اقسم بالله انى ما حكذب فى كلمه, انا امتلك سياره اوبل فيكترا واشتريت لابنتى (طالبه هندسه) سياره جين2 موديل 2007, المهم كنت كشفت على العربيه لما اشتريتها والقرير طلع مظبوط بس كان فيه رجه فى الموتور المهندس قالى القاعده اللي تحت الموتور مشروخه ومحتاجه تتغير يعنى الموضوع بسيط, ولانى من سكان مدينة نصر وكنت قرأت ان مركز عصام وصفا بقيت معاملتهم واسعارهم زفت قررت انى اروح مركز امير وجوزيف, اخدت ميعاد الساعه 9:30 صباحا ورحت انا وبنتى علشان اعودها تهتم وتصلح عربيتها بنفسها, الذى حدث ان الاخ اللي بيستلم العربيه فى المنزل بتاع المركز (مش فاكر اسمه بس هو مليان شويتين) اول ماشاف العربيه لقيته بيقولى وهو على وجهه علامات الاشمئزاز هى العربيه دى عامله كام كيلو؟قلت له 160 الف ليه؟ قالى العربيه شكلها تعبان اوى وصوت الموتور عالى جدا واخبار الفتيس معاك ايه؟قلت له تمام , قالى :لا بيتهيالى العربيه دى محتاجه تغير ديسك واسطوانه!! ودا كله لسه الاستاذ ماركبش العربيه ولا جربها !! قلت له ياباشمهندس انا كاشف على العربيه وعارف فيها, والعربيه مش محتاجه ديسك ولا اسطوانه العربيه محتاجه قاعدة موتور وعمل صيانات زى تغيير طقم الكاتينه وخلافه وعلى فكره ياباشمهندس دى العربيه رقم 9 فى حياتى يعنى انا مش جديد فى الكار...دخل العربيه وفضل يزود بنزين ويغير فى الفتيس, وبعد 2 دقيقه لقيته بيقولى اه عندك حق مش محتاجه ديسك واسطوانه, بس خد لبالك الصيانه اللي انت طالبها حتعدى ال 2500 جنيه!! قلت له طب انا عايز اعرف سعر كل حاجه قبل ماتشتغلوا...المهم كشف المهندس سامح هناك, وجانى معاه ورقه فيها الاتى تغيير فلتر زيت, فلتر هوا فلتر بنزين تغيير زيت موتور,تغيير زيت فتيس وفرامل بوجيهات سير دينامو واضافة مياه خضراء وطقم كاتينه = 2115 قطع غيار غير المصنعيه بالاضافه الى ان كارتيرة الزيت محتاجه تتغير ودى لوحدها حتكلف 2552 جنيه غير المصنعيه, بالاضافه الى انى لو احتجت اغير قاعدة الموتور فدى حتكلف 18060 جنيه + حتحتاج زرجينه لان فيه مسمار معووج ومحتاج استعدال ودا حيكلف من 800 الى 1000 جنيه دا غير مصنعية تغيير وتركيب القواعد...المهم طلبت منه انه يورينى كل الفلاتر وكارتيرة الزيت الماليزى وطقم سير الكاتينه, وبعد ماشفتهم قلت له :لو انا اشترينهم من بره ممكن تركبهملى؟ طبعا وشه جاب الوان وقالى اه بس حيبقى فيه مصنعيه, المهم اخدت عربيتى الاوبل وبنتى ورحنا دمش وربنا وفقنى انى اشترى كل الكلام اللي فوق دا بما فيهم كارتيرة الزيت ماعدا قاعدة الماتور ب 1500 جنيه فقط, طبعا لما رجعت له قلت له :انتوا بتعملوا كده ليه فى الناس, لما تقولى سعر كاتيرة الزيت ب 2552 جنيه وانا اروح اجيبلك اختها ب 500 جنيه دا اسمه ايه؟ولما تقولى طقم الكاتينه ب 1020 اروح اجيبه هوا هوا ب 350 جنيه دا اسمه ايه؟طبعا فضل يقولى دا دى تفرق عن دى, فقلت له طب خلاص هات كاتيرة الزيت بتاعتك وحلخبطها مع بتاعتى من وراء ضهرك وانت اعرفلى مين فيهم الاصلى بتاعتك ومين التقليد بتاعتى؟؟ ضحك طبعا, وبدئوا شغل فى العربيه (تغيير فلاتر +تغيير زيت موتور فقط+تغيير كارتيرة زيت وانا مشترى جميع قطع الغيار من شارع دمشق) المهم وجدت فاتورة ب 1115 جنيه...ليه ياجدعان,؟؟!! قالك اصل انت ماجيبتش فلتر زيت, وتغيير زيت +المصنعيه 850 جنيه يبقى الاجمالى 1115 جنيه, طبعا اعترضت اولا لانى مشترى فلتر الزيت من بره ومكتوب فى الفاتور, بس قلت ماعلينا ممكن اكون نسيته عند الراجل, ثانيا مصنعية ايه دى ب 850 جنيه؟ المهم طبعا بعد اعتراضى نزلوا المبلغ كله الى 1000 جنيه وانا غير راضى تماما, والحمد لله انها رسيت على 2500 جنيه بقطع الغيار لانى لو استمعت لكلامهم الموضزع كان حيدخل فى 8 الاف جنيه....هؤلاء البهوات واخدين على العملاء اللي بيروحوا يأنتخوا فى الاستراحه وهما يعملوا اللي هما عايزينه والزبون فى الاخر يلبس ويدفع, واقسم بالله انهم حراميه وشفت كام خناقه من شباب فهموا اللعبه..اللهم بلغت اللهم فاشهد..
المفضلات