هيونداى بونى -- و ابويا -- قصة عشق لا تنتهى!
يا جماعة انا الوالد معاه عربية هيونداى بونى من الزيرو ( موديل 79 ) .. و ماسك فيها و عنده استعداد يبيعنى انا و اخواتى و مايبعش العربية. رغم ان العربية من ساعة ما اعدموا التاكسيات و هى مالهاش حد بيبع قطع غيارها اصلا .. و محاولات التوفيق مش بتنجح من اول محاولة .. و ممكن العربية تفضل عطلانة شهر لان كل الميكانيكية بيستهبلوا و مش عايوين يوجعوا دماغهم.
و كل مرة العربية تعطل فيها احاول اقنع ابويا انه يجيب عربية جديدة .. يقولى طب اصلحها عشان اعرف ابيعها .. و اول ما تتصلح يقولى ابيع مين و بتاع مين .. دى ولا الجاجوار يابنى !! :36_2_49[1]:
و بما انى يأست من انى اخليه يبيعها .. يبقى احاول اخليهاله عربية بجد بقى.
كنت عايز اعرف هل فى حد او ورشة تاخد العربية تغيرلها الموتور بحيث يبقى اكسيل مثلا .. و كذلك كل ادوات التغذية كالدينامو و المارش و طلمبة المياه و خلافه و بالمرة نخليها باور مع اجراء كل التعديلات المطلوبة فى العفشة .. و بعد كده اوديها لسمكرى يعدلها عشان يركب عليها فوانيس اى عربية تانية منتشرة .. ثم نغير التابلوه باى تابلوه تانى برده .. و اخيرا الصالون !!
انا عارف ان الموضوع ممكن يوصل ل 10 الاف جنيه .. او اكتر سنة كمان .. بس انا عايز ارحمه من العذاب اللى هو فيه :_Alshmokh08[1]:
