي مبرد الزيت يبوظ و يدخل الزيت علي الميه.؟ و ازاي اتوقع حاجه زي كده قبل ما تحصل؟
2. لو حصلت المشكله. ايه انسب طريقه لتنظيف دايره الزيت.؟ بشكل افضل؟
3. ايه انسب الطرق لتنظيف دوره المياه؟
4. ايه المخاطر علي الفتيس... دي اهم حاجه؟
5. هل اني اجيب مبرد زيت مستعمل استعمال خارج احسن بدل ما ادفع 2700 جنيه في واحد جديد.؟؟
بس كده
شكرا جزيلا و ارجو الرد
