وديعة بالدولار ولا بالجنية

**ali ashraf** · 12-12-2014 05:12 AM

الحقيقة انا محتار وخايف اخذ قرار و ارجع اندم عليه ....عندى وديعة بالدولار هتنتهى فى ابريل القادم و كانت الفائدة عليها بسيطة جدا الاستثمار الحقيقى كان فى ارتفاع سعر الدولار نفسه , بفكر أحول الوديعة عند استلامها ( ان شاء الرحمن) من دولار الى جنيه علشان استفيد من الفائدة العالية بالجنية المصرى و فى نفس الوقت خايف من انخفاض قيمة الجنيه و الدولار بيعلى كل شوية , بس الحقيقة انا محتاج اسند دخلى شوية بس محتار جدا و المبلغ مش قليل حوالى 110 الف دولار ياريت اللى عنده راى حسب توقعات السوق ينورنى مع خالص تحياتى

**أحمد كمال** · 12-12-2014 07:22 AM

خلي فلوسك دولار

**Ahmed_selmy** · 12-12-2014 10:42 AM

طيب بالمبلغ دا حضرتم ممكن تجيب بيه شقه فى مكان محترم وتاجرها ......غالبا الايجار مش حيقل عن 2000 جنيه وعلى حسب المكان و المساحه ممكن تعلا بالايجار ......وفى نفس الوقت الشقه حافظه قيمتها يعنى قيمتها بتزيد مع الوقت.
مجرد رأى.

**eng_amg** · 12-12-2014 11:22 AM

بص... البنوك مش مضمونة اليومين دول خصوصا لو دولار...
انا ليا اصدقاء بيتعذبوا علشان يسحبوا دولار من حسابهم...
وايضا ايداع النقود في البنك إهدار لقيمتها
لو عملت بنصيحة العضو Ahmed Selmy بشراء شقة بقيمة حوالي 850000 وتأجيرها حتجيب مش اقل من 6000 جنيه شهريا. ودا يساوي فائدة البنوك إلى هي 8.5 إلى 9 %

أما لو اشتريت شهادات قناة السويس حيكون أكثر بكثير. بس برضو الفلوس بتتناقص لأن معدل التضخم أعلى من 12 % بتوع شهادات قناة السويس.

لكن الحل الأفضل هو استثمارها.
يعني: لو انت ملكش في الدوشة ومتابعة الأعمال ممكن ببساطة تقوم بشراء وحدة سكنية أو قطعة أرض وبيعها بعد فترة من 6 أشهر لسنة.

دا أفضل من الايجار والفوائد لأن حضرتك بالشكل دا بتستفيد من معدل التضخم وفلوسك لا تقل قيمتها.
لو عملت الموضوع دا 3 أو 4 مرات ممكن المبلغ يتضاعف.. لكن لو اعتمدت على الايجار والفوائد المبلغ حيزيد زيادة أقل من التضخم إلى هو يتجاوز 15% فحيقل قيمته.

**Bassem Youssef** · 12-12-2014 03:26 PM

يا راجل معاك المبلغ ده و قاعد معانا في البلد ههههههههههههه

ممكن تشتري عقار و تأجره 5 سنين علي الاقل و بعد كده تبيعه

او الحل الافضل بالنسبه لي تستثمر المبلغ ده في دوله اخري

**أحمد كمال** · 12-12-2014 03:30 PM

المشاركة الأصلية كتبت بواسطة باسم يوسف

يا راجل معاك المبلغ ده و قاعد معانا في البلد ههههههههههههه

ممكن تشتري عقار و تأجره 5 سنين علي الاقل و بعد كده تبيعه

او الحل الافضل بالنسبه لي تستثمر المبلغ ده في دوله اخري

فكرتني بنكتة الجمل

اي موضوع بيقلب الجمل ههههههههههههههههههههههههه ههههههههههههههههههههههههه ههههههههههه

**M!SHO** · 12-12-2014 05:04 PM

المشاركة الأصلية كتبت بواسطة أحمد كمال

فكرتني بنكتة الجمل

اي موضوع بيقلب الجمل ههههههههههههههههههههههههه ههههههههههههههههههههههههه ههههههههههه

هههههههه ، ياه فين أيام الجمل :)

لصاحب الموضوع

ممكن تشتري شقه بالجزء الاكبر من المبلغ والجزء الاخر تستثمره في اي حاجه

الشقه سواء اجرتها او لأ قيمتها فيها وبتزيد مع الوقت

وبالمره تتجنب شبهة الربا من فوائد البنوك و التضخم السريع

**ahmedwagdy03** · 12-12-2014 05:23 PM

إنت بتقول عايز مبلغ تزود بيهم دخلك يبقى إنت جاوبت على نفسك

1- إما تحولهم بالجنية و تعمل بيهم وديعة و تحصل دخلها بس لازم تبقى عارف من البداية إن معدل التضخم حيقلل قيمة الفلوس اللى معاك بحوالى 5-6 % سنويا ( بفرض تضخم 15% و فايدة 10% يبقى حوالى 5% و يمكن أكتر)
2- تشترى شقة و تأجرها زى ما قالوا و فى الحالة دى إختار شقة تكون مميزة ممكن تجيب مبلغ عالى لما تبيعها و لو إن دى مش مضمونة برضه
3- تشترى محل فى منطقة تجارية كويسة أو منطقة ليها مستقبل و تأجره و المحلات بتكسب أكتر من الشقق

أما لو عايز تحافظ على قيمة المبلغ يبقى تخليه بالدولار بس كدة مش حيجيب دخل و نصيحة إبعد عن الدهب