استفسار عن افضل بنزينه للكشف عن العربية

عاوزة اعرف منكم احسن بنزينه اكشف فيها على عربية هشتريها
فى نطاق مدينة نصر فقط
وادونى فكره كده عن التقرير ايلى بيطلع
شامل ايه
وهل بيبان اذا كان ملعوب فى عداد السيارة ولا لا

ايلى جرب بنزينه كويسه وشاطرين بقولى لى بليز

بالنسبة للكشف بيكشف على كل حاجة
وأهم حاجة قوائم وشاسيه العربية ودواخل العربية
ثم العفشة من مقصات ومساعدين وخلافه
ثم الموتور بحالة عامة وايضا كبس الموتور سواء بمكبس بار لاما بالكمبيوتر ويطلع نسبة الموتور كام %
أما موضوع اللعب في العداد بيبان لو كان العداد ديجيتال. أما لو بكر مثل لانوس فمش بيبان غير تقديرا من حالة العربية.

طب محدش عارفه بنزينه ياجماعه
حد له تجربه فى وطنيه ايجابية طيب
واى فرع

متابع

اللى كويس
توتال مصطفى النحاس
وطنية عند السوق السيارات
الكلام عن غير تجربة
العداد ممكن وليس اكيد يتعرف من خلال طلب تاريخ صيانات العربية من التوكيل

نصيحة لكل الأعضاء.. بنزينات وطنية تحط فيها بنزين فقط.. لا تكشف ولا إطارات ولا غسيل وآخرها تشتري سجاير.
البنزين بتاعهم زي الفل. لكن العساكر الغلابة إلى هناك مقضيين مدة خدمتهم وماشيين فمعندهمش خبرة ومش عايزين يتعلموا.
اللهم قد بلغت

بنزينة موبيل (يوسف عباس مع طريق النصر)
انا كشفت فيها قبل كده والتقرير بيطلع كالاتى: (هقولك اللى فاكره)
بيرفع العربية وبيكشف على :
-كشف على الشاسيه من تحت لو فى خبطة او اى عيب
-كشف على القوايم
-كشف على العفشة
-كبس الموتور بعداد زى بتاع الكاوتش
-كشف على الدهان (فابريكة ولا رش) بجهاز كده تقريبا اسمه باى اللى فهمته انه بينور حسب درجة اللون اذا كان فابريكة او لا وكل جزء لوحده يعنى الكبوت والابواب والشنطة