وطن العك وتضيع حق الغلابة حسبنا الله ونعمَّ الوكيل

**ياسر مصطفي** · 13-12-2014 10:51 AM

القصة من على الفيس للصديقة منى سلطان الله يكون في عونك

يوم الأربعاء الموافق ١٢/١٠ بعد انتهاء نبطشيتي بالمعهد القومي للأورام الساعه ٨:٣٠ مساءا
رحت كعادتي اركب من محطه فم الخليج
وبعد مرور اقل من ١٠دقايق فوجئت بضربه علي راسي
بلف وشي لقيت بوكس في عيني خلاني افقد توازني وقعت علي الارض وانا في نوبه صراخ هيستيري باستنجد بالناس اللي حواليا علي المحطه بالاتنين عساكر المرور وأمين الشرطه اللي علي بعداقل من ١٠متر مني

كنت حاسه أني بتسحل لمسافة كذا متر لحد ما جروني تحت الرصيف واتخبطت في حجر فقدت قدرتي علي المقاومة في وقتها وقفت سيده بالسيارة فاخذوا شنطتي وجريوا ركبوا موتوسيكل واختفوا بعدها لقيت الرجاله اللي علي المحطه اللي كانوابيتفرجوا جاين يشدوني صرخت فيهم (ماحدش يلمسني انا هقوم لوحدي)

وقفت وروحت البيت وانا في حاله انهيار تام وبكاء هستيري وحكيت اللي حصل .. اخويا أخذني زي ما انا بهدومي المتبهدله بالتراب والدم من الجروح (قسم مصر القديمة) نعمل محضر بالواقعة .. في القسم بعد ماحددت لهم المكان بالظبط قالوا الرصيف ده مش تبعنا ده تبع (قسم السيدة زينب) روحوا قسم السيدة ..

رحت قسم السيدة وهناك بعتوا معانا لجنه معاينة لمكان الحادث فلجنة المعاينة قالت لاءه احنا اخر حدودنا الرصيف اللي في نص الشارع لكن الرصيف ده تبع (قسم مصر القديمة) علما بان المسافة بين الرصيفان لاتتجاوز ٥ متر مش هينفع نعملك محضر ارجعي (قسم مصر القديمة)

رجعت لمصر القديمة بردوا مصممين علي رأيهم ان الرصيف ده مش تبعهم فكلمت لجنه المعاينة عشان تبلغهم ان الرصيف اللي حصلت عليه الحادثة تبعهم ولما اقتنعوا قالوا مش هينفع نعمل محضر أصل احنا ماعندناش ختم .. الموظف اللي معاه الختم مشي الساعه ٢ تعالوا الصبح بدري ..

فرجعت (قسم السيدة زينب) وعملت محضر تتبع للتليفون اهي اي محاوله اثبت بيها حقي .. ورجعت بيتي وانا بردانة بردانة قووووووووووي ما اقدرتش اغسل جروحي تاني يوم من قبل ٨الصبح كنت في (قسم مصر القديمة) رفضوا يعملوا محضر لان ديه سرقه بالاكراه لازم معاون المباحث هو اللي يعمله والبيه هيجي علي الساعه ٣ قولتلهم هستني رفضوا أصل ممنوع الانتظار جوه القسم ..

خرجت ورجعت قبل ٣ قابلت البيه معاون المباحث اللي بعت لجنه المعاينة عشان يتأكدون الرصيف تابع ليهم ورحت مع لجنه المعاينة واتاكدوا وسالوا أمين شرطه وعسكري المرور اللي أكدوا حدوث الواقعه ولما اخويا سال أمين شرطه المرور ليه ما أدخلتش؟ قاله كان معايا تليفون!!!!!! وبعدين احنا ماعندناش مسءوليه قانونيه احنا مآينفعش نسيب الاشاره !!!

رجعنا القسم مع أمين لجنه المعاينة اللي غير اقواله قدام معاون المباحث (لانه ماقبضش) وقال ياباشا مفيش حاجه حصلت والأمن مستتب !!!فقالي مفيش شهود علي الواقعه ما اقدرش أعملك محضر .. انا عايز اثبت حاله حضرتك مش جايه اتهم حد .. فقالي هو اي حد يجي من الشارع يقولي اعملي محضر اعمله !!! ..

طيب واللي حصل فيا؟ قالي اثبتي؟ فقلت له انا عندي إثبات (الجروح والكدمات اللي في جسمي) قالي خلاص هحولك للمستشفي مدام سيادتك مواقفه تتعري وتكشفي مع نظره مهينه ..

