الموضوع: قشقاى...نمر من ورق

مجهود رائع تشكر عليه لأن إحنا عايشين فى ضلمة بالنسبة للعربيات كأننا فى كوكب تانى .... المستوردين والتجار ومراكز الصيانة والناس كلهم مشتركين فى الضلمة إللى إحنا فيها ..... تلاقى المستورد بيروح يتفق مع المصنع على بوكيه أو باقة يعنى شيل كذا وحط كذا بدل كذا وطبعاً لا عندنا مواصفة سيفتى ولا إختبارات سيفتى للعربيات فى مصر فأى بتنجان على ٤ عجلات وفيه موتور ونور وفرامل وحزام أمان ودركسيون تبقى عربية وتخش البلد عادى ... والشركة المصنعة بتعمل اللى المستورد عاوزه بدون ادنى مسئولية علشان كده ساعات الشركات المصنعة بتقفش فى الضمان لأنهم سبق وحذروا المستورد من عيب معين نتيجة إختياره ...... المفروض العربية بتيجى منها واحدة أو اتنين أو ٤ عربيات للإختبار ويتم إختبارهم على مواصفة وأسس خاصة بينا ومسايرة للعالم يعنى مش حنألف إختبارات ..... ولو نجحت يسمحوا بإستيرادها ولو فشلت يبقى يمنعوا إستيرادها .... والمركز بتاع الصيانة لازم يشترط على المستورد أو التاجر أو المسوق إنه يلتزم بتوريد جميع قطع الغيار المطلوبة لمده لاتقل مثلاً عن ١٠ سنين على الاقل مش نستورد أى ٣٠٠ او ٤٠٠ صندوق حديد وإقلبهم وإجرى .... والناس بقى كمان حكاية - جرب تكتب موضوع جديد هنا أنك عاوز تشترى سيارة جديدة حتلاقى ٩٥٪ من الردود " إشترى قشقاى" يعنى تحس ان الشعب المصرى يمتلك نص اسهم قشقاى بالذات من منتجات شركة نيسان :)
أنا مش بأعيب فى العربية بس الخلاصة إن المستورد والتاجر ومركز الصيانة ممكن يبوظوا سمعة اى عربية والناس عاجبهم شكل العربية بس مركبوهاش وماشتروهاش وماتمرمطوش فى التوكيلات زى الملاك بتوعها ..... وكمان ملاك السيارات عندنا مش عاملين اى تقل لدى مراكز الصيانة والتوكيلات لأنهم مش متوحدين مع بعض .... كل واحد معندهوش عيب حصل لواحد تانى ماشى وخلاص وفرحان وموش مدرك ان العيب ده إحتمال كبير يحصل عنده ويمكن كمان بعد فترة الضمان يبقى ايه الحل ساعتها