ورحت مستشفي دار السلام البعد الكشف اثبتوا في التقرير الطبي وجود كدمه في فروه الرأس أدت لارتجاج بسيط في المخ وكدمه بالوجه وعدت كدمات في الذراعين والقدمين وعده جروح بالكوعين والركبتين مع اثار أظافر باليد اليمني .. ورفضوا يدوني تقرير لان التقرير لازم يستلمه القسم ...

رجعت (قسم مصر القديمة) رفضوا يعملوا المحضر قالوا ابقي عدي علينا بعدين لما نبقي نستلم التقرير بس اخويا كان فهم ودفع للامين اللي بعت في الحال عسكري يستلم التقرير ..

وبعدها اضطر البيه المعاون انه يعمل محضر بالواقعة بعد مرور اكتر من ٢٢ ساعه بتنقل فيهم من قسم لقسم لمكان الحادث ..

بعد ٢٢ساعه بتعامل فيهم معامله الجانيه مش المجني عليها ..الاهانه اللي شفتها في أقسام الشرطه عشان اثبت حقي اكبر بكتير من الاهانه اللي شفتها من الاتنين اللي اتهجموا عليا لأَنِّي ماعنديش واسطه .. انا وصفت اللي حصل معايا بس ماوصفتش إحساسي لانه مايتوصفش.

**amr_8800** · 13-12-2014 11:00 AM

كل الي اقدر اقوله
حسبي الله ونعم الوكيل

**mmolazem** · 13-12-2014 11:34 AM

ظلمات بعضها فوق بعض .

**eng.m7md.ali** · 13-12-2014 11:36 AM

كلاب حسبي الله ونعم الوكيل فيهم ... انا روحت اعمل محضر قبل كدة البيه الظابط بيقول للامين خده فيشه .. قاله ياباشا ده جاي يعمل محضر .. حتي معندهوش نظرة في اللي واقف قدامه الله يخربيت ال50%

**kaza** · 13-12-2014 01:57 PM

طبعا دة من سلبيات المجتمع واللي كلنا بنشتم فية بدلا من تكاتفنا في دفع الضرر والاولي ان كل من يدعي الرجولة كا يسكتش علي اي حاجة يشوفها غلط دة الاولي بدل كيل السخط علي الشرطة لان الاساس في الناس ومقاومتهم للفساد والحرامية واللصوص والهجامين وغيرة ..للاسف بقت نسبة كبيرة من الشعب همجي وبلطجي ومحتاجين عسكري لكل واحد من الشعب ومش هيتم ابدا نشر الامن والسلم في غياب الحساب باسم بطئ التقاضي والقوانين المهلهلة وضعف قدرة الشرطة بسبب الارهاب ..لازم احنا كمان نساعد اللي يشوف واحد بيعاكس يمسكة ومش واحد لا انا وانت واحنا كلنا..اللي يشوف جوز عيال في عربية في حتة ظلمة يمسكهم ..اللي يشك في حد لازم يتاكد منه ومانسكتش علي اي غلط يحصل امامنا دة واجب لكل من ينتمي لارض ونيل البلد ويارب الناس تفوق ونطلع من الغمام دة

**mmolazem** · 13-12-2014 02:10 PM

المبرراتيه . . . هجووووم :)

**Bassem Youssef** · 13-12-2014 03:43 PM

حقها لو راح في الدنيا مش هيروح في الاخره

لما ربنا ينزل علينا غضبه كله قريب محدش يرجع يقول اللي بيحصلنا ده من ايه ؟

انا بس اللي صعبان عليا هو الناس الغلابه اللي عايشه في البلد دي

**S O P H O S** · 13-12-2014 04:20 PM

حسبي الله ونعم الوكيل

**besso** · 13-12-2014 06:51 PM

لأ وفيه ناس زعلانه من اللي عايز يسافر

حسبي الله ونعم الوكيل

**Imhotep** · 13-12-2014 06:59 PM

مظالم الدنيا لا تسقط بالتقادم
كله سلف و دين
اللى يستوعب كده يستريح
لان حقه لو ضاع هنا
مش هيضيع هناك

اعرف عيلة
كلوا حق واحدة من بناتهم فى الميراث عشان اتجوزت من بره العيلة
معملتش حاجة غير انها و هى وسطهم بصت للسماء و قالت
انت تاخدلي حقى يارب
و كأن ابواب السماء كانت مفتوحة وقتها
ممرتش سنة على العيلة دى الا و كانت متفشكلة عن بكرة ابيها
و كل واحد فيها دفع التمن اضعاف حق اخته اللى اكله عليها